Den su resumen diario riba e desaroyonan di pandemia di Covid-19 na Aruba, ayera DVG a haci un coreccion riba e datonan cu a publica e dia prome. Ta resulta cu e turista cu a reporta como fayecido di Covid-19 tabata un ciudadano local.
“Ayera a reporta un turista cu a fayece, pero esaki a wordo coregi pa motibo cu tabata trata di un persona local”, DVG a bisa, sin duna mas comentario. E cantidad di fayecido total pa Covid-19 ta 124, di cual 122 ta residente y dos ta turista, despues di e coreccion.
Ademas, DVG a informa cu ayera a registra un total di 118 caso nobo di Covid-19, di cual 9 ta turista y 109 ta residente di Aruba. 154 persona a recupera di e malesa. E cifranan aki ta representa un tasa di positividad entre nos residentenan di 27 porciento. E cantidad di caso activo di Covid-19 ayera tabata 1055.
Datonan di Covid di DVG ta ilustra un aumento di casonan nobo cu un averahe semanal di 99 caso pa dia y un averahe di tasa di positividad semanal di 26 porciento pa dia.
Ademas tin 83 persona interna den hospital pa ricibi tratamento pa Covid, di cual 14 ta den ICU na Colombia. Di e resto na Aruba, 9 ta den ICU, 56 riba piso general, 2 riba piso di maternidad y un mucha riba pediatria.
