E area rond di Casibari ta bira e di 17 area protegi

Recientemente e minister di Infrastructura y Medio Ambiente Otmar Oduber (POR) amplia e 16 areanan protegi y a haci e area rond di Casibari e di 17 area protegi na Aruba.

E area specifico aki ta rond di Casibari caminda cu tin un poblacion bastante ‘cera’ cu hopi cas, y unda cu ta sinti cu tin e necesidad pa por logra proteha areanan natural den e bisindario. A yega na un acuerdo cu Casibari Scouting cu nan lo muda riba e area aki y lo percura pa conserva y mantene e area.

Parke Marino
Dialuna ultimo a tene un prome encuentro cu Centro di Pesca Hadicurari considerando e hecho cu gobierno ta bay ehecuta e Parke Marino. Den e siguiente simannan nos dilanti lo tin reunion cu otro centronan y organisacionnan relevante pa dialoga tocante e reglanan y leynan cu lo mester wordo implementa unabes cu institui e Parke Marino. Esaki ta segun e comunicado cu nos a ricibi di minister Otmar Oduber.

Manera cu tambe a bay ta treci dilanti,  durante di e ultimo lunanan a hiba combersacionnan pa mira bou cua organisacion e Parke Marino lo bay resorta. Na cierto momento despues di tabata pensa pa por pone un fundacion individual, tambe a pensa pa pone e Parke Marino bou di bestuur di Parke (cu na e momentonan aki ta uno transitorio), sinembargo mester bisa cu na augustus lo figa e constelacion definitivo pa e parke.

Un di e peticionnan cu gobierno tabatin ta, cu e ta bira un bestuur tipo ‘two-tier’ cual ta significa cu bo tin un ‘toezicht orgaan’ na luga di un bestuur cu ta ‘uitvoerend’. Mirando cu casi 20% di tereno di Pais Aruba ya caba ta hinca den Parke Arikok, hunto cu fondonan cu ta yega casi 3 miyon florin di pueblo di Aruba cu ta bay pa e parke aki a scoge pa un 2 tier caminda cu lo tin un organo di supervision cu ta esun cu ta dirigi esaki.

Tambe a tuma e decision cu e Parke Marino y e areanan protegi lo cay bou di e mesun fundacion aki. E ta scapa hopi fondonan cu lo mester bay den caso cu haci esaki separa for di otro y ta pensa cu uno por sostene e otro tambe. Cada uno lo tin nan mesun directiva pero lo tin un bestuur cu ta supervisa tur actividad cu tin.

Minister Oduber a splica cu e reunion cu Centro di Pesca Hadicurari su miembronan a bay hopi habri y den un bon ambiente. ‘Como ex minister encarga cu sector primario pa 7 aña, mi tin comprension hopi grandi pa piscadonan. Mi a biba hopi di cerca cu nan y mi a haci hopi trabou hunto manera e centro di pesca, pier, creacion di incentiva entre otro. Combersacionnan ta cana man den man pa locual ta e creacion di e Parke Marino cu ta den su prome fase cual ta esun legislativo cu ta tumando luga y ta na Conseho Consultativo actualmente.

Ta spera cu pa final di augustus e Parke ta wordo institui y cu e ora e fase principal di e trabou lo tuma luga caminda cu lo envolvi tur piscadonan di otro centronan/ranchonan akinan na Aruba den e proceso tambe. Lo sinta y scucha nan, pa conhuntamente pone reglanan y leynan cu ta bay rigi e parkenan aki. For di nan lo mester scucha cua ta e animalnan den lama cu nos lo kier proteha y no kier pa mishi cu ne, otro animalnan cu por pisca den cierto periodonan di aña y otronan cu tin abundancia di nan lo permiti cu por pisca esakinan henter aña.

Asina lo implementa regla a base di e conocemento cu tin di entre otro piscadonan, esunnan cu ta practica deporte acuatico of cualkier usuario di e area.

A compromete cu no lo inicia e fase aki sin sinta combersa, scucha nan y inventarisa e pensamentonan cu a biba cerca nos piscadonan rond Aruba, pa e ora yega na un ‘beheersplan’ cu por uza pa e Parke Marino aki.

You May Also Like

sangura

GKMB eherciendo control preventivo pa sangura Aedes Aegypti

Clayton Croes, e “Beleidsmedewerker” di Directie Volksgezondheid (DVG) y Hefe suplente di Gele Koorts ...

FTA ta lamenta cu trahadonan di The Mill Resort no ta bay gosa di representacion sindical

ORANJESTAD – Vice presidente di FTA, Tyrone Bremo, a lamenta cu mayoria di e ...

Abogado y Locutor Nilo Croes a fayece

Sr. Croes ta conoci como locutor di e radio emisora Top 95 FM. Pa ...

‘Miles’ di apelacion di Dimas tranca na LAR

Dimas tratando permisonan mas lihe cu sistema digital Mientras Dimas ta concretisando nan sistema ...

premier eman na cuba.jpg

Premier Eman a destaca importancia di union entre paisnan Caribeño na Cuba

E medio digital Cubano, esta Juventud Rebelde (digital@juventudrebelde.cu) a duna cobertura na e bishita ...

13feb, JM, Aruba Airlines.jpg

Hubert Zievinger ta e unico director di Aruba Airlines

Pa medio di esaki Aruba Airlines ta clarifica e situacion di e compania y ...