‘Cooperacion extenso ta necesario pa ehecuta Crisisplan Social’

 

Un total di 28 instancia ta envolvi den loke ta henter e programa Crisisplan Social. Segun e directora di Departamento di Asunto Social (DAS), Glenda Hernandez, e tarea pa coordina tur cos no ta facil y ta rekeri cooperacion di cada un cu ta envolvi.

E directora di DAS ta splica cu e plan aki no por wordo mira manera un simpel proyecto, sino cu mester wak e manera un programa. Cada un instancia envolvi tin nan mesun proyectonan, pero cada un den concordancia cu e Crisisplan social. “Cada un di e partnernan tin entre 10 cu 20 proyecto pa ehecuta y tur ta forma parti di e plan den su totalidad”, sra. Hernandez ta bisa.

Aunke na e momento aki ta trahando specificamente pa e aña nos dilanti, segun sra. Hernandez e plan riba su mes ta algo di algun aña. “Pa e motibo ey e ta un programa y no djis un proyecto. Pa bo por logra e meta, mester restructura departamentonan, duna tools na instancianan y tambe traha riba e guia.”

Como ehempel tambe sra. Hernandez ta bisa cu si kier habri un centro cu ta tuma hobennan bou nan hala, no por cera e centro bek despues di dos aña. E ta pone enfasis cu maske na e momento aki ta papia di aprobacion di presupuesto pa dos aña, e Crisisplan ta conta cu un asina yama ‘meerjarenplan’ (plan pa varios aña).

Desde luna di april e aña aki, parlamento di Aruba a aproba 34 miyon florin pa gobierno inverti den e Crisisplan. E suma aki ta ser dividi den dos aña, repartiendo e den 17 miyon florin pa aña. E director di DAS a duna di conoce cu a aloca un presupuesto pa cada instancia envolvi den e Crisisplan y cu cada un mester duna cuenta di kico ta bay haci cu e suma di placa.

“No ta asina cu a djis duna placa sin mas. Pa cada proyecto cu kier ehecuta, mester specifica y hustifica e suma”, e directora a declara. Henter e plan ta wordo canalisa via di DAS como punto central pero ta wordo controla pa mas persona y/of instancia.

Un biaha pa luna ta tene un reunion general cu tur instancia como tambe cu parlamentarionan. Esaki ta pa tur hende ta riba mesun liña. “Claro cu ora bo ta traha den un structura compleho asina aki cu 28 instancia, e ta dificil pa tur hende ta di acuerdo na tur momento cu e mesun cosnan. E idea ta pa yega na e meta, esta cu nos ta preveni mas problema social. Nos no mester ta tur ora di acuerdo, contal cu nos ta keda enfoca riba e mesun resultado final.”

Prevencion
Bon Dia Aruba a puntra sra. Hernandez si e Crisisplan no ta cana na banda di e Veiligheidshuis cu a keda introduci recientemente, es decir cu ta haciendo e mesun cos na final di dia.

Sra. Hernandez ta mustra riba e hecho cu en berdad Veiligheidshuis tin algun faceta igual cu e Crisisplan social, pero na mes momento nan rol ta na final di e cadena. “Nan tey pa actua ya ora cu algo a pasa y mester di atencion urgente. E Crisisplan di otro banda ta enfoca mas hopi riba preveni mas hopi posibel pa casonan mester yega asina leu.”

Mas leu sra. Hernandez ta bisa cu kier traha den un laso estrecho cu KPA (cuerpo policial). KPA tin bon conocemento di unda e problemanan social ta, como cu nan ta esnan prome yama ora cu cosnan bay for di man. Tambe e directora ta bisa cu kier pone trahadonan social bek den bario, contrario na loke Plan BoBario tabata; algo cu e directora a considera di ta ‘puro show di PR’.

Asistencia Tecnico
Dentro di poco Aruba lo ta hayando bishita di UNICEF, kende lo tey pa brinda asistencia tecnico riba e Crisisplan social aki.

UNICEF lo evalua e plan, lo sinta cu partnernan den henter e cadena y finalmente lo trece un conseho di con pa mehora henter e proceso. Nan ta haci esaki di forma gratis, pero mas cu claro Aruba tin cu cubri lo basico manera estadia. Esaki ta forma parti di palabracionnan haci cu Hulanda.

Supervision y transparencia
“Nos ta uzando fondo di pueblo y ta na su luga cu tur cos ta wordo controla debidamente”, tabata contesta di sra. Hernandez riba pregunta di Bon Dia Aruba, di con ta bay controla tur cos.

Sra. Hernandez ta splica cu tabata bou su iniciativa y sugerencia ta cu a instala un comision di supervision. E comision ta encera di parlamentario Sue-Ann Ras (MEP), kende ta na cabes di e comision, parlamentario Marisol Lopez-Tromp (POR), dos ambtenaar di Directie Financien y e directora di DAS. Sra. Hernandez ta aclara cu pa tur reunion general, tur parlamentario ta wordo invita pero cu lastimamente ta algun so ta presenta. “Esaki ta trece cu ne cu bo ta haya algun parlamentario ta cuestiona of papia publicamente riba algo cu nan mes no tabata presente pa compronde kico ta wordo haci.”

Bon Dia Aruba a puntra sra. Hernandez e motibo dicon ta escoge pa un accountant particular haci supervision final y no uza experticio di CAD, cu ya caba ta wordo paga door di pais Aruba. “Mare mi por a uza nan. Tabata mi deseo pa haci tal. Mi tin bon contacto cu CAD y nan consehonan semper ta al caso. Lastimamente nan no tin suficiente hende pues mi no por pidi nan asistencia na e momento aki.” Sra. Hernandez ta bisa si cu e no ta cera porta pa e posibilidad den futuro si e oportunidad presenta.

Por ultimo sra. Hernandez a declara cu e kier sinta cu prensa cada tres luna pa duna tur informacion necesario. “No ta tur cos cu nos haci mester core sali grita pa shine cu ne. Mi kier pa nos ta transparente si y kier brinda e espacio liber pa prensa haya tur informacion cu nan kier sa.” E directora ta bisa cu e no tin motibo pa sconde nada y si tin cosnan bayendo robes, e no lo duda den coregi esaki.

You May Also Like

Proceso di analisis di casonan di risico di maltrato familiar lo inicia

Minister di Husticia Andin Bikker a cuestiona cu durante e ultimo gobernacion aspecto social ...

editorial

Ley di establecimento di negoshi a bira obsoleto?

Cada 300 metro ta bay tin un supermercado? Un pregunta cu ta bin dilanti ...

‘Aruba tambe mester desaroya su mes di otro forma’

ORANJESTAD – Sustainable Development Goals of e Obhetivonan di Desaroyo Sostenibel na Papiamento, ta ...

Reconocemento di prome obheto di Aruba colga den Vaticano

Aruba ta marka historia cu su prome obheto colga den Vaticano y tambe finalmente ...

16-10-16accavenidafront.JPG

Accidente serio na Avenida Watty Vos a laga varios persona herida

Diadomingo anochi riba Avenida Watty Vos altura di e muffler shop a sucede un ...

Sindicato TOPA ta distancia su mes di manifestacion di diabierna awor

ORANJESTAD – E sindicato di empleadonan publico, TOPA tambe a adopta e mesun posicion ...