editorial.jpg

Durante e ultimo lunanan di aña cu a termina, tabatin mencion di e fenomeno di apartamento relaciona cu e yegada di turista for di Venezuela, cu pa motibo financiero no ta keda den e hotelnan. Nan mas y mas ta bay keda na apartamento, cu ta destina na alohamento di turista caba, of simplemente ta mira e oportunidad pa temporalmente probecha di e grupo grandi cu ta bin pa estadia cortico. Den e caso aki pa salba mas tanto posibel e dollarnan cu lo mester hiba cas pa haci negoshi. Esaki lo a afecta cierto di e hotelnan grandi cu ta mas orienta riba e parti di mercado aki. Esnan den su mayoria orienta riba mercado  Mericano no a sufri di e fenomeno aki.

Esaki a trece mas atencion pa e fenomeno di huurmento di apartamento cu meta turistico en special, pero tambe e fenomeno di apartamento en general, cu ta duna alohamento na trahado di exterior, pero tambe na un grupo creciente di habitante local. Esaki ora cu nan no por carga e peso di huur, ni mucho menos cumpra of construi un cas. Kico ta e caso? Nos por mira cu durante henter e ola di migracion cu a tuma luga desde final di añanan ochenta a base di e crecemento economico espectacular, a surgi un scarsedad grandi na vivienda. Pa colmo, un gran mayoria di e jobnan crea den nos economia no tabata pa hende cu salario grandi cu lo por a paga un cas completo pa nan mes. Kico ta sucede den un situacion asina, unda cu no tin un contesta gubernamental, o en todo caso no un contesta adecua gubernamental riba e necesidad aki? Mercado ta take over, y asina nos ta mira e fenomeno di e ciudadano individual cu ta traha apartamento den su cura, riba tereno propiedad pero tambe riba tereno erfpacht, cu of sin permiso pa esaki.

No tabatin un contesta tampoco di banda di gobierno, probablemente pasobra sin bisa nada, nan ya tabata contento cu e comunidad a absorbe e problema aki cu iniciativa priva, y kita e peso aki for di lomba di gobierno. Si mester bisa cu tabatin proyecto di vivienda popular na un escala modera, cu no tabatin nunca un volumen pa reemplasa e trahamento di apartamento, ni tampoco tabatin e pretension ey.

Durante ultimo añanan ta surgi,  banda di e fenomeno general di apartamento, e creacion di apartamento cu e meta pa aloha turista den forma di ‘bed & breakfast’ y otro formula parecido. Esaki ta consecuencia di un desaroyo mundial unda nos ta mira cu mas y mas turista ta prefera di tin un estadia unda nan por experiencia mas di cerca e bida cotidiano local, y aprecia mas e cultura y manera di biba local. Y esey ta mas facil for di un apartamento den ciudad of den un bario residencial, cu for di un camber di un hotel grandi.

E pregunta cu ta surgi awor ta con pa atende corectamente cu e dos fenomenonan aki, cu tin ora ta coincidi, y otro momento no. Ban purba descifra e asunto aki. Pa cuminsa e aspecto legal. Traha apartamento riba tereno propiedad no ta facil pa detene, si esey  por tabata e intencion. Ora ta trata di erfpacht, esaki ta unda gobernacion tin algun influencia, pero ta topa cu problema tambe. Si pa tanto aña a permiti e ciudadano ‘yuda resolve’ e problema di vivienda popular, pakico y con lo bay para esaki awor,  si no tin ademas ningun politica defini con  gobernacion mes ta bay atende e asunto aki, ora e ciudadano no ta haci’e mas? Tur esaki ta haci dificil pa para e fenomeno, nengando e permiso pa construi apartamento riba tereno erfpacht. Esey lo significa e necesidad pa bay regula tur e construccionnan cu a tuma luga caba den e mas di binticinco aña cu nos ta den e proceso aki.

Ta keda e posibilidad di regulacion di e fenomeno, pa loke ta e parti di explotacion turistico, via un proceso di permiso pa esaki. E medionan legal t’ey caba, pero supervision adecua lo ta un tarea bastante grandi. En todo caso ta posibel traves di e datonan di emigracion di e turistanan pa determina cual ta e adresnan unda nan ta bay keda y ken ta haci esaki como negoshi. E intencion no mester ta pa para e fenomeno aki, ya cu e ta parti di un tendencia mundial, cu talbes e hotelnan grandi no gusta, pero cu ta algo cu lo sucede di tur manera. Loke si por haci ta crea e condicionnan pa por tin un control riba calidad di alohamento y servicio cu ta duna na e turista aki, pa en general mantene un bon producto turistico riba henter e isla.  Pa varios aña ta señalando e fin di e era di crecemento di e hotel grandi, tambe por ehemplo di instancianan manera Fondo Monetario Internacional (IMF), pero ainda tin intento (fracasa) pa sigui inverti den esaki y ignorando e surgimento di hotel chikito y iniciativa priva individual den alohamento. Pero nan t’ey pa keda y ban mira con nan por contribui.

LEAVE A REPLY

Please enter your comment!
Please enter your name here