E aña aki Hulanda, Aruba, Corsou y St. Maarten lo cuminsa comparti informacion di DNA di criminalnan y victimanan. Esaki e cuater minister di Husticia a anuncia durante nan encuentro hudicial cu e biaha aki a tuma luga na Aruba.
E encuentro yama ‘Justitieel Vierpartijenoverleg’ ta tuma luga dos biaha pa aña unda e ministernan ta comparti informacion y tuma decision pa cu e combatimento di criminalidad den Reino.
E mensahe principal for di e hotel Hilton unda e ministernan a reuni, ta cu colaboracion entre e paisnan riba tereno di husticia ta keda importante y lo mester keda amplia esaki. Motibo entre otro ta (falta di) placa. E paisnan riba nan mes no tin, ni Hulanda, suficiente placa pa combati crimen. Tambe tur pais den Reino ta luchando cu problemanan presupuestario. Esaki ta nifica cu gobierno mester scoge unda e placa ta bay.
Y segun minister di Husticia Arubano, Arthur Dowers – den cuadro di e prizon KIA cu basicamente ta rekeri cu mester construi uno nobo- den e decision pa inverti placa hopi biaha esaki no ta cay na fabor di pone un prizon pa criminal. “Sinembargo nos tin un responsabilidad pa cumpli cu cierto derecho di e hendenen (den e prizon).”
‘Doño cartel tin mas cen’
E minister di Husticia di Corsou, Nelson Navarro, tambe ta remarca cu ‘cualkier doño di un cartel na Colombia tin mas cen cu presupuesto di Aruba, Corsou y St. Maarten. Pesey nos mester yuda otro den Reino.”
Sin duda Hulanda ta e pais mas rico den Reino, e ta continua, y e pais ta duna un bon contribucion. Sinembargo e pais aki tambe ta conta riba ayudo di otro (Europa) pa asina por combati criminalidad.
Comparti informacion
E ministernan a palabra colaboracion riba diferente tereno. Importante ta e compartimento di informacion. Den practico esaki ta mustra facil (conecta computer por ehempel) pero regla esaki legalmente, teniendo cuenta cu e derechonan di ciudadano y privacidad, ta algo cu ta rekeri cambio di ley y otro medida.
Pa cu e intercambio di informacion di DNA e idea a cuminsa un par di aña pasa. Awor e proceso di regla ta casi cla y segun minister Dower por spera cu e aña aki lo cuminsa.
E cuater minister tambe a firma un documento pa intercambia informacion di preso y sospechoso den Reino. Asina tur sa unda ken ta keda, minister di Husticia Hulandes, Ard van der Steur ta splica. Un par di aña pasa a sali den prensa cu tabatin basta criminalnan Hulandes condena cu a huy, bibando trankilo riba e islanan Caribense. Cu e intercambio di informacion e paisnan kier preveni esaki entre otro.
Alternativa pa bay corte
Un otro topico cu e ministernan a trata, ta alternativa pa soluciona conflicto dilanti hues. E cortenan di Reino ta hopi druk cu casonan. Pero e caminda aki no ta e unico pa ciudadanonan por soluciona conflicto y e ministernan di Husticia lo traha riba un plan cu alternativanan. Un di e alternativa cu tambe a bira popular na Aruba ta ‘mediation’. Por compara esaki cu e trabou di un mediador den conflicto laboral.
Finalmente e ministernan a palabra cu lo traha mas hunto den e formacion di polis (enseñansa) y riba peticion di Aruba, e directornan di prizon di e 4 paisnan lo cuminsa reuni pa wak con por yuda otro.
