Debi na un peticion cu partido AVP a haci pa parlamento na luna di augustus di aña pasa, ayera a tuma luga un reunion publico tocante impacto riba poder di adkisicion pa costo di bida na Aruba. Durante e reunion a bin dilanti diferente preocupacion di parlamentarionan, a transcuri cu acusacionnan di un banda y otro.

E prome orador tabata lider di partido berde, Mike Eman, ken a sigura cu esnan mas vulnerabel den comunidad mester haya cuido y proteccion. “Awe lamentablemente, e concepto y consenshi cu esnan di mas vulnerabel den pais aki, cu ta riba un bijstand, pensionadonan, esnan riba un salario minimo, mas di 50.000 ciudadano ta sufriendo na e momentonan aki di un pobresa penoso,” el a bisa.

Segun Eman tambe a sigura, e pobresa “penoso” aki a cuminsa na 2017 segun cifranan di Central Bureau Statistics cu ta marca cu esey ta e momento unda cosnan a cuminsa cambia den e pais aki pa esnan mas vulnerabel.

“Na 2017 a cambia e prioridad di e pais aki di sirbi bon comun pa bay sirbi interesnan particular, interesnan aheno cu e interes general di e pais aki,” Eman a señala.

Igualmente el a trece dilanti cu e realidad di e dolor di esnan mas vulnerabel den comunidad, cu nan a “mir’e, ta sinti’e y kier haci un diferencia, y e gobierno aki no kier haci un diferencia. Al contrario, tur dia mas medida y mas consecuencia pa nos ciudadanonan. P’esey nos a solicita e reunion aki for di augustus pa nos por articula e dolor aki di casi e mita di e pais aki cu ta bibando den pobresa na e momentonan aki.”

Den reunion, presidente tabata Raymond Kamperven debi cu Edgar Vrolijk tabata den funcion di parlamentario miembro di fraccion di MEP, ken a sigura cu parlamentarionan di AVP “ta desconecta completamente for di mundo na unda un pandemia a tuma luga y un guera te ainda ta continua y nan ta tira culpa riba gobierno.”

El a cuestiona diferente accion cu partido AVP a presenta, como e ‘Plan di Rescate,’ pa pueblo keda leu di esaki “pasobra su desaster ta di 30 aña y despues e kier culpa tur hende. E daño financiero ta ireparabel pa pais Aruba, e costo di bida ta mara na esaki tambe,nos imagen internacional ta na werki pa corupcion,” el a comenta referiendo na e lider di AVP, Mike Eman.

Tambe el a lamenta cu e tipo di reunion aki mester a tuma luga, debi cu segun opinion,“no tin niun tipo di contenido.”

Di su parti Misha Raymond di partido Raiz a señala cu pobresa na Aruba a conoce un desaroyo y cu tin hogarnan cu ta sufri financieramente. El a dirigi preguntanan na minister di Labor, Glenbert Croes tocante salario minimo pa ora, con a para cu esey y con leu ta di e proceso aki.

Na minister di Asuntonan Social Rocco Tjon el a indica cu un di e causanan mas grandi pa depresion cu pensamentonan suicida cu sintomanan hancra den trastorno ta stress financiero. “Mirando e desaroyo di finanzas den hogarnan y e preocupacionnan cu tin, con leu minister ta di ehecucion di un plan di suicidio na Aruba y si por duna un update di Family Justice Center.”

Aquanette Gunn di partido MAS a trece dilanti cu comunidad ta confronta tur dia cu e situacion fastioso cu pobresa cu Aruba tin, pero e ta haya importante pa para keto y analisa cu e situacion di pobresa na Aruba no ta un topico trata un biaha so den sala di parlamento. “Pa añanan caba nos ta papiando di un situacion di pobresa. Nos ta papia di purba di bin cu alivio pa asina contraresta, pero no por a logra te dia di awe pa nos bin na un forma structural y sostenibel con pa nos caba cu e situacion di pobresa y cu den 20 aña diferente medidanan a bin tuma luga.”

Su preguntanan ta con a para cu tur e medidanan aki cu a keda imponi riba e pueblo? Kico tabata e aporte di e medidanan aki pa por cuminsa traha na un forma structural pa por contraresta e pobresa cu tin mas di 20 aña ta reina na Aruba, principalmente cu un debe di aproximadamente 6 biyon florin?

Miguel Mansur di Accion 21 a expresa cu esaki ta un reunion cu a tuma luga ocho luna despues di e peticion y ta lamenta con e organo mas halto di sistema constitucional ta funciona, bisando cu e no tabata kier pensa cu e presidente di Parlamento ta mal usa su poder di yama un reunion pa gana puntonan politico. “Unabes Staten ta opera di un forma partidista pasobra tabatin un fecha di corte y te ora ta cumbini un cierto partido mas grandi den coalicion pa pone yama un reunion despues di ocho luna, e ta refleha hopi malo y e ta kita confiansa den instituto aki, ya cu 25% so di nos poblacion ta aproba Parlamento di Aruba, y si nan ta wak historia tin mas evidencia di pakico,” el a comenta.

E reunion aki, cu supuestamente tabata pa trece dilanti solucion, discusion y pregunta tocante costo di bida a bira un tiramento di palabra di algun minister pa otro parlamentario di partido contrario, mustrando e nivel di politica na Aruba.

Durante transcurso di reunion maratonico aki, den oranan di atardi por a mira cu mayoria di e miembronan di AVP cu a solicita parlamento pa bin trece e topico aki den un reunion a bandona e sala. Tambe a haci pregunta na e ministernan presente, y den nan contesta algun di nan a desvia di e tema principal y otronan a contesta al caso.

Ki dia e recorte di 5% ta bay caba pa dunado di cuido a bin pa minister di Salud, Dangui Oduber ken a contesta cu e recorte aki a stop y nan a informa nan caba. Instancianan y dunadonan di cuido a haya mas placa durante aña 2022 den comparacion cu aña 202.

Den e cuentanan anual cu a comparti cu parlamento, minister Oduber a sigura cu hospital a ricibi 3.1% mas a pesar di e recorte, ImSan tambe a ricibi 6.6% mas, gastonan di laboratorio tambe a subi, entre otronan cu el a menciona. “No obstante e situacion dificil cu tabata aden, nos a percura pa haci no solamente inversion den cuido, pero tambe cumpli cu e peticionnan cu tabatin pa percura pa tin e placa disponibel,” el a bisa.

Minister di Labor, Glenbert Croes den un di su intervencion a solicita na Mike Eman pa retira di e partido y di politica y a bis’e “no laga e historia doloroso aki den politica ripiti, unda hobennan ta impedi pa pone nan stempel riba e politica di futuro. Pasobra con cu bin y con cu bay, nan ta e generacion di relevo, nan lo bay percura pa e futuro generacion, pero tambe nan lo bay percura pa e bieunan cu lo ta birando grandi durante e tempo cu nan ta haciendo nan gestion desaroyando nan carera politico sirbiendo nos pais,” el a expresa.

Pa finalisa el a enfatisa cu costo di bida ta doloroso y e hecho cu tabatin tur miembro di Gabinete Wever-Croes sinta den parlamento hunto cu coalicion, “esey ta refleha e seriedad pa locual nos ta atende e realidad doloroso aki.”