E siman aki Parlamento di Aruba lo reuni cu Parlamentonan di Corsou, St. Maarten y Hulanda den cuadro di IPKO (Interparlementair Koninkrijksoverleg) cu e biaha aki lo tuma luga na Corsou. Puntonan interesante riba agenda ta e ‘geschillenregeling’ y nombramento di Gobernador di Aruba.

E ‘geschillenregeling’ ta e areglo ora di disputa entre paisnan den Reino. Presidente di Parlamento di Aruba, Mervin Wyatt-Ras (AVP) ta splica cu: “Esaki ta di importancia cu ora tin diferencia di opinion den Reino un entidad independiente y neutral lo por intermedia pa asina sali for di e disputa. Aruba y e otro islanan conhuntamente a trata ariba un concepto di ley, sinembargo Hulanda tambe tin un concepto y ta keda nos paisnan cu ora dicho ley wordo trata den parlamento Hulandes, nos paisnan lo por bin cu cambionan pa medio di entre otro amienda(nan).”

Nombramento gobernador
Fraccion di MEP ta indica cu lo manda tres parlamentario pa Corsou pa discuti riba entro otro riba e areglo menciona ariba cu ‘riba insistencia di AVP’ ta riba agenda. Un otro tema ‘controversial entre gobiernonan di Aruba y Hulanda’, segun e partido di opcion aki, ta e nombramento di e Gobernador di Aruba. E partido ta bisa cu nan posicion riba esaki ta ‘firme’: “Locual cu Hulanda a haci no tabata bon. Sinembargo tur locual cu a pasa ta culpa y responsabilidad di gabinete Mike Eman.” Y nan ta bisa cu: “Ta tempo awor pa nos pone e confrontacion aki un banda y sigui pa dilanti. Nos pais tin retonan grandi pa enfrenta, nos pueblo no kier mira mas confrontacion ni division.”

Durante su discurso siman pasa dilanti parlamento, e gobernador nobo Alfonso Boekhoudt mes a indica cu e ta spera cu e capitulo di su nombramento ta cera. Sinembargo despues riba e fiesta anual den cuadro di Aña Nobo, por mira cu niun miembro di gabinete Eman II a presenta, locual ta algo inusual y a conduci na comentarionan ‘cu ta falta di respet’ di banda di gobierno.


‘Test case historico’
Diabierna despues di atende cu reunionnan parlamentario na Corsou, Andin Bikker di partido den oposicion PDR lo ta bayendo Hulanda pa un ‘test case’ historico, asina e ta menciona. Esaki tabata un peticion pa respectivamente Aruba, Corsou  y St. Maarten por tin derecho di voto pa e eleccion venidero 17 di maart na Tweede Kamer. “Nos ta bogando pa esaki simplemente pasobra nos a wak cu nos ta wordo hopi afecta door di decisionnan unilateral di e Gobierno di Reino. No tin un ‘geschillenregeling’. Desde 1993 ora cu partido MEP a baha gobierno anto a purba haci un intento pa goberna cu AVP,  a firma un protocol a base di cual a yega na un acuerdo pa mehora e base di gobernacion”, sr. Bikker ta splica.

Den e protocol di 1993 caba tabata tin un articulo den concepto na con ta bay cambia Statuut pa bin cu ‘geschillenregeling’.  Segun sr. Bikker esey ta un otro punto cu nos por constata cu diferente gobierno no obstante tabata tin cada bes 4 pa 8 aña di poder gubernamental, nan djis no por a logra yega na e areglo aki.  “Esey ta pone cu cada bes tin diferencia di opinion cu Reino Hulandes. Cu mester baha cabes unda nan ta keda impone riba bo ora bo no logra convence nan.  Mi ta kere p’esey e test case akinan ta sumamente importante pa pone presion.  Pasobra nos den Parlamento tin awor akinan 7 pa 8 aña bogando pa un ‘geschillenregeling’  anto nos no ta hay’e. E ora nos a pensa cu haciendo e test case aki lo pone mas presion pa por en todo caso hala atencion sea via di otro poder independiente hudicial.”

“Mi ta kere cu unabes nos haya derecho di voto pa eligi miembronan di Tweede Kamer – cu  mi a calcula cu nos tin e ora 3 asiento – bo lo tin bos cual ta hopi importante pa e unidad den Reino Hulandes”, asina sr. Bikker ta kere.

Otro topiconan
Riba e agenda di IPKO 2017 e siman aki tin otro topiconan tambe manera salud, hubentud, enseñansa, castigonan minimo, transporte entre e islanan y tambe e situacion na Venezuela.