Ex minister ta desmenti cu turismo crucero ta bay atras

Algun siman atras Bon Dia Aruba a bishita comerciantenan di kiosco na Waf. Varios di e comerciantenan a comenta cu e cantidad di barconan crucero cu ta bini e isla a baha compara cu añanan anterior.  “Nunca Otmar a bini akinan anto tira un bista. Nos ta biba e cos aki pues nos sa di e dolor,” un comerciante ta comenta. Sinembargo ex minister Otmar Oduber ta desmenti esaki.

Un di e preocupacionnan di e kiosconan segun algun comerciante a vocifera na Bon Dia Aruba, ta cu tin menos barco cu ta bin Aruba pasobra e tarifa pa mara barco na Waf a subi drasticamente. Bon Dia Aruba a puntra sr. Oduber su comentario:  “Esaki no ta klop. E cifranan di barco a crece substancialmente. E tarifanan di barco a subi for di januari 2016 despues di a negosha pa casi tres aña cu e barconan. En berdad el a subi si mi no ta hera for di 3$ pa 8$ cual ta un subida significativo.”

E ta continua cu: “A pesar di ahustacion di e prijsnan cu a tuma luga, na 2016 e cantidad di barco a baha  y esey ta mundialmente – pero e barconan ta birando mas grandi cu mas pasahero riba nan. Pa Aruba ta mas importante cu nos tin mas pasahero cu por cumpra cu nos tin barco cu ta paga nos Wafnan. Na final ora bo conta e som, e ta beneficioso pa nos Ports Authority pero tambe pa comunidad di Aruba.”

Turista no ta cumpra
E comerciantenan di e kiosconan na Waf ta bisa Bon Dia Aruba cu e turistanan di barco crucero cu ta bini Aruba ultimamente simplemente no ta cumpra. Esaki segun e comerciantenan ta pa motibo cu mayoria di e barconan ta Europeo anto nan no ta cumpra mescos cu turista Latino Americano of Mericano mes. Pero segun sr. Oduber, den e rapportnan di BREYA (Business Research & Economic Advisors) cu ta wordo haci door di asociacion di barconan crucero, Aruba ta keda un di esunnan di mas halto caminda cu turista ta gasta. Hasta e crew di crucero ta gasta hopi na Aruba a base di diferente cambionan cu a tuma luga.

 Barco crucero lo ‘kibra record’
Sr. Oduber ta splica cu nos barconan crucero ta bay kibra e record di tur aña alcansando casi 3 pa 4 miyon di bishitante cu lo ta yegando den e aña aki. “2016 ya caba a conoce un crecemento signicativo compara cu e añanan anterior. Anto 2017 ta premira di hasta kibra record di 2013 cual tabata un aña cu tabata unico.” E entrevista cu sr. Oduber a tuma luga siman pasa. Ayera e autoridad di waf APA a manda su pronostico pa 2017 unda tambe nan ta papia di un crecemento cu lo bira un ‘record’.