Aruba tin su propio Vermeer y su trabao no ta menos impresionante cu e maestro Hulandes. Ta papia aki di Rob Vermeer (77), kende por a nace na Hulanda, pero cu destino a trece na Aruba, cu a bira su cas. E siman aki, e negoshi cu Rob Vermeer a lanta, Checkpoint Color ta cumpli 50 aña y tin un exposicion grandi di tur e añanan di fotografia. Pero e storia di Rob Vermeer ta mes interesante cu e miles di potretnan cu el a saca durante curso di su carera.

Rob a nace na Zwanenburg Hulanda, y tabatin un omo ta biba na Corsou. Tabata despues di e di Dos Guera Mundial y su tata, en busca pa un miho futuro, a dicidi pa bay Corsou. El a sali prome cu su casa y yiu homber chikito, pa prepara nan bida nobo. Pero e biahe riba e barco di carga tabata hopi pisa y tata di Rob a haya pulmonia y a fayece na e isla. Asina mes, su viuda, Elisabeth a tuma e decision pa bay Corsou cu su yiu chikito.

Algun aña despues, Elisabeth Vermeer a haya trabao como cuidado of ‘manager’ di e edificio cu awor ta Bestuurskantoor. E tabata conoci como e Pasangrahan (palabra Maleisio pa ‘guesthouse’). A traha e edificio pa un luga di hospedahe pa oficialnan y un Kazerne y despues el a bira Bestuurskantoor. Rob a pasa su infancia den e edificio ey, memey di tur e actividad, unda el a experiencia bishitanan oficial. Ora cu ehecutivonan di Corsou tabata bin Aruba, nan tabata keda eynan. Ehecutivonan Hulandes cu mester a bin Aruba pa un periodo cortico, tabata keda eynan y kizas e mas interesante, Prins Bernhard tambe a hospeda eynan. Y un mucha homber chikito tabata testigo di tur, danki na e trabao di su mama.

“Mi mama mester a percura pa e luga ta na ordo. Pa estadia di Prins Bernhard mester a presta cama, ya cu e luga no tabata pa un bishita real. Mester presta cama, stoel y otro mueble. Y. dia cu Prins Bernhard mester a bay for di Aruba, a debolbe tur e mueblenan na nan doñonan. Pero avion di Prins Bernhard no por a lanta y e Prins mester a bolbe, den un camber bashi. E no tabatin nada, pasobra hasta su maleta a bay. E storia ta cu e mester a fia hasta skeiro di djente.” Ora cu e edificio a bira Bestuurskantoor, Elisabeth Vermeer a bay traha na Biblioteca te ora cu el a bay cu pensioen.

Pero tur e experiencia special ey a yuda forma Rob, kende a haya interes den cahera y fotografia den su adolescencia. E tabata atende Colegio Arubano y tabata saca potret di famia y amigo. Cu 15 aña el a cuminza laba y engrandece su mesun potretnan. E inspiracion tabata e omo na Corsou, pero tambe na Colegio Arubano cu Meneer Stolwijk, un fotografo entusiasma. Despues di a caba Colegio, Rob tabata considera pa bira veterinario, pero no a gusta e idea di pone animal drumi. E otro opcion pa bira piloto no tabata posibel pa motibo di e hecho cu Rob tabata usa bril. Pues, a keda su hobby, cu ta fotografia y asina el a bay Hulanda pa studia fotografia.

No tabatin duda cu e hoben fotografo lo a bolbe Aruba despues di a caba cu su estudio. Aruba ta su cas y su mama tabata biba aki ainda. El a cuminza traha cu algun di e studionan cu tabatin na Aruba y tabata saca potret di bruid y di hende, y den su mesun oranan, tabata saca potret di naturalesa di e isla. Durante curso di tempo, e tabata haya peticion pa potret comercial. Rob a cuminza haya reconocimento pa su trabao.

Pero, e tempo ey, ainda mester a manda tur negativo pa desaroya den exterior si tabata kier potret na color. Y asina e pensamento di su mesun negoshi a cuminza. Pero e hoben no tabatin e capital necesario, pues mester a bay banco y Rob ta conta con e tempo ey, Aruba Bank a duna tur cooperacion necesario. Locual a yuda tambe cu algun famia di Aruba a kere den dje y a yuda cu e financiamento di Checkpoint Color. E confianza, e cultura di sostene otro y permiti un hoben fotografo yega na su mesun negoshi ta otro parti di e storia bunita di Aruba, e Aruba cu Rob a stima semper.

E mesun spirito di colaboracion aki a sigui awendia, pasobra tabata artista Natusha Croes, considera manera un yiu pa e famia, kende a convence Rob pa expone potretnan cu a saca den su carera y e añanan di Checkpoint Color.

Pues e exposicion cu ta habri diaranson, 3 di augustus ta celebra mas cu djis exito di un negoshi di desaroya potret cu a logra sobrevivi e era di digitalisacion y e retonan di un Caya Grandi cu a mira mayoria negoshi cera nan porta.

Rob Vermeer a sigui su instinto pa lanta su negoshi di imprenta potret y hunto cu su casa Marjorie, kende tabata traha cune, a expande Checkpoint Color den un establecimento cu a bira sinonimo na Aruba tambe. Ta ken no a bay saca nan potret pa rijbewijs, paspoort na Checkpoint? Y no a participa na e glamour shots? Y hiba nan tesoro riba film pa imprimi? Y aunke digitalisacion a impacta e negoshi di imprimi potret, e habilidad di reinventa pa sigui cu tempo ta algo cu ta den sanger di e Vermeers.

Awe, Fernando, yiu di Rob y Marjorie ta encarga cu Checkpoint Color cu ta sigura cu e potretnan den telefon of riba e camara digital por bira un cuadra espectacular of cu e potret bieu di antepasadonan ta haya un bida nobo.

Rob Vermeer ta contento di mira un generacion nobo di fotografonan cu mescos cune, sa di combina potretnan comercial cu nan propio creacion.

Si tin un conseho cu e fotografo profesional aki tin ta pa semper corda cu e persona ta central. E ‘background’ di un potret mester ta esey. E potretnan di personanan cu ta perdura ta esnan cu ta refleha e personalidad unico di cada individuo. Y esey ta locual, pa Rob Vermeer, ta e esencia di fotografia.

LEAVE A REPLY

Please enter your comment!
Please enter your name here