Hotelnan pero tambe e companianan di watersport situa na Eagle Beach mes no ta mucho positivo riba e maneho nobo di gobierno pa regula e beachnan riba e strip di Bushiri pa Arashi. Nan ta sinti cu tin mas desordo, insiguridad y daño na e beachnan.

E kehonan ta bin for di Amsterdam Manor y tambe La Cabana. Nan ta sinti cu e molester di e botonan y jetski nan a aumenta cual ta stroba nan huespednan. Den un combersacion cu e hefe di siguridad di La Cabana e ta conta cu desde e ‘beach policy’ nobo mas luganan di watersport a bin Eagle Beach cual tin su impacto riba e beach cu semper tabata mas keto y trankilo cu esun na Palm Beach.

E ta mira cu tin hopi mas luganan cu ta huur jet ski y cu a plama riba e beach, mientrastanto antes nan tabata pone e jet ski nan den e skina na Baranca Plat. Tambe e ta mira mas parasol y stul canti lama, cual asina ta duna un impresion cu Eagle Beach ta bayendo rumbo di Palm Beach. Un par di siman pasa un noticia internacional a capta hopi hende su atencion pa motibo cu tabata trata di un lista di beachnan den Caribe pa turista evita como cu nan ta demasiado druk. Nan a menciona Palm Beach como number 1 riba e lista aki.

E presion riba nos beachnan ta hopi grandi. Pa regula esaki pero tambe pa regula e cantidad di actividadnan di entre otro watersport y tambe pa caba cu e situacion unda no tabatin un liña den gobierno pa entre otro duna permiso, a bin e ‘beach policy’. Un plan cu gobierno a traha añanan largo riba dje como cu tabatin un situacion hopi dificil crea y oposicion fuerte di e companianan di watersport pero tambe di banda di hotel.

Miembro di e team di management di Departamento di Infrastructura (DIP) Isabel Dammers ta splica cu finalmente nan a logra aña pasa pa finalisa e maneho. Sinembargo e ehecucion ainda ta trece basta dificultad. Un di e problemanan ta cu nan a manda tur compania un cuenta unda nan ta informa riba nan derechonan, e espacio riba beach cu nan mag di uza y cuanto nan mester paga. “80% no a bay di acuerdo y a cuminsa un caso (LAR) contra gobierno.” Algo cu sra. Dammers a bisa cu nan tabata spera. Aunke tin cu despues di algun ahustacion finalmente a bay di acuerdo.

Moratorium
Pa motibo cu e proceso di manda e cuentanan a tarda, no por a cuminsa controla e beachnan. Asina sra. Dammers ta bisa cu nan sa cu tin luganan cu ta huur sin cu nan tin permiso. Nan por spera pronto un bishita. E ta nenga si cu gobierno a otorga mas permiso na mas compania. E cantidad ta keda mescos cu na 2009 y tin un moratorium. Locual si e ta admiti ta cu mester bin un moratorium tambe pa jetski. Esey ta algo cu mas tanto ta cay bou Directie Scheepvaart pero ta algo cu DIP lo bay duna como conseho si.