Nos ta continua e asunto di e trato pa stranhero cu ta bin Aruba pa traha den jobnan cu ta exigi un estudio superior, y cu den hopi caso nos no tin hende pa yena e puestonan habri aki. Nos no a trece dilanti ainda e contradiccion grandi cu nos ta mira den maneho di gobierno. Di un banda nos ta mira cu e departamentonan cu ta maneha peticion pa permiso di residencia relaciona cu trabao, Dimas y DPL, ta parce di ta traha a base di mas tanto posible tene hende for di nos isla, mientras cu di otro banda un di e obhetivonan di e mesun gobierno, den cuadro di e busqueda di diversificacion di economia, ta pa crea actividadnan economico cu ta produci mas cupo di trabao di calidad halto.

Esaki lo contribui considerablemente na nos economia, ya cu ta trata di profesional cu salario halto, cu ta aporta hopi na e poder di compra local. Nos por apoya e obhetivonan aki, aunke nos por discuti riba e posibilidadnan real di e alternativanan aki, cu ainda a keda na pensamento general, na lugar di yega na identifica sectornan cu por significa algo concreto pa nos. En todo caso, diversificacion economico ta riba nos agenda pa varios decada caba, sin cu realmente nos ta mira un avance.

Sin embargo, si en general bo kier promove un desaroyo positivo como gobierno, ta necesario pa acopla bo maneho den practica di tur dia na e obhetivonan aki. Si no haci esey, manera ta sucediendo actualmente, bo ta haya cu ni e empresanan existente ta haya loke nan mester, pa por maneha nan operacion di tur dia den e actual situacion economico. Lo bo por a spera cu net den e situacion di crisis aki, envez di stroba hende profesional clave drenta, lo a diversifica e maneho cu ta hibando, haciendo distincion entre e profesionalnan clave y no disponible riba mercado laboral local, y e demas funcionnan pa cual si, den e actual situacion di crisis sigur, tin hende disponible, incluyendo training special pa hende cambia di trabao. Nos ta di acuerdo cu un maneho asina; e problema ta cu nos ta mira solamente papiamento pero nada concreto. Mientras tanto nos ta mas di seis luna mas leu den e crisis aki y ainda e unico cos cu nos ta mira ta un falta total di implementacion di maneho visible. E consecuencianan ta grandi caba pa e empresanan cu a logra mantene nan mes riba pia a pesar di e virus, corda pa un empresa cu ta desea di cuminza algo completamente nobo, y ta bay dal su cara den e muraya di no comprension di e departamentonan menciona.

Den tur esaki, nos no por dirigi nos mes solamente na e departamentonan, cu ta funciona pa añas caba di manera deficiente, pero ta necesario pa haya sa di e mandatarionan envolvi ta kico nan tin pensa di haci, pa pone un fin na e practica cu nos a describi den nos edicionnan di ayera y awe, unda ta bin resulta cu hasta e ambtenaarnan Hulandes cu ta bin traha aki, ta pasa un caminda di cruz pa haya e asuntonan pa nan famia regla, mientras cu ta asuntonan cu por keda regla den cuestion di algun dia. Nos no a haya un contesta valido di e directora di Dimas ta pakico esey simplemente no ta sucede. Pero, fuera di e servicio drechi cu e ciudadano mester haya, tin algo otro cu ta hunga un papel importante, y esey ta cu mas largo procesonan ta tarda, mas grandi e peligro di corupcion ta bira. Ta ora ta desespera hende cu procesonan interminable, unda cu cada biaha mester bin cu un otro papel cu e biaha anterior nan no a pidi, ta yega un momento cu un persona ta bira susceptible na pago di soborno. E forma mas efectivo pa combati corupcion ta mantene procesonan cortico y transparente, unda e ciudadano por haya un vista di con su peticion ta bay. Y pa esey no mester di warda te ora bin otro ronda di digitalisaccion, hopi por haci caba cu e actual sistemanan, ta e voluntad pa traha cu un otro mentalidad ta e problema. Y tanten e mandatarionan ta keda duna ‘la vista gorda’ na e asuntonan aki, nada lo cambia, pero e ora no mester di keda haci propaganda pa economia di conocimento, si esnan cu actualmente ta den necesidad pa e tipo di personal aki, no por haya un alma den e dos departamentonan aki cu por mustra comprension pa nan situacion. Por cierto Bon Dia Aruba a haya reaccion di parti di empresario cu ta conta nos cu nan ta contento cu tin un medio ta dedica atencion na e problema aki, unda nan tur ta rechaza e posibilidad di bin dilanti y conta nan storia, pasobra nan tin miedo di e venganza di e departamentonan si nan duna cara den publicidad. Esey ta e caso tambe di e empresa y e empleado cu nos a entrevista pa nos edicion di ayera. Nos no por bisa cu nos a keda sorprendi cu e miedo aki, pasobra e ta algo di hopi aña caba. En todo caso, e pregunta na gobierno ta cu si ta asina nan kier bay desaroya ‘economia di conocimento’.

 

LEAVE A REPLY

Please enter your comment!
Please enter your name here