Diahuebs dia 8 di augustus ultimo, husticia di Ecuador a ordo prizon preventivo contra e ex-presidente Rafael Correa, pa presunto implicacion den un caso di soborno cu funcionarionan publico pa haya contractnan cu e Estado. E corant Spaño El Diario ABC a informa cu dos muhe ta deteni, nan tabata clave pa e medida cu Hues nacional Daniella Camacho a tuma, despues di e solicitud di e Fiscal General Diana Salazar.

Su asesor Pamela Martinez y su assistent, Laura Teran, a entrega pruebanan suficiente pa Husticia y pa Camacho por ordena e prizon preventivo. E corant Spaño ta indica cu e dos ex-funcionario ta colabora cu e autoridadnan a cambio di por baha nan castigo.

Asina mes, despues di un investigacion di Husticia, a haya e-mail y un documento di Excel den e computer di Teran. Autoridadnan a logra obtene e dato di e empresanan, registro di contribuyente y telefon di contacto, despues di e recuperacion di mas di 60.000 documento.

Di e documentonan ey por keda comproba cu e compania contratista tabata ‘entrega e placa den efectivo of cu factura pa paga e gastonan di Alianza Pais’ y tambe nan tabata financia e fiesta di hacimento di aña di e funcionarionan.

Te awo, Correa cu tin mas di un dozijn di file habri, no a ser condena pa un tribunal na Ecuador, y ta nenga di regresa na e pais pa motibo cu e ta considera cu e ta victima di un persecucion politico di banda di su sucesor, Lenin Moreno, cu kende e no ta papia desde mas di dos aña pasa.

 

LEAVE A REPLY

Please enter your comment!
Please enter your name here