Ecuador, e socio mas chikito di e Organisacion di Pais Exportador di Petroleo (OPEC), lo bandona e organisacion entrante 1 di januari 2020, asina ministerio di Energia y Recurso Natural No Renovable a anuncia.

“E decision tin su raiz den e asunto y retonan interno cu e pais mester asumi, relaciona cu sostenibilidad fiscal,” e ministerio a indica den un comunicado den cual ta señala cu e medida ta alinea cu e plan di gobierno, lidera pa Lenin Moreno, “di reduccion di gasto publico y generacion di entrada nobo.”

Cu e decision e pais ya no lo tin cu cumpli cu cierto cuota di produccion cu e mester respeta ora e ta pertenece na e organismo aki. E medida tambe ta representa un marcha atras di e orientacion di Rafael Correa tabatin pa loke ta politica petrolero.

Ecuador a drenta OPEC na 1973, na 1992 a dicidi di suspende e membresia Ecuatoriano, pero a bolbe na participacion activo desde 2007 te e fecha aki.

Ecuador ta produci diariamente 550.000 bari di petroleo, loke ta haci e pais e socio mas chikito di e organisacion. E recortenan adopta pa OPEC aña pasa a afecta entrada di su gobierno loke por a provoca decision di gobierno na Quito pa bandona e organisacion. Petroleo, hunto cu recaudacion di impuesto, ta e principal fuente di entrada di e nacion.

A tuma e decision un poco prome cu gobierno ta presenta na Asamblea Nacional un pakete di reforma economico y laboral como respuesta na demanda di Fondo Monetario Internacional (IMF) pa reduci su deficit a cambio di un pakete di credito di 4.200 miyon dollar.

 

LEAVE A REPLY

Please enter your comment!
Please enter your name here