Parlamento a aproba cambio di ley di salud publico unanimemente

Den un ambiente di bastante consenso, parlamento ayera a trata y aproba, cu unanimidad y sin votacion personal, e cambio di ley cu a pone e edad na cual por bende productonan di tabaco na 21 aña, di e 18 aña cu e tabata.

Aunke e ambiente relaha a contribui finalmente na e aprobacion di e cambio di ley, den varios aspecto no a tene cuenta cu e consideracion y obhecionnan cu Raad van Advies (RvA) a trece dilanti den nan evaluacion di e proyecto di ley aki, di Limitacion di Producto di Tabaco. Nos no a ripara tanto cu e partidonan a tuma nan critica na serio. RvA ta trece na memoria cu nan a duna nan evaluacion riba e ley aki caba na april 2015. Despues a aproba e proyecto di ley inclusive cambio, y a keda publica na septenber 2016. Sin embargo, RvA por constata cu cuatro aña despues ainda e ley no ta na vigor loke pa RvA no ta parce “un proceso legislativo eficiente, y cu ta lanta e pregunta kico ta e motibonan tras di esaki”.

RvA tabatin observacion tambe pa e alcance di e ley, cu a inclui tambe e productonan di tabaco manera e aparatonan electronico cu ta produci vapor pero no ta kima tabaco, y productonan mezcla cu cierto tipo di especie. Den e splicacion ta motiva e escogencia aki pasobra den ultimo añanan e uso di cigaria electronico entre otro lo a aumenta fuertemente bao di hubentud, pero ta bisa di biaha cu no tin informacion disponible di e uso na Aruba di e medionan aki. Ta bisa tambe cu e porcentahe di humador na Aruba lo ta mas abao cu den otro paisnan, manera Merca y Hulanda, pero cu a resulta cu na Aruba tin humamento den casi tur categoria di edad, refiriendo na un investigacion cu ta data di 2012. RvA ta mustra riba e falta di analisis y investigacion mas reciente di Aruba mes, riba cual lo por a basa e prohibicion di e uso di e tipo di producto di tabaco aki, aumentando e edad te 21 aña. RvA aki ta toca un debilidad recurente den legislacion na Aruba, unda na mas ocasion lo a spera investigacion mas al caso cu ta sirbi como base firme pa e maneho cu ta propone cu e cambio di ley.

RvA ta puntra nan mes si den cuadro di un maneho integral di prevencion a considera usa otro medida pa limita consumo di cigaria, manera aumento di accijns y ta considera importante pa dedica atencion na esaki. Tambe e organo consultivo constitucional ta mustra riba e mencion den e splicacion di e ley di e intencion di mas tanto posible scucha ‘stakeholders’ manera gremio empresarial, organisacion sindical, transporte publico y horeca, y cu mientras tanto a tuma lugar un promer encuentro. RvA ta puntra si no lo tabata mas logico si e tipo di consulta aki lo a tuma lugar previo e presentacion di e proyecto di ley aki, pa por a incorpora posible efectonan anticipa y pa busca ‘draagvlak’ ( base di apoyo) pa e cambionan proponi.

Tambe RvA tabatin basta pregunta tocante e supervision y e instrumentonan disponible pa mantene implementacion di e ley. E Organo ta adverti cu si no tin control berdadero y efectivo riba cumplimento cu e prohibicionnan, lo no logra e resultado. En vista di e ampliacion di e tareanan di supervision cu ta constata den e propio proyecto di ley, RvA ta haya cu e proyecto di ley no ta duna suficiente vista ta con ta bay eherce e tareanan proponi cu e prohibicionnan, sigur tambe pasobra na Aruba ta trata di un gran cantidad di negoshi cu tin permiso pa bende producto di tabaco. Tambe pa loke ta control riba humamento den auto den presencia di menor di edad RvA ta señala un problema practico pa constata esaki, debi na por ehemplo e glasnan getint di hopi vehiculo.

RvA tampoco a keda contento cu e descripcion cu gobierno a duna den e splicacion di e consecuencianan financiero pa Pais Aruba, ya cu esaki no ta cuadra cu e exigencianan di articulo 6 di e Ordenanza di Conatbilidad (Comptabiliteitsverordening 1989 (AB 1989 no. 72). Ta trata entre otro di e gastonan relaciona cu duna informacion na publico. Pa loke ta e gastonan cu lo aumenta relaciona cu e actividadnan di mantene supervision y control tambe RvA ta haya cu no por simplemente bin cu e observacion cu “den practica lo mester resulta di ki manera por logra un supervision efectivo y eficaz”. Lamentablemente e debate (limita) no a toca e aspectonan treci dilanti extensamente pa RvA, loke ta haci cu e aspectonan importante di con finalmente e ley lo por haya un implementacion eficiente, a keda colga den aire.

Realmente sorpresivo tabata cu, despues cu fraccion di AVP a bin cu un mocion encuanto e Plan Nacional di Prevencion, di repente e ministro encarga cu Salud Publico a reacciona den segunda tanda cu e declaracion cu e plan lo por ta disponible pa Staten inmediatamente via digital. Aunke di un banda por aprecia e gesto, cu a haci e mocion opositor innecesario, e pregunta keda cu si esaki ta e manera cu un gobierno mester ta dunando parlamento informacion na momento cu ta tratando hustamente e tema corespondiente. Di otro banda ta parce tambe cu aki tin un tarea pa e propio parlamento pa ta mas exigente cu peticion di documentacion cu nan ta haya necesario pa nan trabao como legislador.

E debate ayera a conduci tambe na e tema mas general di salud publico en general, y e efecto preventivo cu ta spera di e limitacion di benta di cigaria cu hobennan. Esaki tabata abarca entre otro e efecto riba e crisis di Covid-19, cu ta relaciona directamente cu e condicion pulmonar di cada pacient. Humamento por ta un factor di peso den esaki. Riba e tema aki e mandatario a mustra riba e importancia di e tercer ‘booster shot’ contra Covid cu ta importante pa henter e grupo di riesgo aki. Tambe a haci corectamente e conexion cu otro precondicion importante, cu ta diabetes y sobrepeso y obesidad. Mientras cu aki por a spera mas critica riba e nivel abao di informacion di parti di gobierno, parlamento mas bien a tuma e ocasion pa repasa e logronan – parcial – cu cada partido a registra recientemente o den pasado. Poco atencion a bay na e situacion real, unda e inversionnan actual den prevencion gubernamental ta minimo y no ta mira tampoco un maneho consistente den esaki. Talvez un di e temanan riba cual Staten por bolbe dentro di poco ora por discuti e plan nacional di prevencion te cu 2030 cu e mandatario a caba di priminti.

Mayor di edad?

Loke a keda en general ta e situacion un poco controversial, unda un hoben di 18 aña por bay servicio militar, por vota den eleccion pa esun di su preferencia, por ser procesa penalmente como adulto, por cumpra cuanto licor cu e ta desea, pero no por cumpra un paki di cigaria… Kico ta e proximo paso? Cu benta di alcohol tambe ta bay 21 aña?

LEAVE A REPLY

Please enter your comment!
Please enter your name here