Edificio di 26 piso a pega candela y cay den otro na Sao Paulo

Un edificio na Sao Paulo, cu antes tabata pertenece na cuerpo policial federal, pero tabata oficialmente desocupa pa varios aña, a pega candela banda di 1:30 di marduga di dialuna pa diamars. A bin resulta cu e edificio, di 26 piso, tabatin mas di 90 famia ta biba aden, sin permiso. Pa motibo di esaki no tin registro oficial di cuanto persona lo tabata den e edificio na momento cu e candela a cuminsa.

Testimonio di cuerpo di bombero ta bisa cu nan a localisa un persona na e piso mas halto, pero prome cu a logra salb’e, e edificio a cay den otro y no a mira e persona mas.

Poco despues, a bin mas claridad cu e situacion por tabata dramatico. Lo tabatin como 90 famia, na total cerca di 250 persona, cu tabata biba den e edificio. No ta conoci ainda cuanto persona por tabata den e edificio ora e candela a cuminsa.

E candela a afecta tambe dos edificio na banda y parti di un misa luterano, yama Martin Luther, un di e prome parokianan evangelico na Sao Paulo, inaugura na 1908.
Cuerpo di bombero di Sao Paulo tabatin 160 persona trahando na e lugar di e desastre, cu 57 vehiculo, y un helicopter. Otro entidadnan manera Defensa Civil y Compania di Ingenieria di Trafico tambe tabata na e sitio. Defensa Civil a cuminsa haci un registro di e famianan cu a logra sali di e edificio, pa organisa e ayudo na nan.

Pa e gobernador di estado Sao Paulo, Marcio França, e candela aki ta demostra e riesgonan grandi di edificionan ocupa di forma iregular. “Loke nos tin cu haci ta convence e hendenan pa no biba di e manera aki. Y e hendenan cu ta kere cu nan ta yudando, resistiendo y purba logra cu nan por keda den e tipo di edificio aki, ta yuda causa un tragedia manera esaki.”

E edificio cu a cay den otro, den menos di dos ora, tabata di gobierno federal. Por lo tanto, segun França, pa saca e hendenan cu forsa, ta gobierno federal lo mester a haya autorisacion hudicial. Pero segun França, gobierno federal no a hacie pasobra nan no sa unda pa bay cu e hendenan.

Riba pregunta di prensa tocante e forma cu gobierno estatal y gobierno municipal (‘Prefeitura’) por yuda e personanan cu tabata biba den e edificio, el a afirma cu lo ofrece lugar di keda na e famianan.

(fuente:JornaldoBrasil)