Nos mester haci escogencia berdadero?

Awor cu nos a yega den awanan un poco mas trankil, despues di e careda pa entrega presupuesto na tempo a pasa, tin un poco mas tempo pa reflexiona riba otro asunto cu merece nos atencion. Manera e direccion cu nos desaroyo socioeconomico lo mester tuma den e proximo añanan. Realmente e palabra aña den e sentido aki no ta esun mas corecto, pasobra lo ta miho pa papia di decada. Ora nos ta contempla futuro, nos mester wak y analisa hopi mas leu cu solamente e periodo di gobernacion aki, o talbes tambe e proximo. E asuntonan fundamental cu ta exigi nos atencion ta exigi di biaha pa nos papia di termino largo. Kico asina esey ta?

Pa nos, un di e esunnan mas esencial ta e uzo racional y corecto di e superficie di cual nos ta dispone. Cu ta alrededor di 190km cuadra. Mas nos no tin y nos no ta haya mas tampoco, esey ta sigur. Anto nos mester ta hopi consciente di e hecho cu tur cos cu nos ta haci, ta algo cu tin su fecha di termina. Esaki ta principalmente e caso ora nos ta papia di recurso natural cu nos tin. Tuma por ehemplo un di e ehemplonan mas dañino pa nos paisahe, e explotacion di santo y piedra, cu ta causa daño ireparabel na nos pais, cobando loke nos ta yama yaga den cara di Aruba cu nos no por drecha nunca mas. Claro cu lo tin esunnan cu ta bisa cu na tur pais bo tin explotacion di loke tin den subsuelo, kico anto ta e problema cu aki tambe tin mineria?

E contesta ta cu na paisnan mas grandi ta posibel haci e actividadnan aki y ainda resta bastante paisahe no afecta. Den un luga asina chikito manera Aruba e ta directamente den nos cara, y hasta ta asina cu e explotacion por tin molester directo pa habitantenan di cierto parti di nos isla. Loke ta efectivamente e problema na Sero Cristal y vecindario actualmente. Pero ta husto cu nos ta laga un grupo di ciudadano bringa un bataya den corte cu realmente ta un asunto di vision, strategia y planificacion a largo plaso cu ta tarea di (tur) gobierno? Ta normal cu grupo di ciudadano mester hiba nan caso corte pasobra no tin un decision fundamental tocante e siguiente pregunta: Ta te ki dia nos ta kere cu nos por keda explota mineria abierto riba e pida baranca aki, si den mesun rosea nos mes ta alaba turismo como e principal actividad economico pa hopi decada nos dilanti? Si di tur manera e recursonan aki, di santo y piedra, ta limita y lo caba dentro di poco, ta pakico anto tin un miedo asina grandi pa yama e cos aki na su nomber y simplemente dicidi cu conservacion di paisahe na e momento aki ta mucho mas importante cu sigui explota mineria abierto te cu no por mas… y haya nos ta importa e materialnan aki, cu ta necesario pa construccion, di tur manera, for di exterior? Y pa colmo, acaso no ta asina cu nos pa añanan ta importa material di construccion di exterior caba? Kico anto ta e problema pa duna e companianan minero e oportunidad pa reorienta nan negoshi y pasa gradualmente completamente pa importacion di material?

Nos sa cu den e discusion aki lo trece dilanti e bentaha di un prijs mas faborabel si uza e material produci aki mes. Esey por ta asina, pero den e prijs ey no ta hinca e prijs cu nos colectivamente ta paga pa un paisahe destrui, cu no ta sirbi ni pa nos, ni pa e bishitantenan cu ta bin aki pa relaha y disfruta di.. e paisahe destrui? Nos no a uza e palabra magico ainda di un economia sostenibel pero ban hinca esey tambe den wega. Ki tempo a yega di tende cu e tipo di mineria aki, cu ta haci daño pa eternidad, ta sostenibel? E problema cu hopi biaha nos ta discuti uzando e palabranan caro aki, sin cu realmente nos ta aterisa y yama e cosnan na nan nomber. Ta bira tempo pa nos cuminsa haci esaki y nos lo ripara cu den hopi aspecto e ta haci nos bida hopi mas facil. Esey ta conta pa e refineria tambe; igual e situacion den e zona di reserva forestal di mangel (mangrove pa esunnan cu a lubida Papiamento), unda nos ta topa cu e ironia cu esun cu ta menasa di destrui, a bolter e asunto completamente, presentando su mes awor como e futuro cuidado di e area… Really?

Ta mescos cu den e caso di e mineria aki nos yega na e conclusion cu coba mas tanto buraco pa saca santo y piedra ta bon pa nos tur, pasobra mas buraco tin, mas luga nos lo tin pa benta sushi afo… Di e manera ey talbes nos ta yega na un negoshi sostenibel di deshaci di desperdicio, sin cu mester contempla otro opcion, manera reciclahe, gasificacion o exportacion di material. Nos ta spera di curason cu hamas nos lo yega na experimenta semehante cinismo. Palabra ta na gobierno den e caso aki: actua!