‘Club Muchanan Sabi’ di Edselyn Figaroa ta existiendo pa 16 aña caba, pa asina pa duna les y siña muchanan canto, baile y compone nan mesun cantica, pa nan por desaroya den nan talento musical.

E grupo ta parti den dos, e prome ta di 3 pa 7 aña di edad, dialuna y diamars. Aki e muchanan ta haya les den un manera di wega. Grupo dos ta di 8 pa 13 aña di edad, diaranson y diahuebs. Muchanan den e grupo aki ta haya un ora di canto for di Figaroa, y un ora di canto combina cu baile for di otro instructor.

Despues di esey, nan tin 30 minuut cu nan ta haya ‘open mic’, cual mayoria di biaha nan ta filma pa pone esaki riba rednan social, caminda mucha tin oportunidad di expresa nan mes. Na e momento ey e mucha por conta, practica nan spreekbeurt, bisa un poesia, canta, baila of por haci pregunta, tambe nan por trece topico dilanti y papia over di esey.

Tur diaranson, Figaroa ta duna 1 ora extra pa muchanan cu limitacion, pa nan por siña articula. Di e forma ey, tambe nan ta uni den grupo y sa con pa anda cu nan. “Tur dia nos tin muchanan di Imeldahof parti meymey di tur e dia di training.”

Actualmente e tin 70 mucha cu ta atende e club, cu ta parti den tur dia. E muchanan ta baila, canta y siña. E ta bisa cu tur e muchanan ta sinta hunto. No ta haci excepcion y ningun mucha mag hari otro mucha, sea cu limitacion of no. Tambe ta bisa cu tur tin respet pa otro. “Nan no ta worry. Nos ta un famia, e ta normal aworaki, nan no tin discriminacion. Tambe tin muchanan cu limitacion cu nan tiki luna cu a duna nan presentacion di cantamento.”

Tambe e cariño cu nan ta duna na otro den e club. El a splica cu tin un caso di un mucha muhe a bira malo, y e famia tabata mester di fondo pa por cubri algun gasto. E muchanan mes a bin cu idea pa traha cuminda y otro cosnan pa por yega na e fondo pa yudansa.

“Esey pa mi ta nifica cu mi ta haciendo mi trabou. Mi ta inspira nan bon persona pa nan por sigui nan soño y kere den nan mes”, Figaroa a bisa. E ta haci esaki pa muchanan por siña letter mas facil, pa nan por desaroya nan mes pa canta, y nan mes por skirbi/compone cantica for di edad trempan.

Figaroa tambe a skirbi buki di festival di San Juan pa mucha, y skirbi buki tocante abuso sexual, cu ta den proceso pa keda cla y por wordo bendi. Sinembargo, e ta splica su interes pa siña mucha ‘ta un reto pa mi’, pero e gusta busca solucion pa situacion asina. Figaroa no a studia con pa traha cu mucha, ni cu mucha cu limitacion.

E gusta traha cu mucha en general, sea nan ta limita of no. “Mi gusta ambos, tur dos ta un reto pa mi. E caracter di cada mucha por ta dificil, pero e amor cu nan ta duna bo bek ta sinti dushi. Y pa esey mi ta agradecido”, Figaroa ta expresa.

 

LEAVE A REPLY

Please enter your comment!
Please enter your name here