Departamento di Salubridad Publico (DVG) y organo di seguro medico general AZV ta alerta tur hende cu lo biaha afo durante e temporada di vakantie aki, pa cera un seguro di biahe prome cu nan ta biaha. Ya cu nos seguro medico general no tin cobertura den exterior. Riba bo carchi di AZV, bou bo potret, ta aparece e leyenda cu esaki ta solamente valido na Aruba.

Segun Communicatie Voorlichting di AZV, Joost van de Kamp, a yega di presenta caso di hendenan di nos comunidad cu a confronta problema di salud ora cu nan ta afo; y e problema ta cu e seguro di AZV ta solamente vigente na Aruba y no tin cobertura ora bo ta afo. El a bisa cu den e ley ta masha cla cu como organo ehecutivo, nan ta ehecuta e ley di AZV, y nan no por cambia e ley. Den e ley no tin espacio pa AZV cubri e gasto di cuido medico cu ta wordo haci den exterior sin aprobacion previo di AZV mes. “Si bo ta afo, cumpra bo seguro di biahe!”

Van de Kamp a bisa cu ta wordo registra entre dos pa tres caso pa aña di hendenan cu ta wordo interna den exterior, y AZV no por haci nada cu esey. “E ta hopi fastioso, pero ta keda cada hende individual of cada famia pa zorg tin un seguro di biahe”, el a declara na Bon Dia Aruba.

P’esey ta importante cu ora bo ta sali pa exterior pa cualkier motibo, ya sea pa negoshi, actividad deportivo, of vakantie, mester regla un seguro di biahe pa wordo trata y despues bin Aruba pa sigui e tratamento. Igualmente, ora cu un hende ta bay exterior pa tratamento via AZV, tambe ta necesario pa tin un seguro di biahe. Van de Kamp a aclaria cu por ehemplo nan por manda un hende pa atende cu malesa di curason den exterior, pero si bo ta sufri un accidente y kibra bo pia, e no ta cay bou areglo di AZV. E mesun cos ta conta pa e acompañante medico di e pashent pa cualkier eventualidad.

Tin cierto areglo si pa e pashentnan cu ta bay dialisis tur siman na Aruba. Tin manera via AZV pa un hende cu ta hayando dialisis pa e bay cu vakantie. E persona mester regla esaki cu e centro di dialisis na Aruba pa asina e suma cu AZV ta paga na ImSan of hospital, por wordo canalisa pa e instituto di dialisis den exterior.

Tambe pa e hendenan cu tin malesa cronico, cu mester di remedi tur dia, ta bon pa bo tin suficiente remedi pa e temporada cu bo ta afo. Si no ta asina, bay cerca bo dokter di cas of specialista pa zorg cu e botica pa bo haya remedi suficiente.

Di su banda, PR di DVG, Jurette Croes a declara cu nos tur mester ta consciente cu cuido medico den exterior, hopi biaha ta costa hopi placa. E gastonan por bay den miles di florin dependiendo di e gravedad di cada caso, y e problema ta cu nos no sa na ki momento nos por haya un accidente of nos por bira malo den exterior. P’esey ta importante pa tin un seguro di biahe prome cu bo ta biaha afo, y asina no haya bo confronta un caso asina den exterior y sin tin manera pa atende cu bo salud.

Tipnan pa Tene na Cuenta

Igualmente DVG a yega di pone atencion riba e vacunacion cu mester pa diferente destinacion, y tambe nan a duna diferente tipnan pa cuida bo salud ora cu bo ta den exterior.

Cada pais tin su riesgonan, cu ta varia entre malesanan transmiti pa sangura, malesanan gastrointestinal of malesanan respiratorio infeccioso. P’esey ta importante pa ta informa trempan pa por tuma medidanan di prevencion necesario. “Niun di nos no sa na ki momento nos lo por bora malo. Nos no sa si nos por haya un accidente den exterior cu ta rekeri cuido medico”, el a indica.

Recientemente, Peru a declara un estado di emergencia debi na un cantidad no usual di casonan di Guillain-Barré (Acute inflammatory demyelinating polyradiculoneuropathy), raporta den 5 region turistico di Peru. Guillain-Barré ta un malesa cu ta caracterisa su mes door di paralisis di e musculonan, afecta pa e sistema nervioso. E malesa ta conoci pa no ta uno contagioso, kiermen cu no ta pasa di hende pa hende. P’esey na e momentonan aki ta buscando e motibo di e subida drastico den cantidad casonan na Peru.

Merca y Europa tambe ta raportando aumento den casonan di sarampi (measles) cu ta un malesa viral cu ta sumamente contagioso y peligroso pa mucha y hende muhe na estado, pa motibo cu e por ocasiona pulmonia, infeccion di celebro y daño na e baby cu ainda ta desaroyando den bariga di su mama.

 

LEAVE A REPLY

Please enter your comment!
Please enter your name here