Sindicato di Aduana (SADA) a realisa un conferencia di prensa ayera mainta pa asina reacciona na un declaracion cu recientemente un ex-politico a haci, unda supuestamente a señala cu sindicato no a duna un reaccion tocante un caso penal cu ta andando den cual un ex-minister ta involucra.

Edward Maduro presidente di SADA a splica cu como sindicato cu ta representa su miembronan y ta traha a base di mandato di e miembronan, tin biaha nan mester bin dilanti pa defende nan miembronan. “Nos no ta parlamentario, nos no ta sinta den parlamento unda e trabou di control riba gobierno mester tuma luga, kiermen, esnan cu ta prome yama y esnan cu ta wordo paga pa haci esaki ta parlamentarionan, nan ta esun cu mester controla gobierno y ministernan, personalmente mi tin hopi comentario di e funcionamento di parlamento pero mi ta kere aworaki mi no ta bay divulga esey pasobra mi ta sinta den calidad di un sindicato, pero nos no por acepta cu nos ta wordo tilda di no reacciona pasobra esey no ta nos deber”, el a indica.

El a señala cu den nan statuut ta indica cu nan no mag di haci politica pa motibo cu si nan ta bay reacciona riba cada caso unda politiconan, gobernantenan, ex-gobernantenan cu tin sospecho riba nan of nan ta culpabel, manera el a sigura, nan tin cu reacciona riba varios otro caso como Strawberry Gate, Arubahuis, Vacuna Gate “casonan unda cu parlamento y gobierno tin cu haci nan trabou y no ta trabou di sindicato”, el a bisa.

Asina mes, el a enfatisa cu directiva di sindicato SADA no ta bay permiti participa den ningun “tipo di politikeria” cu na momento cu nan ta bin cu cierto critica riba e maneho di gobierno cu ta afecta directamente su miembronan “mas cu claro, nos lo sali y vocifera esaki, sin miedo na algun represalia pero nos ta sigui traha bay dilanti”, Maduro a expresa.

Tambe, el a menciona cu nan como sindicato nan ta traha segun statuutnan di sindicato, unda nan ta purba zorg pa e maneho interno lo wordo vigila pa si acaso cosnan robes pasa nan tin cu señala esaki, por ehemplo, el a trece dilanti casonan di ambtenaar cu pa ultimo tempo “nan ta wordo persigui malamente y inhustamente door di e gobierno aki cu ta sinta desde 2017, nos a bin conoce un aumento drastico den casonan contra ambtenaarnan y mi por bisa cu e ta tristo pa bisa den un cierto sentido pero ora bo ta papia di persecucion inhusto di ambtenaar, practicamente tur caso nos ta ganando den corte” Maduro a comenta.

Igualmente, el a bisa cu ora un maneho dudoso ta tuma luga den nan departamento nan ta haci nan werkingsverband, algun añanan atras tabatin benoeming di un colega di nan cu a bay contra ley unda el a sigura cu e director actual di departamento a haci un peticion di un benoeming pa e ramo di inspector cu a bay contra ley.

Continuando riba su reaccion, Maduro a declara cu nan ta hopi druk bezig cu temanan mas importante cu casonan cu ta andando den cual ainda falta e sentencia y cu tambe por bay hoger beroep y “nos no ta bezig cu esey, nos ta bezig cu e temanan di Landspakette cu ta trata cosnan hopi importante unda cambionan den ley laboral mester bin na vigor, unda cu temanan di prestatiemanagement cu ta tema cu ta toca profundamente e ambtenaarnan, esakinan ta temanan cu ta toca nos directamente”, el a bisa.

Nana como directiva a dicidi di sali afo y vocifera di nan banda nan puntonan unda el a sigura cu “mi ta kere cu tin hopi onderzoek mas interno y tin hopi cosnan mas dudoso cu ta tumando luga den Aduana mes cu mi ta kere cu gobierno y minister di Integridad cu ta supose di para pa integridad sa di esakinan, e tin stukkennan cu nos a entregel’e cu mester start un onderzoek interno pero te dia di awe nos no a scucha nada”, el a indica.

Di loke ta trata e situacion di Aduana mes el a expresa cu e construccion na aeropuerto ta continua, cu aña 2023 ta yegando y cu tin cambionan na caminda pero di nan parti como Aduana, nan no ta wordo involucra den esakinan “e ta jammer pasobra mas ideanan bo bin cunel’e bo tin un producto final mas miho cu nos por biba cune pero aworaki, unda Aduana ta trahando na aeropuerto no ta nada apto, ta un luga hopi chikito, y obviamente si bo ta bay expande aeropuerto cu e intencion di ricibi mas turista, bo mester ta dudelijk di kico bo kier haci, di expect miles di turista y keda cu un persona chikito den un luga inapropia pa traha” el a remarca.

Nan tampoco ta hayando audiencia cu minister Xiomara Maduro segun el a sigura cu nan tin hopi tempo pidiendo reuni cu minister pero cu “e nunca tin tempo y cada biaha e reunionnan ta wordo posponi y a pesar di hopi intento cu minister di Finanzas y minister presidente tocante overwerk akinan bo ta wak e importancia cu gobierno aki ta duna na sindicatonan”, Maduro a señala.

LEAVE A REPLY

Please enter your comment!
Please enter your name here