VWI a informa tocante e decision cu a tuma di entrega un peticion na Ministerio Publico pa revisa e manera cu Utilities N.V ta haci su proceduranan. VWI tabatin hopi dialogo prome cu a tuma e pasonan aki, incluso, a informa cu a manda un carta cu a ser firma pa diferente gremio, sindicato y te hasta mediador. Esaki ta e ultimo paso den e careda, mirando cu segun VWI nan no tin otro alternativa mas.

Michael Lin, secretario di VWI a cuminsa informando cu VWI lo haci uso di su derecho pa pidi Ministerio Publico (OM) haci un investigacion dentro di e manera con Utilities N.V ta haci su proceduranan segun ley. El a comenta cu nan “no a yega aki di un dia pa otro. Nos tin hopi tempo caba ta vociferando nos mes pa locual ta pasando cu WEB, en particularmente loke Utilities Aruba ta haciendo den ultimo tempo, refiriendo na e EOI pa cu energia di biento.”

Segun Lin, VWI a papia cu varios stakeholders den comunidad, gremionan y sindicatonan y personanan cu ta representa ley, lagando nan cu e opcion di resorta na Ministerio Publico pa haci e peticion aki. VWI a expresa tambe cu ta lamentabel cu na e nivel halto di e maneho di companianan estatal, e tipo di movecionnan aki ta tumando luga mientras cu ta altanto cu e movecionnan of accionnan aki no ta di cuadra cu e statuutnan di e companianan, pues WEB Aruba y Utilities Aruba, “e ta contra ley y mas ainda e ta contra e codigo di corporate governance di e companianan,” Lin a agrega.

Tambe nan a reitera cu nan no ta den contra di ningun iniciativa cu ta promove e uso di energia alternativo of duradero, esaki incluso ta forma parti di VWI su ‘roadmap’ cu ta ser aproba y comunica na nan bestuur, pues Raad Commisaris, Utilities y te hasta Gobierno. “E no mester ta sorpresa pa ningun hende kico WEB Aruba ta haciendo.”

Gobierno actualmente tin un iniciativa pa aplica corporate governance, nan ta bezig cu e ley aki y e codigo pa esaki tambe. VWI ta contento cu esaki ta tumando luga, y ta haci un yamado na gobierno pa “tira un bista riba locual ta pasando na Utilitis Aruba.”

Sr. Lin tambe a comenta cu WEB Aruba y Utilitis Aruba ambos tin statuut unda cu ta describi exactamente e rol y responsabilidad di cada un partido. Loke Utilities Aruba ta haciendo cu EOI pa mas energia di biento ta den “contra di ley y e statuutnan aki y esaki ta loke nos ta cuestionando. Ta cuestion di responsabilidadnan di cada partido den henter e cadena aki.”

A trece dilanti tambe cu tin varios reportahe cu expertonan manera WEB y expertonan a traha pero ta aparenta cu no ta tuma esaki na cuenta, y na luga di esaki ta busca expertonan di fuera. Pa cu esaki Lin a comenta cu “nos kier pa tur hende compronde cu nos no ta den contra di ningun energia, pero si nos kier pa cana e caminda corecto y segun e statuut, corporate governance y e ley cu tin aki na Aruba.” El a agrega cu den e proyectonan cu nan ta haci, ta busca eficiencia y e interes di pueblo ta mas cu cla na nan, aunke cu kisas politiconan por pensa di manera diferente.

Tambe presente tabata Sr. Delo Gomez, ken ta e representante legal cu ken VWI ta trahando. El a provee un splicacion di e peticion cu VWI a trece na Ministerio Publico, informando cu desde dia 1 di september di aña 2021, nos concoe un codigo civil nobo. Den esaki, den e di dos buki, tin un capitulo tocante entidadnan legal, pues fundacionnan, asociacionnan of N.V. E ta un ley cu a ser modernisa, y a trece dilanti hermentnan cu antes no tabatin. “Un di e hermentnan aki ta cu si bo ta accionista minoritario di un compania of ta miembro di un asociacion y bo ta haya cu cos no ta canando di un forma corecto den e entidad legal aki, bo por bay hof y pidi pa apunta un experto cu lo investiga si en berdad tur cos ta cana manera cu e mester cana.” Den e caso aki, VWI como sindicato no ta forma parti di WEB ni tampoco ta accionista, pues pa VWI e 3 posibilidadnan aki no ta aplica.”

Loke si VWI por haci segun ley ta cu si bo ta un interesado, cual como sindicato di WEB VWI tin un rol den esaki, ta haci un peticion na Ministerio Publico. VWI a entrega e peticion conhuntamente cu un carta cu splicacion ademas di prueba pa sostene esaki. Ministerio Publico lo repasa esaki, y si “nan ta haya necesario, eora como partido neutral y den nan rol imparcial, na nan turno lo pidi hof pa apunta un of mas experto cu lo mira con cos ta cana den e compania. E compania cu e peticion ta dirigi na dje ta Utilities Aruba N.V pa motibo cu nan ta accionista na WEB, cu ta apunta e commisarisnan y tin den cierto forma tur cos di bisa na WEB,” Gomez a splica.

Den e caso aki, segun VWI e balans den Utilities N.V no ta presente, y pa motibo aki a cana e caminda pa yega na Ministerio Publico, pa asina nan por cana e caminda y yega na hof. Na nos islanan ruman manera Corsou, e buki number 2 unda cu esaki ta posibel ya caba tin varios aña den existencia, y incluso a mira ehempelnan concreto unda cu peticionnan similar a ser honra, treciendo investigacionnan di unda a Sali na luz irregularidadnan.

“E ta un instrumento cu ta traha, nos tin confiansa cu esaki lo traha aki tambe, y na fin di dia si tin algo iregular tumando luga, esun cu ta beneficia lo ta comunidad henter,” Sr. Gomez a declara.

LEAVE A REPLY

Please enter your comment!
Please enter your name here