Edward Silberie, miho conoci como “Aidi” ta un hoben di 32 aña di edad cu cuminsa cu su carera den musica desde un edad jong. Den un entrevista cu Bon Dia Aruba, Edward ta conta di su carera musical, di su transicion pa director di videonan musical y proyectonan cu tin den futuro.

Edward a cuminsa practica musica cu 6 aña na momento cu su tata a inscribie pa tuma les di piano. Mientras e tabata tuma les di piano, Sr. Robert Thiel tambe tabata toca piano na e restaurant di e famia di Edward y eynan el a cuminsa experimenta cu diferente tipo di musica ariba piano bao guia di Sr. Thiel.

E ta conta cu el a forma parti di e grupo di gaita Ritmo y Mas, unda cu e tabata toca e piano y ta durante e temporada ey Edward a cuminsa graba su mesun musica. “E tempo ey mi a cuminsa siña graba mi mes na cas, mi a cuminsa traha ritmo mi mes na cas cu un computer cu mi tabatin y Robert Thiel a cuminsa duna mi e programanan pa graba, composita y aregla”.

Edward ta conta, cu den e mesun tempo ey e tabatin un amigo cu tabata bin graba cerca dje tur atardi despues di scol pa graba y asina el a cuminsa siña con pa traha beat, con pa graba y di eynan el a expande pa sigui explora. El a cuminsa graba cu diferente artistanan local na Aruba, entre otro Jonathan Thiel y di eynan su carera musical a cuminsa.

Despues di mas o menos 4 aña cu tabata traha grabando artistanan local na Aruba, Edward a dicidi di tuma su pasion na serio y a bay studia musica na Full Sail University.

“Semper mi intencionnan tabata pa graba den un studio grandi na Merca, bo sa semper bo tin e soño ey di chikito cu bo kier ta patras di e consola, graba cu artistanan grandi y despues cu mi a caba mi scol, Pennfoster na Aruba, mi a cuminsa na EPI Hospitality and Tourism. Pero ora mi a ripara cu mi tin e oportunidad pa haci loke mi gusta mes, mi a stop di bay EPI y mi a bay Full Sail”, Edward ta conta.

E ta splica cu na Full Sail el a probecha e oportunidad y el a conecta cu hopi hende, cu e productornan di eynan, cu departamento di videography y eynan el a ripara cu tin hopi mas cos cu por haci den e mundo di musica. “Eynan mi mente a bisa ‘wow! tin hopi mas cos cu bo por haci, no solamente graba artista pero bo por haci pelicula, bo por haci video games, bo por traha den television’, dus eynan mi mente a djis habri”.

Ora cu Edward a bin back Aruba el a sigui graba musica cu diferente artista local y hunto cu Jeon e tabata biaha hopi pa Venezuela pa graba videonan. Y durante di un di e biahenan aki el a ripara cu director di video musical ta algo cu e lo por haci tambe.

“Durante e grabamento di un video, e director tabat’ey pero ami tabata dunando ideanan y instruccionnan di diferente cos por haci durante e grabacion. Di eynan pa algun video mas mi tabata gewoon plania full e proyecto. Prome mi tabata hacie pa pret paso ami no tabata sa kico kiermen director, pero mi tabata pone tur cos hunto y despues di esey, cu un proyecto mi a logra cumpra tur mi ekiponan y mi a cuminsa graba Jeon su videonan”, Edward ta conta.

Durante e trayecto ey, Edward ta bisa cu el cuminsa experimenta, el a cuminsa siña mas y explora den e mundo di video, cu na principio e no a mira cu lo tabata algo cu e lo haci y cu a cuminsa como un wega. El a tuma na serio y aworaki e ta graba videonan cu artistanan internacional y cada dia e ta crece mas den e mundo di videoclipnan musical.

Edward ta conta cu dentro di poco Jeon lo lansa un album nobo titula Santa Cruz. E ta conta cu riba e album tin diferente colaboracion cu artistanan di Aruba y cu productornan internacional. Cada cancion di e album tin e nomber di un bario di Aruba, unda cu ta enfoca ariba e ritmo di cancionan cu e hendenan di e bario specifico ey ta scucha.

“E proyecto ta echt crioyo. E cover ta traha door di un persona cu sa di e cultura di Aruba, nos no a scoge pa traha cu nos diseñadornan internacional, nos a scoge echt un hende di Aruba cu sa di Aruba su cultura, e ta echt un proyecto crioyo”, el a splica.

Ariba e album aki Edward mes tin dos cantica cu el a produci y un cu un productor di Hulanda, MB, cu tambe a traha e cantica.

Na 2017 Edward a lanta su mesun compania Reclight Production. Edward a traha cu artistanan internacional manera Jeon, Lumino, Malu, Odilia, Snoop Dogg, Carlos Arroyo, Joey Montana, Irsais y Joe Veras entre otro. Edward su vision ta pa traha y apoya e artistanan local.

 

LEAVE A REPLY

Please enter your comment!
Please enter your name here