E tabata un shock pa hopi empresario cu awor ta man na cabez con por bay saca fondo pa paga, si no a haya chens pa hala rosea na 2020. Un total di 434 comerciante a haya un carta di SVB cu ta bisa cu nan tin dos siman pa debolbe sumanan di mas ricibi pa subsidio di salario na luna di juni.

Dia 10 di december ultimo, SVB a manda un carta pa e empresarionan, basa riba un decreto ministerial di Minister di Finanzas, Asuntonan Economico y Cultura, mr. Xiomara Maduro. Ta trata di formularionan di peticion pa por ricibi un subsidio pa yuda compensa gastonan di salario y otro gastonan di empresa pa luna di juni.

Den e carta ta bisa cu segun punto 1 y 5 di e areglo di Loonsubsidie, esaki por keda extendi na e dunador di trabao cu por demostra di a cay cu mas di 25 porciento den su actividad empresarial. E subsidio ta pa 60 porciento di e salario di empleado y ta inclui tambe sosten di maximo 11.6 porciento pa otro gastonan operacional, unda ta maximalisa e salario di e empleado na 5.850 florin pa luna. E carta ta sigui bisa cu punto 10 di e decreto ta bisa cu loonsubsidie ta keda determina despues, basa riba caida real di actividad empresarial y cu despues ta bin un recalculacion, unda ta bay cobra e pago di mas na subsidio.

Pero na mesun momento lo duna mas sosten na e empresario cu mustra cu a ricibi menos sosten di loke e tabatin derecho. E negoshinan en cuestion, a haya un carta cu ta bisa nan cu e caida real di nan actividad empresarial ta menos cu 25 porciento. Ademas e carta ta specifica cuanto e negoshi a ricibi na loonsubsidie y cuanto lo mester debolbe. En total e 434 negoshinan lo mester debolbe casi 2.5 miyon florin pa luna di juni. A cambio tin negoshi cu lo haya ayudo pa luna di mei, pasobra nan a ricibi menos cu loke nan tin derecho ariba.

Edwin Jacobs, Director di SVB a splica cu a haci comparacion cu locual e compania a entrega na BBO na 2019, y e mesun luna e aña aki y a conclui cu e companianan aki no a cay mes hopi atras den e luna di juni manera nan mes a kere.

Empresarionan angustia

Pero pa hopi di e empresanan aki, e asunto aki a bin manera un baño di awa friu. Pasobra awor cu mester bay paga un suma cuantioso, no tin e placa pa paga. Un comerciante a bisa Bon Dia Aruba cu su negoshi tabata cera pa dos luna e aña aki, durante e Shelter in Place, y e mester a cumpli cu debenan atrasa. Sin embargo, berdad ora cu e SIP a keda elimina, nan negoshi a draai un poco mihor. Pero esey no a kita e sla financiero di e lunanan cera.

Pa mei, mester duna SVB mitar di e loonsubsidie cu a ricibi y locual a ricibi na juni, mester bay back pa SVB practicamente completo. “Ta ki ayudo nan ta pretende di a duna companianan. Ta con ta bay duna nan placa back si e situacion actual ta critico?” E comerciante a mustra cu ainda falta e otro lunanan cu awor ta bay cobra back.

“Ta parce cu nan no ta basa nan mes riba benta. Nan no ta tene cuenta cu gastonan atrasa di negoshinan. Ken por duna e placa cu a haya na subsidio? Asina aki nos no ta bay wanta mucho,” ta e comentario di un comerciante.

Un otro a mustra Bon Dia Aruba cu berdad na luna di juni, ora cu e casonan di Covid a baha, a mira un mehoracion den actividadnan comercial. Pero, e no a dura hopi. Pasobra pa augustus, e mehoracion a bolbe cay completo y mester a usa e fondonan genera pa sigui paga otro gastonan cu ta keda mescos, sea cu ta haya sosten pa salario of no.

No por pone acuerdo cu Hulanda na peligro

“Mi tin comprension pa e realidad aki, y Gobierno tambe. Nos no a anticipa e sumanan cu mester paga back, e ta rond di 2.4 pa 2.5 miyon. Pero di otro banda, Pais Aruba ta mara na condicionnan pa loke ta e sosten financiero cu a ricibi.

Y den cuadro di e condicionnan ey, tin requisito cu cual mester cumpli,” Jacobs a bisa. “Entre otro, cu ta duna un adelanto di subsidio y despues ta determina kico ta e subsidio definitivo. Den cuadro di esey, nos ta cumpliendo cu esaki. Nos tin accountants di CAFT pa yuda nos controla y nos mester percura pa cumpli pa asina ricibi un raportahe ‘voldoende.’”

Director di SVB Jacobs a bisa cu ningun momento por core e riesgo di pone e acuerdo cu Hulanda na peligro, cu por significa mas ayudo a largo plazo. “Mi ta compronde e situacion, pero nos mester pensa riba futuro di e pais. Otro aña, 2021 lo bira un aña dificil pa nos pais, probablemente mas dificil cu 2020, pasobra e momento ey tin mas factor ta bay hunga un rol y ta haya mihor vista riba efecto di e pandemia.”

Entrada vs ganashi

Bon Dia Aruba a comprende cu Departamento di Impuesto (DIMP) ta basa su mes riba cifranan cu ta mira di e negoshi, unda te hasta ta asumi cu un negoshi lo a haci ganashi. “Con nan por asumi cu mi a haci ganashi, si nos benta ta na 50 porciento?” ta locual otro empresario a bisa Bon Dia Aruba.

“E ta significa cu no solamente nos no ta bay haya mas ayudo, pero riba dje, net awor cu den luna di december a genera un poco di cash, tur e placa mester bay pa paga e

loonsubsidie back. Si Gobierno sigui asina, nan lo tin mas gasto, pasobra hopi negoshi lo no por keda cu nan trahadornan.”

Es mas, locual a informa Bon Dia Aruba ta cu DIMP ta mira e sumanan cu ta drenta e cuenta di e compania. Por ehempel, si e negoshi tin un pago cu a drenta, e no ta significa cu e ta di e aña coriente. “E por ta un pago pendiente di dos aña pasa pero a aparece awor. Esey no ta nifica cu e negoshi a ‘gana’ e suma en cuestion den 2020. E decisionnan aki sigur ta afecta forsa financiero di un negoshi cu ya caba ta wantando duro pa no bay abao.”

Por yega na areglo di pago

Bon Dia Aruba a tuma contacto cu Departamento di Impuesto riba e asunto aki. Director di Impuesto Luenne Pieters a bisa cu e areglo di Loonsubsidie ta pa yuda companianan cu nan gasto di salario, si nan por demostra cu nan produccion a cay cu 25 porciento of mas, compara cu e mesun periodo na 2019.

Sinembargo, tin comprension cu pa e realidad cu negoshinan a sufri problema cu un caida den actividad atrobe na augustus, cu a sigui pone presion riba nan.

Segun Luenne Pietersz na Bon Dia Aruba, “e punto di salida tabata e comparacion di actividad comercial, pero companianan cu tin problema pa saca e placa di juni, por tuma contacto cu SVB.” Asina cu e dunador di trabao tuma contacto cu DIMP, lo pasa e peticion pa departamento di cobranza y eynan ta prepara pa yuda e comerciantenan yega na un areglo di pago. “Pero mientras tanto dunadornan di trabao por tuma contacto cu SVB, cu e ora lo guia nan den e proceso.”

Calidad di servicio administrativo

E preguntanan cu ta ricibi di dunadornan di trabao, sin embargo ta algo hopi comun na Aruba. Segun Edwin Jacobs, hopi hende no ta lesa e documentonan bon promer cu nan firma. E ta mustra como sifuera nan no a comprende e condicionnan di e sosten. Jacobs ta bisa cu locual a resalta tambe ta e calidad di servicio financiero/administrativo cu hopi negoshi ta cumpra.

“Mi a experiencia esaki y awor mi por hasta comprende dicon den hasta situacion normal, tin empresanan cu ta keha cu nan tin problema cu cumplimento cu belasting. Locual ami a experiencia, ta cu mester evalua mihor e calidad di algun di e oficinanan cu ta ofrece servicio administrativo.

Mi ta comprende cu un comerciante ta bon den haci negoshi, ofrece producto cu hende ta cumpra, y por ta laga administracion den man di hende cu ta bende un servicio, pero no ta un servicio di calidad cu e empresario mester. Esey hopi biaha ta conduci na incumplimento cu belasting y otro obligacionnan. Esey tambe ta un punto cu mester atencion.”

Mucho di e mesun negoshi?

Locual ta cla pa tur hende ta cu negoshinan no tin hopi fondo na nan disposicion. Ademas, e aña aki a pone hopi compania come nan reserva. Di otro banda, tin hopi negoshi cu nunca tin hopi reserva y esaki ta un reto grandi. Edwin Jacobs a bisa cu tin hopi les cu Aruba y comerciantenan por saca di e situacion actual.

Y un pregunta cu mester haci sigur ta si e maneho di mercado liber manera Aruba tin ta esun cu ta conveni nos pais. “Cu empresanan tin poco reserva no ta pa motibo di sobrecompetencia den diferente sector unda tin saturacion, pero ta sigui permiti empresanan (similar) sigui habri?” ta e pregunta cu Jacobs ta haci.