Minister di Turismo Sr. Dangui Oduber ta anuncia cu 16 di december proximo Aruba lo reintroduci vuelonan for di Inglatera. E vuelonan aki lo wordo haci pa e aerolinea di TUI cu lo tin vuelonan nonstop 1 biaha pa siman for di London Gatwick pa Aruba. Na momento cu Inglatera a anuncia cu su habitantenan por biaha atrobe Aruba, Airport Authority hunto cu Aruba Tourism Authority a cuminsa haci nan esfuerso pa amplia e vuelonan pa Aruba.

Te cu awor TUI ta planea pa opera su vuelonan semanal di 16 di december te cu 31 di october 2021 y e vuelo lo bay opera cu 288 asiento. Durante e temporada aki ta proyecta cu lo por trece alrededor di 8.400 pasahero na un grado di ocupacion di 70%. Di aña 2015 te cu 2019 Aruba a ricibi un total di 71.360 bishitante procedente di Inglatera.

Locual ta hopi positivo pa remarca ta cu Inglatera ta e prome pais cu a cuminsa duna su habitantenan e vacuna pa cu COVID-19 y ta e “front runner” den esaki segun e mandatario. Ya Inglatera ta bayendo pa su di 2 siman cu e ta vacunando su ciudadanonan y sigur esaki ta hopi positivo mirando cu e demanda di turistanan Ingles pa Aruba ta grandi.

Minister Oduber a sigui bisa cu semper Merca tabata e mercado turistico mas importante y recientemente e destinacion di Newark, New Jersey a keda estableci un biaha mas pa Jet Blue. Pero teniendo na cuenta cu Merca no ta pasando den su miho momentonan den e pandemia y e cifranan di contagio ta keda aumenta diariamente. Esaki ta kita e confiansa di e biaheronan Mericano y p’esey e diversificacion di nos rutanan ta hopi importante. Nos maneho di turismo ta dirigi riba turistanan fluente y tambe diversificacion. Cu e ruta nobo aki nos ta logra diversifica nos turismo den un mercado importante cu hopi potencial. Minister Oduber ta demostrando cu accionnan concreto con ta haciendo tur su esfuerso pa nos por recupera nos turismo y economia.

E hecho cu Hulanda algun siman pasa a pone Aruba riba e codico geel, ya caba por mira un aumento den e biaheronan Hulandes pa Aruba. KLM tambe a aumenta su vuelonan pa Aruba, e vuelonan cu tabata bay diariamente pa Corsou a wordo reedirigi pa Aruba mirando cu hermana isla Corsou tin codigo oraño y no ta pasando den nan miho momento.

Finalmente Minister Dangui Oduber ta manda pa labanan di pabien pa Aruba, pabien na Ministerio di Turismo, ATA y AAA NV pa un otro gran logro. Alabes ta recorda un y tur pa mantene cautela y keda cuida, ban cuida nos turismo y sigui recupera nos economia.