Ayera tawata otro dia cu Gabinete Wever-Croes ta marca historia y e biaha aki den enseñansa. Prome Minister Evelyn Wever-Croes tempran diabierna mainta a bishita Scol Basico Cacique Macuarima cu ta e prome scol na Aruba cu a cuminsa cu e eLearning Pilot Project.

Na luna di april ultimo, den colaboracion cu Minister di Enseñansa, Armando Lampe, Gabinete Wever-Croes a lansa un proyecto piloto innovativo den educacion primario pa stimula e 21Century Skills for di un edad hoben caba. Scol Basico Cacique Macuarima a wordo scogi pa asina desaroya un programa di innovacion den un manera nobo y unico.

E proyecto a wordo realisa den un tempo hopi cortico. Cabesante di e scol, señora Rachelle Croes Caster a vocifera cu nan mes no a spera cu den un tempo asina cortico e proyecto di innovacion aki lo a wordo realisa, pero nan ta hopi contento cu esaki a bira un realidad pa e aña escolar aki mes. “E muchanan riba e prome dia di scol a yega haya e sorpresa asina bunita aki”, señora Croes Caster a duna di conoce.

Señora Croes Caster, den nomber di Scol Basico Cacique Macuarima, a gradici Prome Minister y Gobierno di Aruba y tambe Parlamentario Edgard Vrolijk pa e confiansa poni den nan scol y a enfatisa cu nan lo traha duro pa mustra tur e beneficionan cu e parti di innovacion aki ta trece cune. Edgard Vrolijk tawata maestro na Scol Basico Cacique Macuarima y a expresa di ta sumamente contento di por mira e proyecto aki bira realidad na dicho scol.

Prome Minister, dilanti di Parlamentario Edgard Vrolijk, alumnonan, docentenan, mayornan, Comision di Mayor, y tur otro invitado, a expresa su alegria di por a mira e proyecto aki bira realidad diabierna 16 di augustus. Un proyecto cu Prome Minister a enfatisa cu a cuminsa cerca di Meneer Edgard cu tin un luga den su curason pa scol y educacion na Aruba y semper ta busca pa mehoracion den enseñansa. E Proyecto aki, Gobierno tawata tin’e plania caba y tawata buscando un scol pa implementa e proyecto aki. E escogencia a cay pa Scol Basico Cacique Macuarima, bou conseho di Parlamentario Vrolijk pa motibo cu ya e Comision di Mayor, mayornan y docentenan a bin ta haciendo hopi trabou cu hopi entusiasmo y interes pa bay den e nivel di innovacion den enseñansa.

E inversion haci y cu lo continua riba e proyecto aki na Scol Basico Cacique Macuarima ta grandi pero su resultadonan ta pa duna miho oportunidadnan pa nos muchanan ta miho prepara pa futuro. Prome Minister ta encurasha tur mucha di Scol Basico Cacique Macuarima cu lo ta uzando e tecnologia nobo aki, pa nan haci nan best miho posibel.

Prome Minister a felicita Cabesante di Scol, docentenan, muchanan, Comision di mayor y tur mayor cu e prome Pilot Project di innovacion aki. “Ohala cu for di e proyecto aki, nos por haya bon resultadonan pa pronto implementa esaki na tur otro scol na Aruba”, e mandatario a duna di conoce.

“Mi ta gradici Meneer Edgard como e motor tras di e escogencia pa Scol Basico Cacique Macuarima. Mi ta gradici Minister di Enseñansa Armando Lampe, SKOA y tur esunnan envolvi pa haci e proyecto aki un realidad pa Cacique Macuarima School. Ora ta trata di innovacion den enseñansa, e ta un prioridad pa Gabinete Wever-Croes. Cu e proyecto aki, ta pone innovacion den educacion central”, Prome Minister Evelyn Wever-Croes a expresa.

 

1 COMMENT

LEAVE A REPLY

Please enter your comment!
Please enter your name here