E conflicto entre gobierno y sindicato cu ta representa empleado di empresanan estatal ta continua, cu entre otro caso den Corte entama pa sindicato, unda nan ta den desacuerdo cu e decision di gobierno pa forza e empresanan corta salario cu 12,6%. Con esey ta bay termina, ta den man di huez ainda, pero ya nos por mira e diferencia di acercamento di e asunto entre Aruba y Corsou, unda e ultimo gobierno ey a dicidi di promer momento caba pa maneha e asunto a traves di un ley, unda ta tuma decision ireversible den direccion y na beneficio di e austerisacion requeri. Inmediatamente nos ta tende comentario di hende cu ta mustra riba e diferencia ey y ta critica gobierno di Aruba di ta ‘demasiado dejado’ di no aplica e metodo di ley. Esey, na nan manera di mira e asunto, tin di haci cu falta di voluntad o cu ignorancia, lagando e pregunta meymey ta cual di nan e ta.

Ta dificil pa nos kere cu gobierno no a cana e caminda di lesgislacion pa ignorancia; pesey nan ta mucho bon na altura di un que otro. Loke si nos por kere cu aki na Aruba tur hende ta acepta caba cu e ruta di bin cu un ley ta algo masha largo mes, pero nos ta mira na otro pais den Reino cu aya gobierno ta actua tin ora cu maximo diligencia pa bin cu legislacion den cuestion di dia… Esey a sucede na Hulanda den e dianan aki, ora huez a dicta cu e toque de queda imponi pa promer biaha den hopi aña, no lo tabata corecto, mas cu tur cos pasobra lo no tabatin un situacion di tal emergencia cu e medida ey lo tabata hustifica. Pues ta parce posible pa actua asina liher, ta cerca nos e ta un ruta di morocoy, unda nunca nos ta haya sa si ta pa ineptitud o pa mala voluntad, o ambos. Tampoco nos sa sigur cu ta un simple falta di voluntad pa cana e caminda ey, pero en todo caso e sindicatonan, envez di critica gobierno pa no a cana e caminda legal, nan mester ta contento cu esey no a sucede, pasobra asina nan tin perspectiva ainda di gana nan caso, y ta para hopi mas fuerte cu si nan a keda confronta cu un ley cu ta dicta cu nan mester entrega. Awor, nos ta supone cu entre sindicato y gobierno cu a palabra cu no ta traha ley, pero e efecto ta mescos. Sindicatonan anto, sea contento cu un contrincante cu no ta usa tur arma na su disposicion.

Di otro banda, si nos ta mira e situacion na nos empresanan estatal den un contexto mas amplio, e problema economico/financiero no ta e medida di gobierno… E problema mayor ta e caida grandi den benta di practicamente tur e entidadnan aki, cu dos consecuencia serio: uno ta cu nan no tin ganashi pa duna gobierno, y dos, nan lo falta entrada tambe pa maneha e empresanan na un manera responsable, mirando e situacion cu nos ta aden. Con serio e asunto aki ta, den cifra, ta ilustra pa e cifranan di loke gobierno tabata haya na extra entrada banda di impuesto, cu pa gran parti tabata dividendo. Na 2019 esey tabata ainda Afl. 166 miyon y na 2020 a perde sigur mas di Afl. 50 miyon na dividendo. Pa aña 2021 esey lo no ta mucho mihor y aparte di esaki, e empresanan estatal, conoci pa nan nivel di salario ‘bondadoso’ lo mester haci algo pa remedia e situacion dentro di e compania… Esey no tin nada di haci cu ‘solidaridad’ ni ‘compasion’, esey ta e realidad duro di e situacion interno di companianan, cu te algun tempo pasa tabatin nan caha bon yena, pero esey pa e proximo añanan lo no ta asina mas.

Ta pesey tambe ta bira tempo pa termina e wega di mucha, cu lo mester entrega pa paga FASE, mientras esey ta nonsense. Si gobierno no tabatin compania pa entrega dividendo, anto e placa pa FASE lo mester a bin di otro caminda. Ademas, pensando bon riba e asunto aki, ta surgi un pregunta pa e comisarionan di e diferente entidadnan aki: no ta un poco straño cu un empresa (estatal) cu ta eventualmente coriendo perdida, ta bay di acuerdo cu e accionista unico cu esaki ta hinca man den caha di e compania, pa haya salario kita di empleado, pasa como ‘beneficio’ na e accionista?? Por ta cu ta nos conocimento di legislacion empresarial ta fayando, pero normalmente nan lo yama esaki ‘wanbeheer’…? Si acaso nos no a yega ainda, nos no por ta demasiado leu di e momento unda cualkier comisario cu ta gana su honorario honestamente, lo mester bisa gobierno ‘te aki y no mas leu’ pasobra nan t’ey pa lucha pa bon sobrevivencia di e empresa, nada mas. ‘Good Corporate Governance’ no ta encera di ta amigable cu e gobierno di turno, aunke nos sa cu ta nan a nombra… Ta bira tempo pa e empresanan estatal cuminza hiba atencion di sindicato back na mesa cu nan, no cu gobierno, pa papia kico por y kico no por dentro di e empresa, orienta riba con pa pasa den e temponan malo aki, unda dividendo no ta e cos mas sagrado.

LEAVE A REPLY

Please enter your comment!
Please enter your name here