LNG den Caribe y na Aruba: opcion o (im)posibilidad

Recientemente gobierno di Aruba y e empresa estatal Refineria di Aruba N.V. a firma acuerdo cu dos compania Mericano, pa reactiva e refineria y trece gas natural den forma liquido (LNG) na Aruba. Banda di operacion usando gas natural na e refineria ta e intencion tambe pa cambia uso di Heavy Fuel Oil (HFO), pa produci energia electrico, pa LNG na WEB Aruba N.V. Tambe partner Eagle LNG ta contempla e posibilidad di establece un centro di distribucion di gas natural na Aruba, pa benta di gas cu otro usuario den region. Kico na e momento aki ta e perspectivanan pa logra e metanan aki, mirando e desaroyo di uso di gas natural den nos region? Pa haya un vista riba esaki, redaccion di Bon Dia Aruba a haci un analisis di e uso di gas natural den nos region, kico tabata e uso te awor y e perspectivanan pa futuro, cu e forma di combustible por brinda.

A haci uso principalmente di dos estudio reciente riba e tema aki, un ta un informe traha pa Inter-American Development Bank (IDB), titula “ Unveiling the Natural Gas Opportunity in the Caribbean”, elabora pa Rigoberto Ariel Yépez-García y Fernando Anaya Amenábar, di 2019. E otro ta un publicacion di The Oxford Institute for Energy Studies, di Universidad di Oxford, di november 2017.

Ambos estudio a abarca tanto e region di Caribe pa loke ta e islanan y tambe e paisnan riba continente cu tin costa den Caribe. E islanan ta inclui tanto e islanan independiente como e teritorionan liga na un nacion externo, cual ta Reino Hulandes, Reino Uni, Francia y Estadonan Uni. Paisnan cu no ta forma parti di estudio ta e productornan grandi di gas natural manera Venezuela y Colombia, cu ta bibando otro realidad cu e paisnan cu ta contemplando di ta usuario di gas natural.

Tambe ambos estudio a concentra nan esfuerzonan riba e teritorionan mas grandi, argumentando cu e perspectivanan ta mas faborable pa esakinan, en vista di e realidad cu e desafionan pa e teritorionan mas chikito ta hopi mas grandi, tumando na cuenta e problema entre otro di volumen di e potencial mercado cu e teritorionan aki ta brinda. Den e estudio di IDB a inclui den e estudio Bahamas, Barbados, Belize, Republica Dominicana, Guyana, Haiti, Jamaica, Suriname, y Trinidad & Tobago. Oxford Institute a scoge Republica Dominicana, Puerto Rico, Jamaica, Panama, Barbados, Bermuda, Bahamas y Haiti. Barbados ta e teritorio mas chikito pa loke ta poblacion, cu 286.000 habitante, den ambos estudio. E teritorionan grandi ta p.e. Haiti y Republica Dominicana, ambos cu alrededor di 11 miyon habitante. Asina mes, hasta e teritorionan mas grandi na nivel mundial ta conseidera ‘chikito’.

Por constata cu mayoria di e teritorionan mayor den e region ta involucra di algun forma cu desaroyo di posible suministro di gas natural, o tin proyectonan andando caba. Asina Panama ta desaroyando un centro di distribucion di LNG na su costa Caribense, di e compania AES, mientras otro pais tin proyecto di uso di gas natural operando o na caminda pa genera energia electrico. Den e estudionan a enfoca riba potencial demanda, diferente forma di distribucion y logistica pa gas natural, cu ta inclui costo di comparacion di LNG, CNG (Compressed Natural Gas) y uso eventual di tuberia, pa compara e mihor opcionnan pa e teritorionan aki, cu tur ta ser considera mercado chikito ora ta trata di transporta y distribui gas natural na un prijs competitivo.

Den mayoria di e teritorionan, generacion di electricidad ta sucede mas tanto a traves di uso di fuel oil o diesel, mas o menos 74% di e total. Prijs di energia ta varia mas tanto entre e teritorionan cu ta importa combustible y esnan cu ta produci gas (y petroleo) manera Trinidad & Tobago. E pais aki tin un centro di distribucion grandi di LNG. Banda di e pais aki ta solamente Barbados tin un produccion limita di gas. Otro productor den e region ta Venezuela y Colombia, e ultimo aki desde 2016 tin un proyecto di ‘regasificacion’ (conversion di gas liquido pa gas) na Cartagena, pa importa gas natural y distribui esaki entre e industrianan riba costa Colombiano cu ta usa gas. Dentro di poco aña e plan ta pa Colombia bira un exportador di LNG, cu ta bin di posnan den mar Caribe y riba costa firme. E emision di varios licencia na 2020 ta un indicacion cu esey ta sucede proximamente.

E islanan mayor den norte di Caribe, fuera di Cuba, na e momento aki ta involucra caba den un o mas proyecto, mas tanto pa generacion di electricidad, a base di importacion di gas natural. E proyectonan aki ta mas tanto cu companianan Mericano.

Republica Dominicana: ta genera mas o menos 25% di su energia electrico di central cu ta opera riba gas natural, cu ta drenta desde 2003 via e terminal Andres di e compania Mericano AES. Mas di 50% di electricidad ainda ta produci cu uso di fuel oil o diesel. Tambe tin distribucion di gas natural na usuarionan mas chikito na e pais. Tambe desde 2015 AES ta haci preparacion pa cuminza fungi como un hub di distribucion pa e teritorionan den e region. Ta contempla recarga di barco (chikito) cu entre 10.000 pa 60.000 metro cubico di capacidad. Tambe ta contemplando entrega den region na usuario chikito a traves di ‘ISO-container’ (cu ta tamaño di un container di 20 pia).

Jamaica: tin plannan pa importa LNG desde 2004 caba, a traves di un acuerdo cu Trinidad & Tobago. Escasez di gas na e ultimo pais aki a para e proyecto, cu tabata destina na suministra e industria di aluminio cu energia electrico. Un gran parti di generacion di electricidad ta depende ainda di uso di HFO o diesel (na 2015: mas di 80%). Un siguiente proyecto di gas natural cu Venezuela a fracasa pasobra Venezuela no por a cumpli. Na 2012 a dicidi cu LNG no tabata un alternativa viable y a dura te na 2015 cu e compania di utilidad JPS a firma un acuerdo cu New Fortress Energy (NFE), un subsidiario di Fortress Investment Group, di Merca, pa suministra gas pa e central Bogue di 120 MW.

Puerto Rico: tin importacion y uso di LNG desde 2000, na e terminal na Peñuelas. Na 2012, a expande e capacidad di regasificacion pa suministra gas na dos planta di 400MW cada un, na Costa Sur Power Plant. Na 2016 e terminal tabata importa 1.25 miyon ton pa aña di LNG. Plannan pa un otro terminal di LNG a keda discuti, sin un decision definitivo. E terminal Aguirre, na 40 miya di e terminal di Peñuelas, a sufri tambe di e dañonan haci pa e horcannan den ultimo añanan, cu obligacion di inverti promer den recuperacion di e infrastructura di distribucion, cu incertidumbre si e di dos terminal lo continua. Tambe tabatin plan pa conecta e terminal nobo via tuberia cu Peñuelas, loke tampoco a prospera te awor. E compania di energia di Puerto Rico, PREPA, tabatin interes pa converti e planta di Aguirre (1.500MW) pa uso di gas natural na lugar di fuel oil, pero esaki no a keda concretisa pa motibo di bancarota di PREPA.

Panama: e pais aki pa un gran parti ta genera electricidad a base di proyectonan hidro-electrico, usando awa pa produci energia liber di combustible fosil, aunke otro parti di electricidad si ta bin di centralnan cu ta opera a base di HFO o diesel, y hasta carbon. Un parti chikito ta bin di proyectonan solar y di biento. E compania AES, operando na Republica Dominicana tambe, ta diseña pa opera un terminal di 180.000 m3 di gas natural, y un planta di energia di 381 MW, conecta riba e red nacional di electricidad di Panama.

Haiti: a cuminza un proyecto di LNG na 2013 cu un terminal cerca di Port-au-Prince, cu almacenahe di 15.000 m3, y facilidad pa carga truck pa distribucion via caretera. Na e momento aki ta difcil pa haya update di e proyecto, pa cual ta supone cu e proyecto ta suspendi o cancela.

Barbados: Un di e teritorionan mas comparable cu Aruba pa loke ta poblacion, aunke ainda casi 2,5 vez mas grandi, tin un produccion limita di petroleo y gas. Na 2016 Barbados a cuminza importa LNG for di Merca den ISO-container. Na 2017 AES Dominicana a firma acuerdo cu Barbados pa suministra LNG desde e terminal Andres na Republica Dominicana. Esaki tambe ta via ISO-container y no ta pa suministra gas pa proyecto mas grandi manera planta di energia.

Bermuda:

Bermuda ta depende practicamente riba HFO/diesel so pa genera elctricidad. Un informe di 2016 ta conclui cu Bermuda por haci uso di gas natural, por ehemplo via transporte cu barco di aprox. 10.000 m3, na un prijs competitivo, compara cu HFO/diesel. Desde e tempo ey no tabatin inicio di proyecto y segun ultimo informe ainda e pais ta considerando si ta acepta e alternativa di usa gas natural na lugar di HFO/diesel.

Bahamas: Na 2003 a aproba un ‘environmental impact statement’ unda gobierno di Bahamas a duna luz berde pa construccion di un LNG terminal di importacion na Ocean Cay, pa e compania AES Ocean LNG. Tabata anticipa cu AES lo a cuminza construccion di e terminal na 2008, pero oposicion fuerte di gruponan ambiental a logra para e proceso aki. Na mei 2017 AES a propone pa suministra gas natural na Bahams desde terminal di AES na Republica Dominicana.

Trinidad & Tobago: Cu mas di 12 triyon pia cubico (12 tcf) y un produccion di 1,5 biyoncf (2012, di cual mas o menos 60% tabata pa consumo interno, e pais lo mester por a suministra otronan den region di gas natural. Sin embargo, den ultimo añanan produccion a mengua considerablemente, cu e pais buscando alternativa via benta di gas natural Venezolano, pa tene e terminal di distribucion di LNG na bida. Plannnan pa abastece varios teritorio chikito den vecindario no a fructifera, tampoco via tuberia, loke a resulta demasiado costoso.

Perspectiva pa Aruba

Despues di e resumen extenso aki di e proyectonan di LNG den nos region, awor atencion pa e puntonan mas importante den e proyecto proponi na Aruba. Ta trata di e componentenan: 1) rehabilitacion di refineria, cu uso di LNG como combustible; 2) suministro di gas pa otro usuario na Aruba, entre nan principalmente WEB Aruba NV; 3) un hub di distribucion di LNG na Aruba, pa nos region.

1. Rehabilitiacion di e refineria no ta depende di e uso, mas conveniente, di LNG, sino na promer lugar e viabilidad di e operacion di un refineria den un region cu pa varios decada conoce un exceso di producto petrolero, principalmente gasolin y diesel. Esey tin su motibo, y esey ta cu mayoria di e paisnan mas grandi den nos region, menciona den e articulo aki, tin nan refineria local hustamente pa suministra gasolin y diesel pa uso propio. Si acaso e refineria logra operacion, esey lo implica cu por aumenta e volumen necesario considerablemente, sino ta WEB y algun usuario menor so ta haci uso di LNG.
2. Cu un produccion di alrededor di 100 MW, y algo mas di capacidad instala, WEB y Aruba ta cay den e categoria menor, cu den ambos estudio referi no a ser considera asina viable. Tin mencion si di e posibilidad di abastecimento cu barco di menor tamaño, pero cu ta haci transporte mas caro, pues menos atractivo. Segun un fuente confiable, e analisis bao goberno anterior encuanto uso di LNG a resulta negativo, igualmente uso di CNG. LPG lo por ta un opcion, pero ta requeri mas estudio.
3. Aruba como hub di distribucion den Caribe: di e relato aki ta resulta cu mayoria di pais mas grandi den nos region ya pa varios aña ta trahando riba posible uso di LNG, o a logra di algun forma caba, y por lo tanto tin nan linea di abastecimento caba. Ademas, cu Venezuela y Colombia den cercania cu produccion y exportacion di gas natural, mas e puntonan di distribucion na Panama y Republica Dominicana, ademas di e distancia entre Aruba y mayoria di e islanan den e Arco Norte di Caribe, ta parce dificil pa imagina viabilidad pa un proyecto asina.

Conclusion

Obviamente, e experiencia di uso di LNG den nos region ta mustra cu ta trata di materia compleho, unda nos no a logra trata tur aspecto tampoco. E comparacion di costo por ehemplo, di diferente combinacion di tipo di almacenahe y transporte, segun volumen di consumo y benta. Aki tin varios factor cu por haci cu un aparente bentaha di repente no ta existi. Loke si ta resulta claramente, cu pa haci uso di LNG mas factible, ta indispensable pa conta cu e consumo di un refineria di e tamaño proyecta, pero cu pa varios motibo, ampliamente splica den e medio aki, nos ta considera menos cu probable. Tampoco ta mira viabilidad pa un hub di distribucion, den un region cu no ta na punto di descubri LNG como alternativa, pero cu pa hopi aña caba ta den e negoshi aki. Ta resta e posibilidadnan di abastece na un manera economico WEB pa produccion di energia, mas un grupo chikito di empresa cu por beneficia di uso di LNG, o CNG. Tambe tin alternativa cu nos no a logra trata, manera uso di LPG. Esey ta algo riba cual nos por amplia na otro oportunidad.