Encuesta Hulandes ta haya cu mayoria di hende ta dispuesto pa limita nan tempo pa baña na 5 minuut pa spaar awa

(NLTimes) – Gobierno Hulandes ta pidi residentenan pa algun tempo caba pa limita nan tempo cu nan ta baña na un maximo di cinco minuut pa conserva awa limpi. Un encuesta di Hart van Nederland Panel a haya cu un gran mayoria di e encuestadonan ta sostene e yamado y ta dispuesto pa coopera.

68% di esnan encuesta a bisa cu nan ta prepara pa limita nan tempo pa baña na cinco minuut. 50% a indica cu ya caba nan ta haci esaki. Otro 18% a bisa cu di awor padilanti nan lo purba tene nan tempo pa baña mas cortico.

No tur hende ta di acuerdo. 31% a bisa cu nan no lo sigui e conseho. Di e grupo ey, 10% ta sostene e idea, pero no ta spera cu un baño di cinco minuut lo ta factibel pa nan. 21% no ta dispuesto, pasobra nan ta kere cu gobierno no mester mete cu cuanto tempo hende ta baña.

Na Steenwijkerland, autoridadnan ta ehecuta un proyecto piloto special di baña cu meta di aumenta conscientisacion tocante uso di awa, incluyendo entre turistanan.

E campaña “Word geen Douchebag. Fris in 5 minuten” (No bira un idiota. Fresco den 5 minuut) a ser lansa den luna di juni door di un cooperacion cu ta inclui gobierno y companianan di awa limpi. Organisadornan di e campaña a identifica baño manera e area cu tin e potencial mas grandi pa spaar awa. E ciudadano Hulandes promedio ta usa 118 liter di awa limpi pa dia, cu alrededor di 40% di esey ta bay na tempo cu nan ta baña. Un baño di cinco minuut cu un cabes di douche standard ta usa aproximadamente 45 liter. Redobla e tempo cu un hende ta baña ta redobla e uzo aproximadamente pa 90 liter. P’esey e campaña ta promove cinco minuut como e standard nobo.