(AFP) – Presidente Mericano, Donald Trump a señala ayera cu e ta prepara pa laga presion economico monta contra Iran, aparentemente halando atras di su plan pa ordena mas atake militar, hasta mientras Teheran ta duna exigencia pisa.
“Nos ta usando discrecion,” Trump a bisa, segun noticiero Axios, cu a bisa cu a papia cune den un yamada breve riba telefon.
Apenas un siman atras, Trump a haci lo mas recien den un serie di menasa di dal Iran duro, pa despues hala atras, mientras e ta pusha pa un deal pa caba e guera cu el a cuminsa hunto cu Israel dia 28 di februari ultimo.
Axios a bisa cu Trump no a expresa ningun frustracion diadomingo cu e atraso di Iran pa un acuerdo pa habri e Estrecho di Hormuz. Iran a exigi pa Merca caba su blokeo di wafnan Irani y elimina sancion riba petroleo prome, segun e MoU cu e dos pais a firma na juni.
E blokeo di e estrecho na man di Iran desde comienso di e guera a aumenta prijs di combustible y a sacudi economia mundial, poniendo presion riba administracion di Trump mientras eleccion midterm na november ta cada bes mas cerca.
“Nos ta djis semi-negociando cu nan. Nos ta djis mirando Iran cu su inflacion enorme y e hecho cu nan no tin placa,” a cita Trump bisando.
Trump tambe a bisa cu prijs di petroleo ta bahando pues consumidornan Mericano ta sintiendo menos dolor di e guera.
“Ta bay logra. Semper ta logra. Ta manera un wega di ahedres,” Trump a bisa di negociacion Mericano cu Iran.
