Encuentro Publico den Parlamento a resulta den atakenan hopi personal

Ningun contesta riba conflicto di interes y atakenan hopi personal. Y segun Presidente di Parlamento mr. Edgard Vrolijk, e encuentro publico di Diahuebs ultimo no mester a bay asina baho. E encuentro, pidi pa fraccion di MEP lo mester a brinda Prome Minister Evelyn Wever Croes duna splicacion di e proceso di screening di Minister y tambe e reparticion di carteranan.

Pero partidonan di oposicion a mustra cu e reunion no ta uno formal y como tal, no ta duna Parlamento ningun autoridad pa actua y tabata kier pa esaki a bira un reunion publico cu si ta regla pa Constitucion. Fraccion di MEP ni di Raiz a bay de acuerdo pa cambia e encuentro pa un reunion publico, pero esaki no a stroba pa a bin discusionnan pisa, hasta hopi personal den Parlamento.

Programa di Gobierno lo ta cla pa fin di October y Prome Minister Evelyn Wever Croes lo bolbe Parlamento pa splica con e plan 2021 -2025 lo ta. Ademas lo presenta e cifranan di mita aña di 2021, un palabracion cu a haci cu Parlamento. “Aunke cu a bin tardanza, pa motibo di eleccion, nos lo presenta e cifranan di mita aña,” Prome Minister a sigura.

Pa partidonan di oposicion, e tabata un reunion cu no tabata basa riba Constitucion, y como tal, ta informacionnan cu Gobierno a duna durante conferencianan di prensa caba y no a trece mucho informacion nobo.

Sinembargo, e preguntanan di partidonan di oposicion a lanta hopi discusion y manera Bon Dia Aruba a mustra, particularmente a mishi e bida personal di Minister Rocco Tjon y su ministeriabilidad.

Minister Endy Croes

Pero mesun cos a trata preguntanan dirigi na Minister di Enseñansa y Deporte Endy Croes y e salvo tabata haci pa lider di fraccion Accion21 Miguel Mansur kende a puntra si ta berdad cu Minister Endy Croes ta acusa di a saca un persona menor na estado. E Parlamentario tabata kier sa si e Minister a caba su estudio superior. Pero particularmente a bisa cu Endy Croes ta acusa di a malversacion placa di Fundacion Lotto pa Deporte, “ta bisa di ta bon den dialoga, pero prome cu a tuma e cartera a referi na docentenan como shouro. Y tin un ‘vonnis’ cu a permiti kit’e de inmediato for di funcion (na Fundacion Lotto pa Deporte),” tabata e comentario di Mansur y su pregunta na Prome Minister tabata si no tabatin mas talento den MEP, en bes di Sr. Endy Croes.

Dr. Ryçond Santos do Nascimento a referi na e preguntanan cu el a manda pa Prome Minister Evelyn Wever Croes y Minister di Integridad Ursell Arends riba e posibel conflicto di interes di Sr. Croes pa haya autoridad riba Fundacion Lotto pa Deporte. “A mira hopi cos aparece den media. Ami a guia mi mes pa loke ta sali den Solo di Pueblo cu ta haci mas husticia na Sr. Endy Croes. Si Solo di Pueblo ta bisa cu ta lanta un caso contra Ernst y Young y Fundacion Lotto pa Deporte, mi por supone cu e ta corecto.” Hasta si e caso tabata contra Ernst & Young cu despues a envolvi Fundacion Lotto Pa Deporte, e ta nifica cu tin un Minister responsabel cu tin un caso contra e fundacion cu e tin cu carga responsabilidad p’e. Santos do Nascimento a enfatisa cu e dos sentencianan, incluso di Hoge Raad no a exonera Endy Croes di tur culpabilidad den su maneho financiero tempo cu e tabata encarga cu Fundacion Lotto Pa deporte (red. Huez, contrario na locual ta usual, no a ordena Fundacion Lotto pa Deporte pa paga un compensacion pa a kita Croes, sino a bay de acuerdo cu e retiro inmediato di Endy Croes como Director). Segun Santos do Nascimento, motibo pakico Hoge Raad a laga Croes liber di persecucion penal ta pa motibo cu a considera cu Ernst & Young no a duna Endy Croes suficiente oportunidad pa contesta tur e inquietudnan. Y basa riba e decision ey, Croes a lanta caso contra Ernst & Young pa 3 miyon florin. Prome Minister a confirma cu tin un caso cu Croes a lanta contra e compania di accountancy cu a haci e trabao riba peticion di Fundacion Lotto pa Deporte. “Como Minister, Sr. Croes ta bay tin cierto poder pa nombra persona den directiva di e fundacion. Berdad e Minister no ta responsabel pa e operacionnan diario den Fundacion Lotto pa Deporte pero nos tin pregunta (riba conflicto di interes) netamente pasobra Croes tin un ‘appeltje te schillen’ cu e fundacion,” Ryçond Santos do Nascimento a bisa.

Su coleganan di fraccion, Mervin Wyatt Ras y Gerlien Croes tambe a haci pregunta specifico riba e posibel conflicto di interes di Sr. Endy Croes como Minister di Deporte, encarga cu Fundacion Lotto Pa Deporte. “Ora periodista a haci pregunta riba e caso contra Fundacion Lotto pa Deporte, Formado a bisa cu no tin nada. Pues e pregunta ta si Minister Croes mes por confirma si ta berdad of no cu e ta reclama 1.5 miyon for di dia cu a kit’e for di e fundacion te cu awe.” Gerlien Croes tabata kier sa si e Minister, awor cu e ta encarga cu e fundacion, lo abstene di e caso y lo no tuma cualkier fondo cu e kier demanda. “E caso lo no por ta un conflicto di interes y con por ta posibel cu e ta carga e cartera aki,” tabata e pregunta di Gerlien Croes.

Marisol Lopez Tromp di MAS tambe a bay riba e tema di conflicto di interes. “Mi pregunta ta riba e escogencia (di Sr. Croes como Minister di Deporte. Mi no ta papia di si e ta traha duro, si e ta scucha bon. Pero riba e parti di Fundacion Lotto Pa Deporte, kier sa si Sr. Croes ta dispuesto pa laga e caso cay, pa kita e impresion cu tin conflicto di interes. Minister a bisa cu e ta bay cambia e directiva. Bisando esey, mi kier sa si e ta dispuesto pa laga un caso cay. Pasobra ta e fundacion a scoge Ernst &Young pa haci e trabao,” Marisol Lopez Tromp a enfatisa.

Bochornoso

Minister Endy Croes tabata prepara pa e preguntanan y den su forma usual, a usa palabranan fuerte pa ataca su oponentenan. Ningun momento el a papia di e posibel conflicto di interes cu e lo por tin cu Fundacion Lotto pa Endy Croes, pero mas bien a bay den atake personal contra esnan cu a haci’e pregunta.

Endy Croes a cataloga e actitud di Miguel Mansur como bochornoso, un ex-adicto for di famia miyonario no ta dun’e derecho pa bin cu storianan inventa. “Ta mustra cu tin odio y repudio contra mi persona.”

E Minister tambe a cita varios articulo cu Solo di Pueblo a publica riba coleganan di fraccion di Ryçond Santos do Nascimento, unda e medio a ilustra casonan di corupcion. Croes a puntra Santos do Nascimento, na kende ademas el a agrega e fam ‘Dijkhof,’ cu si e ta acepta cu su propio fraccion tin hende corupto. Pero e Minister a bay den extenso riba e pagonan miyonario cu Fundacion Lotto pa Deporte a haci na oficinanan di abogado den nan caso contra su persona. Croes a bisa cu e no tabatin e posibilidad pa apela e decision di Huez pa permiti Fundacion Lotto pa Deporte kit’e di trabao. Pero el a keda para riba cu el a e sentencia di Hoge Raad ta exoner’e di culpabilidad y cu e lo mester ta un masochista pa laga e caso contra Ernst & Young cay.

El a cataloga Marisol Lopez Tromp como hipocrita pasobra un tempo e tabata forma parti di MEP y conoce tur e sentencianan. Ademas, el a bisa cu ta Marisol Lopez Tromp tabata forma parti di partido POR cu awor tin e fundado Otmar Oduber como sospechoso di e caso Flamingo.

E atake contra Gerlien Croes tabata mas bien riba e ex-pareha di e Parlamentario y su pareha actual, cu segun Endy Croes tur dos a haya nan mes cu problema cu husticia pa motibo di posesion di arma. “Ohala e ley di screening cu ta conta pa Minister tambe conta pa Parlamentarionan. Dios sa kico lo a pasa,” Endy Croes a bisa, referiendo na e hecho cu e screening ta conta tambe pa pareha/casa, mayornan, welonan y yiunan di mandatarionan.

El a bari for di mesa e sentencianan den e caso di Fundacion Lotto pa Deporte contra su persona mirando cu na 2018 a bin un sentencia di Hoge Raad cu tabata na su fabor. Pero ningun momento, ni Minister Croes ni Prome Minister Evelyn Wever Croes a papia di e posibel conflicto di interes pa e hecho cu e mesun persona aki, cu ta reclama e fundacion asina hopi cos, awor ta e Minister encarga.

E Minister tambe a atende cu e pregunta riba su moralidad, y a enfatisa cu nunca el a saca un menor di edad na estado. E tin siete yiu cu tres diferente hende muhe, pero cu semper el a cria su yiunan y a percura pa nan bienestar. Su yiunan ta stim’e y pa hopi tempo a purba tene nan separa di politica pa nan proteccion.

Den su concepto e preguntanan cu el a ricibi durante e encuentro publico tabata un atake di locual Endy Croes a considera e bloke AVP, MAS y Accion21, pasobra e preguntanan tabata bao faha y completamente orkestra.

Codigo di conducta

Presidente di Parlamento Edgard Vrolijk na fin di e encuentro a bisa cu e ta hopi indigna y disgusta pa e forma con a comporta den Parlamento. “Kier saca shirishiri di tur hende, pero ningun kier firma e codigo di comportacion. Spera cu awor si ta bay firma,” e Presidente a bisa na final di e reunion. “Transparencia y integridad ta mas cu palabra. Nan ta etica y dedicacion na trabao tambe. E reunion aki a bay for di sla. Parlamentarionan mester refleha riba nan mesun comportacion pa ta integro,” Vrolijk a bisa, pidiendo comunidad di Aruba disculpa pa e nivel di e reunion.