Riba encargo di Entidad Publico Boneiro (EPB), Banco Mundial ta cuminsa cu un encuesta cu e meta pa haya bista cua ta e prioridad- y sentimentonan di habitantenan relaciona cu desaroyo urbano y turistico. Lo procesa e encuesta den un rapport mas amplio cu lo complementa ademas cu entrevista cu experto y estudionan tecnico cu a haci anteriormente. Den e rapport lo tin evaluacion di scenarionan di crecemento potencial y e lo sostene Colegio Ehecutivo den hacimento di escudo strategico pa loke ta trata desaroyo duradero.

Gobierno di Boneiro a acerca Banco Mundial pa sosten tecnico cu trahamento di un rapport tocante desaroyo duradero. Intencion di e encuesta ta pa e fungi como e fuente principal pa e rapport y lo dirigi su mes riba e impacto cu crecemento urbano y turistico tabatin riba calidad di bida di habitantenan y riba con habitantenan ke mira nan isla sigui desaroya.

Di 2 di augustus te cu 15 di augustus 2022, ta tene e encuesta na diferente sitio na Boneiro bou di habitantenan di Boneiro. E encuestanan ta tuma luga tanto personalmente como online y lo por yena nan tambe riba e website di Entidad Publico Boneiro, caminda esey lo ta posibel te 29 di augustus. Lo trata tur contesta riba e encuesta estrictamente confidencial. Lo presenta e resultadonan general durante sesionnan di informacion pa habitantenan di Boneiro riba cua nan por duna input adicional. Despues ta publica nan den un rapport final y lo pone esaki riba e website di Entidad Publico Boneiro. Resultadonan di e encuesta lo ta base pa e strategia pa mobilisacion di medionan institucional, financiero y tecnico cu ta necesario pa crecemento di Boneiro.

Ta di importancia grandi cu Boneiro ta desaroya su mes di un manera duradero y responsabel. Nos ta na un punto crucial y a base di bon informacion, nos mester tuma decision bon pensa pa futuro di nos isla. Pa por tuma e decisionnan aki, ta importante pa dispone di dato y conocemento corecto. P’esei nos ta hopi contento cu Banco Mundial tabata dispuesto pa haci e investigacion aki y nos ta ansioso pa mira e resultadonan”, segun Hennyson Thielman, diputado pa Desaroyo Economico, Turismo y Finansa den Colegio Ehecutivo di Boneiro.

James Kroon, diputado pa Infrastructura y Medio Ambiente ta sigui bisa: “Nos ta mira nos isla crece y nos sa cu ta importante pa haci escoho consciente pa futuro. E investigacion aki ta bay yuda nos cu esey. Mi ta hopi contento cu Banco Mundial no ta bay dirigi su mes solamente riba turistanan cu ta bin Boneiro, sino tambe riba habitante y e impacto cu crecemento tin riba nan”.