Manera por a anticipa, na luna di mei entradanan di gobierno a cay drasticamente, a consecuencia di e crisis economico cu nos ta aden. Mientras entradanan di luna di april pa varios tipo di impuesto ainda ta refleha e actividad economico na luna di maart, e cifranan di mei ta refleha e actividad na luna di april.
Den cierto caso, manera winstbelasting, esaki ta refleha actividad economico di 2019 y no tin relacion directo cu e situacion economico actual, pero ta constata cu e ta hopi menos e aña aki.
Entrada general na mei tabata Afl. 64.8 miyon, compara cu Afl. 198.4 miyon na mei 2019; un caida di no menos cu 67,4%. Entrada di impuesto tabata na Afl. 154.8 miyon na mei 2019 y solamente Afl. 63.6 miyon na mei 2020’ ; un caida di 59% compara cu mei 2019. Pa un parti e diferencia aki ta debi na e diferencia den winstbelasting di 2019 y mei 2020: Afl. 64.1 miyon vs Afl. 22.4 miyon e aña aki. Compara cu luna di april 2020 entrada di gobierno ta mustra un aumento (Afl. 64.8 vs Afl. 55.0 miyon), loke ta relaciona principalmente cu e entrada extra na mei di tur aña di winstbelasting, a pesar cu esaki ta hopi menos compara cu mei aña pasa.
Tambe gobierno a haya na mei 2019 un suma di Afl. 43.6 miyon na entrada cu no ta impuesto, pa un gran parti dividendo di e diferente entidadnan estatal. Na mei 2020 entrada cu no ta impuesto a yega te na e minimo di Afl. 1.2 miyon.
Kico mas a cay?
Loonbelasting: Afl. 15.4 miyon vs Afl. 20.0 miyon na april. (Refleho di actividad economico na april 2020); un caida di 23%. Compara cu mei 2019 loonbelasting a cay di Afl. 23.2 miyon te Afl. 15.4 miyon : -33.7%.
Impuesto di importacion y Accijns: en total Afl. 10.2 miyon vs Afl 15.7 miyon na april 2020, un caida di 35.1%. Compara cu mei 2019 e reduccion ta di Afl. 16.7 miyon, un reduccion di 65.9%.
BBO/BAVP: Na luna di mei BBO/BAVP tabata Afl. 7.4 miyon vs Afl. 17.5 miyon na mei 2019; un caida di 57.7%, pues actividad economico ta mustra di ta menos di mitar di loke e tabata aña pasa. Compara cu april 2020 e caida tabata 30.9%, di Afl. 10.7 miyon pa Afl. 7.4 miyon.
Nota: luna di mei ta e luna di pago di winstbelasting di tur empresa (VBA,NV,AVV). E companianan cu a acorda posposicion di entrega di cuenta anual pa 6 luna ta paga winstbelasting na december, e otro luna unda tambe tin un fluho grandi di winstbelasting ta drenta.
