Entrante 1 di augustus 2026, Aruba lo introduci pa prome biaha un limite legal riba e interes di credito di consumidor. Gobierno a anuncia cu articulo 5 di e Landsverordening Regeling Consumentenkrediet (LCK) lo drenta na vigor, estableciendo cu institutonan financiero no por cobra un porcentahe efectivo di interes mas halto cu 25% riba prestamonan nobo. Cu e medida aki, gobierno ta busca fortalece e proteccion di consumidor y mantene acceso na credito den un marco legal mas balansa.

E anuncio a ser haci durante un conferencia di prensa di minister di Finanzas, Asuntonan Economico y Sector Primario, Geoffrey Wever, hunto cu representantenan di Banco Central di Aruba (CBA). Segun gobierno, e entrada na vigor di articulo 5 ta representa e prome paso concreto den implementacion di e Landsverordening Regeling Consumentenkrediet, un ley cu a ser prepara durante varios aña pa crea un cuadro legal moderno pa regula credito di consumidor na Aruba.

Te awor, Aruba no tabatin un limite legal general riba e porcentahe di interes cu por ser cobra riba diferente forma di credito di consumidor. Esaki tabata laga espacio pa cu algun producto financiero cobra interes demasiado hopi halto pa consumidor. Gobierno a indica cu precisamente e falta di un limite legal tabata un di e motibonan principal pa introduci e regulacion nobo.

Segun minister Wever, e proceso pa yega na e momento aki a dura aproximadamente dos pa tres aña. Durante e periodo ey a traha riba e contenido di e ley, e manera di implementacion y e ekilibrio entre proteccion di consumidor y continuidad di e mercado financiero. A pesar cu e ley mes a ser aproba anteriormente door di Parlamento di Aruba, no tur su articulonan ta drenta na vigor mesora. Gobierno a scoge pa implementa e regulacion den diferente fase.

E cambio cu lo drenta na vigor dia 1 di augustus ta concentra specificamente riba articulo 5 di e ley. E articulo aki ta determina cu pa tur acuerdo di prestamo firma despues di e fecha di entrada na vigor, e porcentahe efectivo di interes no por pasa 25%. E limite ta aplica riba credito di consumidor cu ta cay bao di e ley y ta crea pa prome biaha un marco legal cu pone un limite riba e costo di financiamento.

Gobierno a splica cu e decision pa establece un maximo di 25% no ta e prome fase. E regulacion lo keda vigente te cu 31 di december 2027. Durante e periodo ey, autoridadnan lo evalua e efecto cu e limite tin riba consumidor, riba disponibilidad di credito y riba funcionamento di mercado. Basa riba e resultado di e evaluacion, gobierno lo determina si tin espacio pa reduci e porcentahe mas ainda.

Minister Wever a indica cu e intencion di gobierno ta pa, eventualmente, logra un porcentahe di interes mas abao, pero solamente si e evaluacion demostra cu esey no lo afecta negativamente e disponibilidad di credito. Segun e mandatario, e balansa entre proteccion di consumidor y un mercado financiero funcional ta esencial pa evita consecuencia no deseable.

Gobierno a reconoce cu hopi di e prestamonan cu ta cay bao di e categoria di credito di consumidor ta ser otorga sin garantia of colateral. E tipo di financiamento aki naturalmente ta representa un riesgo mas halto pa e prestamista, loke normalmente ta conduci na interes mas halto. Sinembargo, gobierno ta considera cu tin un punto unda e costo di credito por bira excesivo y pone un carga financiero desproporcional riba consumidor.

Segun el a splica, e regulacion nobo ta busca evita situacionnan den cual famianan cu ya ta enfrenta presion financiero paga interesnan cu ta haci e debe bira cada bes mas dificil pa paga. Gobierno ta considera cu un limite legal por contribui pa evita cu algun consumidor ta cay den un circulo di debe cu ta sigui aumenta.

Na mesun momento, gobierno a enfatisa cu e no kier elimina e mercado di credito ni pone presion excesivo riba empresanan financiero. Segun minister Wever, si regulacion ta bira demasiado severo, por crea un situacion unda institutonan financiero no ta haya rentable pa sigui ofrece e tipo di producto aki. Esaki, na su turno, por resulta den menos opcion pa consumidor.

Esaki por tin consecuencia contrario na loke ta busca logra. Si un persona no por haya financiamento via institutonan regula, nan por busca solucion den mercado informal of ilegal, unda no tin supervision, no tin regulacion y no tin proteccion legal pa consumidor..

Minister Wever a indica cu e ley mes ta resultado di un proceso largo den cual Banco Central di Aruba a hunga un papel importante. Segun e mandatario , CBA a contribui significativamente na preparacion tecnico di e Landsverordening Regeling Consumentenkrediet, cu despues a ser presenta na gobierno y aproba door di Parlamento.

Aunke articulo 5 lo drenta na vigor dia 1 di augustus, otro parti importante di e sistema regulatorio lo sigui despues. Gobierno a confirma cu e responsabilidad formal pa supervision y aplicacion door di Banco Central di Aruba lo cuminsa 1 di januari 2027. E periodo entre augustus 2026 y januari 2027 ta considera como un fase di transicion.

Durante e fase aki, institutonan financiero lo haya tempo pa revisa y adapta nan producto financiero pa sigura cu nan ta cumpli cu e limite legal nobo. Banco Central lo uza e periodo pa prepara su organisacion interno, capacita personal y desaroya e procedementonan necesario pa por eherce supervision efectivo ora e competencia aki drenta completamente na vigor.

Gobierno ta spera cu mayoria di empresa financiero lo adapta boluntariamente nan producto prome cu supervision formal cuminsa. Segun minister Wever, e hecho cu e obligacion ta ser incorpora den ley mester ta suficiente incentivo pa e sector ahusta su practicanan.

Un aspecto importante di e regulacion nobo ta e consecuencia huridico ora un prestamista cobra mas cu e porcentahe permiti. Gobierno a splica cu e parti di un acuerdo di prestamo cu supera e limite legal lo ta considera nulo. Esaki ta nifica cu e consumidor no ta obliga pa paga interes cu ta supera e maximo permiti den ley.

Ademas di esey, e consumidor por sigui e ruta legal pa reclama aplicacion di e proteccion legal cu e ley ta ofrece. Segun gobierno, e cambio aki ta fortalece significativamente e posicion huridico di consumidor, algo cu anteriormente no tabata existi den e mesun forma. Den e sistema anterior, mercado tabata opera sin un limite legal general riba e costo di credito, loke tabata limita e posibilidad di consumidor pa opone contra interes excesivo.

Banco Central lo desempeña un papel central den e fase siguiente di implementacion. Ademas di controla cumplimento, e institucion lo evalua e funcionamento di e mercado y por contribui cu informacion tecnico pa e evaluacion cu gobierno lo haci na final di 2027 tocante e efectividad di e porcentaje maximo.

E Landsverordening Regeling Consumentenkrediet ta forma parti di un vision mas amplio pa modernisa regulacion di proteccion di consumidor na Aruba. Den e ultimo añanan, gobierno a introduci tambe otro medidanan relaciona cu fortalecemento di derechonan di consumidor y supervision di mercado, incluyendo diferente cambio legislativo pa amplia e hermentnan di control y cumplimento.

Segun minister Geoffrey Wever, e entrada na vigor di articulo 5 ta representa un mehoracion importante den e posicion di consumidor. Gobierno ta considera cu e regulacion nobo ta crea un sistema mas balansa, unda consumidor ta haya mas proteccion contra interes excesivo, mientras cu institutonan financiero ta mantene espacio pa ofrece credito den un marco legal cla.