Gobierno por haci Aruba limpi, pero solo ciudadanonan por manten’e limpi

Tur Arubiano kier mesun cos: un isla mas limpi. Bario, beach, caminda mas limpi, y un ambiente natural cu ta refleha e beyesa natural pa cual Aruba ta conoci rond mundo. Esaki ta un meta cu ta transcende politica, y uno cu tur gobierno, sin importa composicion, a busca di un of otro manera.

E iniciativa mas recien di e gobierno actual pa promove un Aruba mas limpi ta bonbini. Tur esfuerso pa reduci sushi, mehora maneho di desperdicio y curasha responsabilidad ambiental merece reconocemento.
Pero con importante cu e iniciativanan aki por ta, tambe nan ta invita nos pa haci un pregunta mas grandi. Si gobiernonan a pasa añas invertiendo den campañanan di limpiesa, iniciativanan di reciclahe, educacion ambiental y miho facilidadnan di desperdicio, pakico dumpnan ilegal ta keda aparece? Pakico matras, muebles, resto di construccion y desperdicio di cas ta keda haya benta den mondi di Aruba y banda di caminda?

E contesta por ta incomodo, pero e ta necesario.

Decision di un ciudadano

Talbes e reto mas grandi pa maneho di desperdicio na Aruba ya no ta un falta di iniciativa di gobierno. Talbes e proximo stap ta depende riba nos.

Nos no ta bay bisa cu gobierno a haci tur cos perfectamente tampoco. Maneho di desperdicio ta keda un tarea compleho, mester continua mehora infrastructura, servicionan di colecta mester keda confiable, facilidadnan di procesamento mester ta accesible, y mester aplica leynan ambiental consistentemente. Tur administracion tin espacio pa mehora, y gobiernonan den futuro sigur lo bay enfrenta retonan nobo mientras Aruba ta sigui crece.

Tambe ta berdad cu Aruba no a djis para keto.

Durante añanan, gobiernonan sucesivo a introduci un variedad di medida cu meta pa mehora e prestacion ambiental di nos isla. Campañanan publico di conscientisacion a trece hunto boluntario, scol y organisacion. Programanan educativo a busca pa sembra conscientisacion ambiental den e generacionnan mas jong. Aruba Limpi a promove espacionan publico mas limpi, mientras iniciativanan mas recien, manera Zona di Desperdicio – un sucesor di e popular Baki den Bario – ta busca pa hacie mas facil pa residentenan separa y deshaci di diferente tipo di desperdicio. Organisacionnan ambiental, stakeholder di turismo y negoshi priva tambe a bira cada bes mas involucra den tene e isla limpi.

No mester descarta ningun di e esfuersonan aki. Hunto, nan ta representa añas di trabao, inversion y compromiso di hendenan cu talbes genuinamente kier laga Aruba den un miho condicion cu con nan a hay’e.
Pero toch e problema ta persisti.

Reportahenan continuo di dumpnan ilegal ta sirbi como un recordatorio cu haci un isla limpi ta hopi diferente cu cambia comportamento. Un gobierno por kita un dump ilegal awe, pero otro por aparece na e mesun lugar mañan. Autoridadnan por instala baki, expande servicio di colecta y organisa campaña di limpiesa, pero nan no por dicidi kico un individuo ta haci un frishider bieu, un mashin kibra, of un cantidad di desperdicio di construccion.

E decision aki ta un ciudadano ta hacie.

Problema global

Esaki no ta un problema unico di Aruba. Hopi pais a lucha cu dump ilegal, dump yen, y cantidad enorme di desperdicio. E bon noticia ta cu varios di nan a logra reverti e tendencianan aki. Nan experiencia ta siña nos un les importante.

Corea di Sur, por ehempel, a transforma su sistema di maneho di desperdicio door di introduci un modelo “Paga-loke-bo-ta-tira.” Residentenan ta paga segun e cantidad di desperdicio no-reciclable cu nan ta genera, mientras ta colecta e material reciclable separa.

E transicion no tabata facil. E cantidad di dump ilegal na comienso a aumenta, mientras algun persona tabata purba di evadi e costo nobo. En bes di bandona e politica, autoridadnan a reforsa aplicacion, aumenta inspeccion, y impone castigo significante. Cu paso di tempo, comportamento di publico a cambia, y e pais a bira un di e lidernan mundial den reciclahe.

Taiwan a scoge un caminda diferente pero cu un destinacion similar. Door di haci disposicion di desperdicio ordinario mas caro, mientras ta permiti pa colecta material reciclable gratis, a cambia e incentivonan financiero cu hogarnan ta enfrenta. Recicla a bira e escogencia mas barata y mas simple. Generacion di desperdicio a baha significantemente, mientras tasa di reciclahe a aumenta dramaticamente.

Hapon ta demostra otro banda. Hopi biaha ta atribui su exito na reglanan detaya pa separacion di desperdicio, pero e reglanan riba su mes no ta splica e logronan di e pais. Añas di educacion publico, schedulenan cla di colecta, y expectativanan fuerte di comunidad, gradualmente a converti separacion adecua di desperdicio den algo ordinario. No ta mira reciclahe como un campaña ambiental mas. E ta simplemente loke miembronan responsable di sociedad ta haci.

Mientras tanto, Singapore a bira famoso pa su espacionan publico excepcionalmente limpi mediante un combinacion di educacion y aplicacion estricto di ley. Tira sushi unda cu ta y dump ilegal ta carga castigo significante, pero talbes mas importante, ta aplica e castigo consistentemente. Ciudadanonan ta compronde cu reglanan ambiental no ta djis un sugerencia.

A pesar cu e paisnan aki tin un cultura, geografia y sistema politico hopi diferente di otro, nan exito ta para riba fundeshinan remarcablemente similar: nan a inverti den infrastructura, nan a educa publico, nan a aplica reglanan. Y talbes mas importantemente, nan tabatin exito pasobra nan ciudadanonan a acepta e idea cu maneho di desperdicio ta un responsabilidad comparti, no djis un servicio di gobierno.

Esaki por ta e les riba cual Aruba mester reflexiona.

Responsabilidad individual

Pa hopi aña, e discusion publico a enfoca principalmente riba kico gobierno mester haci. Mester bin mas campaña di limpiesa? Mas punto di colecta? Mas facilidad di reciclahe? Miho aplicacion di ley? Esakinan tur ta pregunta legitimo cu merece atencion continuo. Pero talbes un pregunta mesun importante a ricibi hopi menos atencion: Kico anos como ciudadano mester haci diferente?

Ningun gobierno por pone un inspector riba cada caminda sushi. Ningun ministerio por monitoria tur truck transportando desperdicio di construccion. Ningun campaña ambiental por stop un hende di tira un sac’i sushi den mondi den anochi.

Na final, e decisionnan aki ta pertenece na e individuo.

Ta p’esey cu un Aruba limpi no ta un tarea di gobierno so.

E ta bay rekeri residentenan cu ta nenga di dump desperdicio ilegalmente, hasta ora niun hende ta mira. Negoshi cu ta deshaci di desperdicio responsablemente, hasta ora tin alternativanan mas barata. Mayornan cu ta siña na yiunan cu stima Aruba ta un deber civico igual cu obedece regla di trafico of respeta propiedad publico. Comunidadnan dispuesto pa denuncia mal comportamento en bes di acept’e como inevitable. Den otro palabra, e ta rekeri un cultura den cual protege medio ambiente di Aruba ta bira parti di nos identidad.

Liderazgo di gobierno ta keda esencial. Miho politica, inversion continuo, facilidadnan accesible y aplicacion consistente di ley semper ta bay ta importante. Pero e medidanan aki por solamente crea e condicionnan pa exito. Nan no por crea e disponibilidad pa participa.

Cada campaña di limpiesa eventualmente ta termina. Cada gobierno eventualmente ta pasa tarea pa otro. Pero e habitonan di sociedad ta permanece.

Paisnan cu a transforma nan sistema di desperdicio no tabatin exito pasobra gobierno a haci mas limpiesa, sino pasobra nan ciudadanonan a cambia nan actitud.