Ora pandemia di Covid a dal Aruba, voz di solidaridad a wordo lanta for di diferente sector y gremio. Pero tambe lidernan di nos comunidad cu a expresa nan deseo cu niun hende na Aruba mester pasa hamber, debi na e situacion dificil financiero y economico cu nos ta pasando aden.

E problema social y laboral cu a ocasiona cu e crisis aki a haci cu varios entidad a bini hunto pa brinda un ayudo den diferente forma specialmente productonan basico di prome necesidad. E biaha aki e ayudo cu nos ta referi na dje tin di haci cu reparticion di cuminda cayente. Nan ta wordo cushina na WYCM San Nicolas cu ayudo di un grupo dinamico di boluntario, entre nan Sr. Eric Nassy.

Durante e entrevista aki, Sr. Eric Nassy a bisa cu den e cadena di ayudo aki, CEDE Aruba ta esun cardinal, ya cu nan a start e proyecto di caridad Happy To Give Back. Figuranan prominente di nos comunidad a sostene e proyecto aki. Nan a yuda colecta fondo pa e proyecto humanitario por a bira un realidad.

E fondo aki a wordo comparti cu comunidad, specialmente cu esunnan cu ta den un necesidad grandi. Un gran parti di e fondo a bay pa Fundacion Pa Nos Comunidad cu ta traha paketenan di cuminda. Otro parti a bay pa fundacion Un Man pa Nos Muchanan den forma di desayuno. Un proyecto cu a nace varios aña pasa for di empleadonan di hospital y coordina pa Sr. Jhon Fun. Otro suma a bay pa e organisacion internacional WYCM.

Cuminda cayente

Sr. Nassy a relata cu WYCM a wordo acerca dor di CEDE Aruba pa sostene nan proyecto di ayudo caritativo dor di cushina cuminda cayente pa comparti cu esunnan cu a perde trabao cu no por cushina. Hendenan cu ta den necesidad grandi y vulnerabel di pasa hamber. WYCM San Nicolas a carga di biaha a proyecto aki. E director anterior di e organisacion aki ta conoce Sr. Nassy kende ta un boluntario activo den WYCM specialmente den e area di cushina. “E ta mi pasion y mi prome profesion tambe,” asina el a conta nos.

Di e forma aki, Sr. Nassy a cay aden pa ehecuta y coordina e proyecto aki durante diabierna, diasabra y diadomingo.

E staf cu ta traha den WYCM tin custumber di cushina masivamente pa entre 40 pa 50 mucha maximo. Ora cu nan tin campamento di vakantie e cantidad por subi te 75 mucha. Pero nunca nan por a imagina cu e trabao caritativo pa cushina pa esunnan den mas necesidad den comunidad por a bira grandi.

Nan a inicia un dialuna 20 di april y durante e prome cinco dianan, nan a cuminsa cushina 100 cuminda cayente. Pero a transcuri apenas 6 dia cu e peticion a drenta pa duplica e cantidad. Kiermen aumenta pa 200 cuminda.

Necesidad ta grandi

El a bisa cu e necesidad no ta grandi, e ta ‘espantosamente grandi.’ Nan no ta parti cuminda na WYCM. Sinembargo hendenan ta bin bati na nan porta. Nan ta bin cu tas of wea mustrando cu nan tin hamber. Pa atende cu e situacion aki nan a palabra cu e funcionarionan encarga cu oficina di gobierno Edison Briesen na San Nicolas pa nan registra e hendenan cu ta bin WYCM pa pidi cuminda. Esey ta e unico punto di registracion.

E oficina di gobierno aki ta registra pa Cruz Cora tin’e, ya cu e hendenan aki ta uno masha humilde cu no tin internet of nan no tin telefon. Tambe nan ta registra e hendenan cu mester di e ayudo aki na San Nicolas pa medio di grupo di iglesia cu ta yuda cu e informacion aki.

“Tur dia nos ta haya hendenan cu ta bin bati nos porta,” el a bisa. Nan tin pensa di bin cu un sub-home den area central di San Nicolas, manera tabata existi na Merca tempo di e depresion economico. Eynan nan lo por haya algo di come y asina nan por wanta te mañan.

Desde dia 25 di april nan ta cushinando 200 cuminda tur dia for di cushina di WYCM cu financiamento di CEDE Aruba. E fundacion aki tin un persona asigna pa tin contacto cu WYCM caminda nan ta coordina e menu di minimal 10 dia. Tambe e material cu nan tin mester pa elabora e volumen di cuminda cu ta wordo entrega na diferente adres. Nan tin un staf di cushina cu hunto cu Sr. Nassy ta elabora e menunan. Nan ta trata semper pa varia e menu haciendo uzo di nan creatividad y habilidad gastronomico.

Smaak y sonrisa

Nan ta chefnan y assistent di cushina cu tur dia ta prepara e cuminda cu bon smaak. Nan ta cuminsa cu nan labor for di 8or di mainta y pa 10or di mainta, ya caba e holo di cuminda ta indica cu e cadena y logistica ta cuminsa pa paketa 200 cuminda full swing. E cumindanan paketa ta wordo poni den un container. Cada container ta mantene 50 cuminda pa asina conserva e cuminda cayente. “Nos kier pa e hendenan cu ta bay ricibi e cuminda por haya un tayo di cuminda cayente”, el a bisa.

Pa 10:30 di mainta e cantidad di 200 cuminda mester cla pa cuminsa sali. Entre 11:30am te cu 12or di merdia, boluntarionan di Cruz Cora ta bin cu thermo tas pa busca nan y asina distribui e cumindanan na varios adres. Nan ta 5 grupo cu tin e tarea di entrega 40 cuminda y percura cu nan ta yega cayente na nan destino final.

E ta un trabou boluntario y caritativo cu ta demanda bon coordinacion, esfuerso, compromiso y amor pa prohimo. Pero na final semper bo ta haya cerca e team envolvi den e proyecto aki un sonrisa di satisfaccion.

 

 

 

LEAVE A REPLY

Please enter your comment!
Please enter your name here