Trahadonan di Little Switzerland a dicidi di organisa nan mes sindicalmente, ya cu nan kier mira cambio den nan condicion di trabao.

Vice presidente di FTA, abogado Hose Figueroa a declara na Bon Dia Aruba cu tabatin diferente motibo cu a haci cu e trahadonan a acerca nan sindicato. Un di nan tin di haci cu e situacion laboral actual cu e covid crisis a ocasiona na Aruba. Adicionalmente tabatin algun situacion cu tabatin existi prome cu e crisis aki. Nan tin di haci cu algun cambionan cu e trahadonan kier mira den nan condicion di trabao.

E cambionan cu FTA kier bira realidad pa medio di un contracto colectivo (CAO). Algun di e cambionan cu e trahadonan aki kier wak ta esun di nan structura di comision. Un gran parti di e trahadonan aki ta cobra a base di comision y nan no ta mucho satisfecho riba forma cu e structura aki ta hinca den otro.

Abogado Figueroa a bisa cu e grupo di trahado aki a yega acerca e sindicato hasta prome cu e covid a bini Aruba. Pero e proceso a bini durante e crisis aki cu ta persistiendo ainda.

Resultado referendum

Mediador di Gobierno. Anselmo Pontilius a declara cu sindicato FTA a pidi e referendum, caminda 48 trahado por a haci uzo di e derecho aki, y di nan 42 a vota. Na final di e referendum a resulta cu 41 a vota pa FTA y 1 ta un voto invalido. E resultado aki -segun ley di referendum- ta mustra cu FTA a haya e mayoria di e mita plus un. Den e caso aki e sindicato tin derecho pa representa e trahadonan di Little Switzerland y formalmente negosha entre otro un contracto colectivo (CAO).

Ya caba tin otro referendum pa mañan di e trahadonan di Eagle Beach Resort cu ta parti den tres compania. Sinembargo tin un situacion cu e compania a procede den corte, caminda nan a pidi pa e referendum wordo posponi of cancela, segun Mediador di Gobierno. E caso aki ta wordo trata awe mainta y dependiendo di e resultado di e caso mester determina si mester cambia e fecha di referendum of cualkier otro situacion cu corte ta dicidi.

A pesar cu cada bes mas den e periodo aki di covid crisis e trahadonan ta buscando representacion sindical, Mediador di Gobierno ta haya cu e recurso di referendum tur tempo tin relevancia. Pa motibo cu e ta un derecho constitucional pa e trahadonan ta organisa. Sinembargo hopi biaha e trahado no ta consciente di e derecho aki.

Pero otro factor importante tin di haci cu e servicio cu e organisacion sindical ta brinda di defende e derechonan cu e trahado tin, pero sin cu e trahadonan lubida nan deber tambe. Igualmente e balor cu di un contracto colectivo cu ta regla den un landsverordening of ordenansa nacional.

 

LEAVE A REPLY

Please enter your comment!
Please enter your name here