Fundacion Anti Droga Aruba (FADA) su meta riba prevencion y conscientisacion contra abuso di alcohol y tur sorto di droga of adiccion a sigui, a pesar di e pandemia di Covid-19.

Recientemente, dia 16 di october, FADA a cumpli 36 aña di existencia. Hopi cambio e fundacion aki a conoce den transcurso di casi cuater decada, pero den e ultimo añanan e cambionan a bira mas acelera, evidente y necesario.

Durante un entrevista cu Bon Dia Aruba, director di e fundacion aki, Juendel Sprok a informa cu considerando e situacion di e pandemia, gobierno y FADA a pensa formalmente pa e fundacion aki por tuma over e parti preventivo di salud mental bao di dje. Entrante 1 di januari 2021, e fundacion aki ta cuminsa oficialmente cu e tarea nobo aki.

Otro cambio grandi cu ta tumando luga den FADA ta cu nan lo ta mas digitalisa. Nan ta bay mas riba social media. Nan ta bay focus mas riba salud mental. Y logicamente nan ta sigui mas atencion riba e otro sorto di adiccion cu ta existi, entre nan e video game cu ta wordo considera e droga nobo.

Pero entre tur e retonan cu nan tin actualmente esun principal ta e parti financiero. FADA como fundacion tambe ta wordo subsidia pa gobierno. Di nan presupuesto completo tambe a wordo corta cu 12.6%. E situacion financiero aki ta pone presion riba FADA su servicionan cu nan ta duna na comunidad. Sinembargo Sprok ta haya cu e ta bira un reto tambe. No ta cuestion di djis para keto. “Bo ta uza e recursonan existente y nobo.” E uso di tuma contacto cu comunidad via social media ta costa menos cu si bo ta uza otro tipo di medio pa yega na bo propositonan, el a bisa.

 

Retonan

Sprok a sigura cu nan a confronta diferente reto, manera otro instancianan local. Un di e retonan mas grandi ta cu FADA ta un fundacion cu ta duna informacion, mayoria di nan na scolnan y empresanan local.

Logicamente nan trahadonan preventivo ta bishita e sitionan aki, pero esaki a keda limita debi na e pandemia. Esaki a haci cu nan a bay mas tanto via online, specialmente haciendo uzo di plataforma di social media y website. “Nos a haci cambionan basta grandi den nos manera di duna informacion.”

FADA a traha un website completamente nobo, caminda tur informacion cu nan ta brinda ta poni riba e website aki y tambe tur nan programa informativo.

Igualmente Sprok a bisa cu e aña aki nan Siman di Bisti na Locura cu a inicia e siman aki ta wordo haci via website, y e ta bay automaticamente riba nan Facebook page. E retonan di e pandemia a haci cu FADA a bin cu mas cambio pa haci e fundacion aki mas moderno pa “nos cana hunto cu e cambionan cu mundo ta pasando aworaki.”

Sprok a laga sa cu FADA por a wak den e pandemia aki un problema grandi cu ta e uso di droga y alcohol. Un causa di esaki ta cu practicamente nos a wordo limita di un forma beneficioso di nos libertad pa preveni e contagio di e virus. Pero esaki a pone cu cierto hende a bay busca refugio na otro caminda.

Mundialmente e cifra ta mustra cu hopi hende a bay busca refugio den uso di alcohol, marihuana y gaming. A pesar cu casino tabata cera, esaki a pone cu esunnan adicto na esaki a busca otro manera pa gamble, por ehempel gamble online, cu ta un modalidad di wega cu a crece. E ta lamenta cu na Aruba no tin cifra, ya cu masha poco investigacion ta wordo haci riba e tereno aki.

Salud mental

FADA net prome cu Covid a bati nos porta tabatin combersacion cu gobierno pa e fundacion por amplia nan servicionan y pone mas atencion riba e parti di salud mental.

Den cuadro di esaki, FADA a bin cu diferente programa y tambe bin cu training pa nan empleadonan. FADA a yega di cera un convenio pa traha hunto cu fundacion Respaldo, caminda nan ta bay haya training for di nan profesionalnan. Sprok a bisa cu FADA su intencion ta pa hiba e informacion aki na scolnan, empresanan y comunidad en general.

“Nos tin cu compronde cu salud mental ta hopi mas cu djis depresion. Ya cu e tin di haci cu adiccion”

El a bisa cu practicamente nan ta estrechamente relaciona cu otro. Hopi biaha ora bo tin un depresion, e situacion aki por hiba bo na consumo di cualkier substancia legal of ilegal, y vice versa.

Director di FADA a bisa cu den e pandemia bo por wak cu algo hopi importante ta bo salud metal. “Si bo ta fuerte mentalmente, bo por surpasa hopi retonan cu bo ta topa cun’e.”

 

Droga nobo

Tambe el a referi brevemente riba e ‘droga nobo,’ caminda adiccion na video game ta wordo yama. Hopi mucha ta cay den dje. Sprok a declara cu ta wordo bisa cu un mucha mester stop di haci video game. Pero mas importante ta pa e mayor sa ki sorto di video e muchanan ta hungando. El a splica cu patras den e label di e video game ta wordo informa si e ta di violencia, educativo, edad, etc…

FADA kier educa e mayornan pa nan tene control ariba nan yiunan, por ehempel stipula un orario cu nan por hunga video game. Cuanto video game nan por hunga. Tambe ki sorto di video game, entre otro.

Igualmente FADA ta bay pone mas atencion riba abuso di alcohol. Nan campaña di Amigo Didi hunto cu Fundacion Siña lo wordo amplia y nan lo cambia nan strategianan.

Na final di nos entrevista, Juendel Sprok a cuminsa anuncia cu pa aña 2021 lo bay tin varios cambio tambe “positivo pa cu e fundacion.”