“Lo mi no mester a bolbe Parlamento pa pidi fondo pa Serlimar, si mi mester a saca e 6.5 miyon florin for di mi propio presupuesto.” Ex- minister di Desaroyo Teritorial, Infrastructura y Medio Ambiente Marisol Lopez Tromp ta enfatisa cu nunca el a spera di hereda un situacion den Serlimar asina deplorabel. Y no tabatin ningun otro opcion cu pidi mas fondo pasobra e compania te ainda, a pesar di e surceance van betaling, ta sigui cu problemanan financiero precario.

Lopez Tromp a bisa cu tur minister tabata lucha cu hopi crisis, for di enseñansa te cu Covid y su consecuencianan. Pero asina mes, el a sinti su mes hopi solitario. Pasobra e ta sinti cu e no a ricibi un sosten di su ex-coleganan. “Serlimar tabata riba mi agendia diariamente. Aunke cu e ta un compania sui generis.”

Rol Alan Howell y Dellanira Maduro

E ex-minister ta conta di e ex-director cu ta bringando su retiro den Corte, pero e ta sinti hopi bon di por a haya aprobacion di Hunta di Comisario pa kit’e. “Tabata obvio cu e ex-director no por a splica presupuesto ni duna otro detaye.”

Su enfoke tabata pa scapa Serlimar, y percura pa e compania por bira uno cu finalmente ta para riba su mes. CAFT tambe a señala cu e compania mester stop di depende di fondo di Gobierno. Sinembargo, prome cu por yega na e deseo ey, mester a traha riba un plan di recuperacion. “Nunca, den tur su añanan di existencia tabatin un business plan traha pa Serlimar,” Lopez Tromp a conta Bon Dia Aruba. “E ora ey mester a traha riba saneamento y baha gasto. Y ora contractnan tabata caba, ya no tabata renoba nan mas. Y ta eynan, hendenan tabata bay cas, pasobra e director (Koopmans) tabata manda hendenan cas, cu tur su derecho, pasobra no tin placa pa renoba esakinan.”

Esey a trece Marisol Lopez Tromp den problema cu partido POR. Mesora el a haya yamada cu mester prolonga e contratonan. Den reunionnan hunto cu ex-minister Oduber pero tambe den presencia di e dos parlamentarionan di POR, esta Alan Howell y Dellanira Maduro, tabata pone presion pa Marisol Lopez Tromp exigi di Serlimar pa renoba contratonan. “Mi tabata splica cu ami no ta bay haci esey. Serlimar ta un sui generis y si mi bay duna instruccion, nos lo a haya ‘more of the same.’”

Andin Bikker contra surseance van betaling

E presion a cuminza aumenta, ya cu contractnan tabata termina uno tras di otro y na comienzo di maart caba, tabatin un situacion mas fastioso y cu el a haya instruccion directo pa renoba. “Mi no por a haci esey, pasobra no tabatin sentido. Mi a busca un profesional pa seriamente atende e problema anto no por bay bis’e kico pa haci. Y ami tampoco tabata kier.”

E relacion cu POR a bira pio ora cu a dicidi pa bay pidi e surseance van betaling, esta pa pidi huez suspende e obligacion di Serlimar pa paga su debenan. “Mi a bay Parlamento pa pidi fondo adicional. E no ta manera Minister di Finanzas ta bisa awor cu mi mester a usa fondonan di mi propio departamentonan. Si mi tabatin e fondonan ey, lo mi no mester a bay Parlamento mes. Claro cu esey no ta deseabel pa ningun minister di Finanzas, pero no tabatin otro opcion.”

E decision di surseance van betaling no a cay bon cerca Otmar Oduber y Andin Bikker, ex-coleganan di POR kendenan no a mira e necesidad.

Grant Thornton

Bon Dia Aruba den pasado a ilustra cu e cifranan cu e quickscan ehecuta pa Grant Thornton a ilustra cu e problemanan financiero di Serlimar a acelera durante ultimo dos aña y mey. Pero ta netamente e quick scan aki tambe a usa contra Marisol Lopez Tromp, ya cu su casa ta partner principal di e compania. Pero, segun Lopez Tromp, tabata e minister di Gobierno anterior cu a busca Grant Thornton pa haci e trabao, y e tabata un herencia. Si e mester a keda como minister, pa evita conflicto di interes, e compania en cuestion lo no por a haci mas trabao pa Serlimar. “Pero e evaluacion financiero tabata uno cu tabata andando caba. Es mas, e rapport mester a conclui prome cu e aña anterior, pues 2019. Pero e director e tempo ey no tabata coopera pa duna e cifranan necesario pa conclui e analisis.”

Marisol Lopez Tromp a bisa di ta contento cu tin un quick scan cu pa prome biaha ta ilustra e realidad financiero di Serlimar. “Imagina si mester haci un analisis profundo mes. Ta kico lo a saca afo.” Pero na e momentonan aki tin investigacion andando den Serlimar, y pa motibo di e surseance, tin investigacionnan bao encargo di e persona apunta pa dirigi e proceso, cu ta mr. Geert Rep.

“Tur e cosnan aki a pone mi den un situacion hopi dificil. Na mei, ami tabata alivia cu e surseance pasobra a haya tempo pa busca solucion. Pero tanto Otmar Oduber como Andin Bikker tabata hopi rabia cu mi. Nan tabata mira cu ya POR no tabatin acceso den operacion diario. E minister di Husticia, como miembro di POR no tabata mira di con mester a scohe e caminda di surseance. Bikker tabata bisa cu Marisol Lopez Tromp mester a trece e decision pa pidi surseance van betaling den seno di partido di POR, despues Conseho di Minister y Parlamento prome cu a pasa pa paso legal asina. “Pero con por hiba e asunto di surseance den Parlamento pa un debate publico? Serlimar ta sui generis. Si cuminza cu e debate, tur hende ta haya sa di e situacion preta y e creditornan lo a manda Serlimar den bancarota mesora. E no ta normal pa discuti e cifranan publicamente.”

Problema financiero di Serlimar

Realidad ta cu Serlimar ta cobra pa su servicio pero e ta keda e responsabilidad civil di cada usuario pa en berdad paga. Motibo ta cu te ainda e cobranza pa recogemento di sushi no ta regla pa ley. Esaki a pega den Parlamento na 2019 y nunca mas a bin riba mesa pa debate. Y ta netamente e proceso ey cu e maneho nobo di Serlimar tabata trahando riba dje, ora cu Covid a dal y a tranca tur cos. “Nos mester a sinta pa hinca un plan den otro. Pasobra no por bay Parlamento sin business plan, sin plan di recuperacion, e plan di personal.” Lopez Tromp ta spera cu parlamentarionan keda realistico. E mes no tey mas. Pero e problema di Serlimar si a keda. Y pa e compania por sobrevivi, mester pasa e ley pa cobra. “Parlamentarionan kizas kier pensa riba un suma social.

“Si kier pa e compania sobrevivi, e cobranza mester ta uno realistico y no por ta uno social. No por ta populista.”

Ademas, mester bin cu un ley completamente nobo. Pasobra esun presenta na 2019 tabata inclui un asina yama ‘Mass Incinerator’ cu no ta realistico pa Aruba. No tin manera pa Aruba maneha un proyecto asina costoso, cu ademas ta rekeri pa importa sushi di afo. “Tin algun cambio mas cu mester bin den e ley. A traha un plan di recuperacion pa CAFT, y a traha silenciosamente riba dje.”

Evelyn Wever Croes

Te ora cu haci e cambionan den e ministerionan, Prome Minister Evelyn Wever Croes ta keda encarga cu Serlimar. Segun Marisol Lopez Tromp, e tabata tene Prome Minister informa di tur e desaroyonan. “Ami no tabata sinta den e reunionnan di Serlimar. Ta e director tabata confronta cu retonan grandi, di welga, trucknan y otro asunto cu tabata strob’e pa realmente atende e problema di sushedad. Y ta esey mi tabata informa Prome Minister di dje. E no ta facil. Ta un compania cu tabatin hopi protesta dirigi pa politica. Y ami a dicidi di lo traha diferente. Sindicatonan tabata custumbra pa bin directamente cerca e minister, y ami tabata manda nan pa e director. Si ta asuntonan di personal, mester bay director. Den esey ta henter un cambio di mentalidad mester bin,” Lopez Tromp a ilustra. E ta kere cu Prome Minister mester ta hopi consciente di e retonan aki tambe.

Candela na Dump

Ironicamente, un di e retonan cu personal a keda ilustra ayera, ora cu un biaha mas dump tabata na candela. Pero e manager encarga ningun momento a avisa e director. Bon Dia Aruba a tuma contacto cu Director di Serlimar Anko Koopmans kende a bisa cu e mentalidad di esnan encarga na Dump ta cu manera ta e director so mester soluciona. Nan ta riba e Dump y nan ta mira e desaroyonan. Apenas 5’or di atardi el a ripara e candela grandi. “Ta un candela cu a cuminza riba e mesun area unda luna pasa tabatin un candela grandi di tire. A tira matanan seco, y kizas abou ainda tabatin candela chikito ta kimando. A tira santo atrobe, pero e ta hopi cerca di lama y no por tira e sushi den lama.” Segun Koopmans, e personal riba dump a bis’e cu a tira santo y cu e candela a baha. Pero ta e mes a nota hopi huma ora cu e tabata bayendo cas despues di trabao. Un Koopmans irita a bisa Bon Dia cu e mester por conta cu su managernan ta actua segun nan responsabilidad. “Ta manera cu ningun di nan kier mustra debilidad den nan funcionamento. Esakinan ta e retonan diario cu mi ta topa na Serlimar, esta hendenan cu no ta preocupa mucho pa haci nan trabao debidamente.” Koopmans a bisa cu su enfoke awor aki ta pa mira con por domina e candela y despues lo mester mira con pa mehora cu e personal riba dump ta actua mucho mas diligente pa evita cu candelanan ta bira grandi.