Ta Aruba a tuma paso, pero nan ta pasonan hopi chikito. Derecho di hende, irespecto orientacion sexual y identificacion mester keda respeta. Asina mr. Boris Dittrich, Senador Hulandes, a bisa Bon Dia Aruba den un entrevista durante su bishita na Aruba. Dittrich tabata na Aruba recientemente, como parti di e delegacion di Eerste Kamer encarga cu Relacionnan den Reino.

“Si mester tuma nota cu na Boneiro, Saba ya hendenan di mesun sexo por casa, anto Aruba a keda hopi atras,” el a bisa. Esaki, a pesar cu a pasa e Codigo Civil nobo cu ta permiti parehanan di mesun sexo yega na un ‘geregistreerd partnerschap.’ Pero e areglo aki no ta duna e parehanan aki e mesun derecho cu un otro persona cu ta casa formalmente.

Laso cu Aruba

Boris Dittrich no ta desconoci cu Aruba. El a bishita Aruba den su calidad como Parlamentario Hulandes, pero tambe como turista pa bishita su famia cu tin mas di tres decada ta biba na Aruba. Su prima, kende ademas tabata traha como secretaria di e bufete di abogado unda Dittrich a inicia su carera prome cu bira Huez ta biba na Aruba hunto cu su famia. E laso ta uno fuerte. “Su mama ta di Corsou y ta mi madrina, pues ami semper a lanta ta tende di Corsou y Aruba. Pues mi tin un laso personal cu Aruba.”

Activismo

Durante e periodo largo cu Dittrich a sali di politica, el a uni na Human Rights Watch pa cual motibo el a muda pa New York y e tempo ey tambe e tabata bishita Aruba, pa reuni cu entre otro Desiree Croes, ex Parlamentario di AVP pa habri matrimonio pa personanan di mesun sexo.

Mester bisa cu e activismo di Dittrich no ta limita na derechonan igual di personanan di e comunidad LGBTQ, pero locual el a tuma nota cu a di e cambio den Codigo Civil, ainda mester haci hopi. “Ainda personanan di e mesun sexo no por casa na Aruba, a cu e pais ta parti di Reino Hulandes. E ta straño cu e por sosode na otro pais si e por.” Dittrich a bisa cu e ta papia cu parehanan di mesun sexo di Aruba cu a bay casa na Saba of Boneiro y cu nan famia ta acepta nan, pues nan no ta sinti discriminacion familiar. “Pero unabes cu e tema bira uno politico, mesora ta bin un actitud di rechaso, cu ta nifica cu e pasonan ta hopi chikito. Esey ta di lamenta.

Lo mi kier mira politiconan lanta para y tuma e curashi pa tuma e liderazgo, pa enfatisa cu aki ta trata derecho di hende, derecho igual. Cu un parti di e populacion por tin problema cu e tema no mester stroba derecho fundamental di hende.” Boris Dittrich ta bisa cu politiconan na Aruba berdad ta biba den un sociedad chikito, pero e ta convenci cu e votadornan lo tin aprecio pa e politico cu ta para pa derecho humano.

Prome politico pa sugeri matrimonio entre persona di mesun sexo

Boris Dittrich ta e politico cu a trece e discusion riba matrimonio entre personanan di mesun sexo riba mesa den Tweede Kamer na 1995. E prome reaccion tabata rechaso y despues di diferente discusion y estudionan a conclui cu e unico cu tabata stroba ta politica. Y finalmente na 2001, Hulanda a bira e prome pais na mundo cu a permiti personanan di e mesun sexo casa cu otro. Awor e ta un realidad na 30 pais. “Un den cada 7 persona cu ta biba riba mundo ta residente di un pais cu ta permiti casamento entre personanan di e mesun sexo,” Dittrich a comenta. “Y tur e ‘doomsday scenarios’ cu pinta no a sosode. Es mas, hendenan ta mas feliz, e paisnan ta mas feliz y nan economianan ta hasta miho. Pasobra paisnan cu brinda derecho igual ta yuda calidad di bida di paisnan.” Diversificacion na trabou, na empresanan, den un pais, e ta proba di ta hisa productividad y miho condicion pa tur hende, e Senador a bisa.

Non-Binary

Realidad si cu mientras cu hopi a cuminza custumbra cu e idea di personanan cu ta sea homo of lesbiana, awor tin un otro biento cu ta papia di personanan cu no kier ta identifica cu un sexo.

Dittrich ta compronde e confusion cu e asina yama grupo ‘non-binary’ cu no ta identifica nan mes cu un sexo. “Pero ami ta acerca e punto for di derecho humano. Tur hende tin derecho igual y no ta importa con un hende ta identifica su mes, e derechonan ta keda mescos. Tin tratadonan pa esey, y no ta importa e ‘gender.’ Mi ta kere cu pa personanan cu ta ‘non-binary’ tin e libertad pa bisa con kier pa atende cu nan y ningun sociedad tin e derecho pa exclui nan, sin preocupacion con nan ta mustra, kico nan ta bisa.” Segun e Senador, comunidad mester siña ‘deal’ cu e realidad aki. “Si ta exclui hende como grupo, unicamente bo ta crea problema,” mr. Boris Dittrich a bisa Bon Dia Aruba.