Aña 1972 a marca Nico Luydens su bida. Di un banda e fayecimento di su tata a haci cu Nico no por a bay Hulanda mas pa sigui su estudio, ya cu e no kier laga su mama su so. Pero di otro banda, Nico por a realisa su deseo di por a drenta finalmente na academia di baile, ya cu su tata no tabata mucho di acuerdo cu e idea ey, pasobra ‘esey no ta cos di mucha homber.’

E entrevista aki ta un reconocimento na Nico Luydens su amor pa bailamento den cuadro di Dia Internacional di Danza celebra dia 29 di april ultimo. E fecha aki a wordo scogi pa UNESCO pa recorda y conmemora e natalicio di e bailarin y coreografo Jean-Georges Noverre. E obhetivo di celebra danza su diversidad ta reconoce tur esnan cu a scoge e forma di expresion corporal aki pa supera tur tipo di limitacion cultural, politico y etico.

Dia Internacional di Danza.
Actualmente Nico Luydens tin casi 50 aña dedica na baile entre clasico, contemporaneo y folklorico, caminda el participa den diferente grupo di baile y tambe el a yega di representa dignamente Aruba den varios ocasion internacionalmente. Actualmente e ta un alumno y un bailado di Scol di Baile Diana Antoinette.

Tur aña riba e fecha di Dia Internacional di Danza nan ta organisa un show gratis na Cas di Cultura of tin biaha nan ta tin’e na Skol di Arte na San Nicolas. Di e forma aki nan ta cumpli cu exigencia di UNESCO pa den cuadro di e dia internacional aki e instancianan di cada pais of ciudad por organisa un evento publico y gratis pa duna contenido na e fecha special aki pa tur bailado y publico amante di danza of baile.

E biaha aki nan a cuminsa training caba for di tempran pa prepara nan show, pero a surgi e pandemia di coronavirus cu a haci cu nan show no por a tuma luga riba e fecha indica. E mes tin casi dos luna sin por training bon y sin por a bay scol di baile, ya cu e ta cera actualmente debi na e medida di distanciamento social y shelter in place cu ainda ta vigente.

Inicio.
Na 1973 Nico a cuminsa traha den e mesun compania cu ainda e trahando den dje, ya cu e meneer encarga cu van Dorp tabata bon amigo di su tata, y el a ofrece pa Nico cuminsa traha cerca nan. Pero unabes cu Nico a cuminsa gana su cen, el a dicidi di bay les di baile. El a cuminsa scol di baile den Arubaanse Danza Ballet School na Cas di Cultura.

“Ora cu mi a cuminsa haya les mi amor pa baile tabata asina grandi. Mi ta un fanatico ferviente di baile,” el a declara den e entrevista aki cu Bon Dia Aruba. Den un siman e tabata haya cinco dia consecutivo di les for di dialuna pa diabierna. E tabata sali for di su trabao 6’or atardi y di biaha e tabata bay su cas cambia su paña pa drenta y sali di les di baile for di 6:30 atardi te casi 10’or anochi.

El a cuminsa haya les di ballet clasico. Tambe el a bay les di ballet moderno, ballet jazz y finalmente les di baile folklorico cu ta e disciplina di baile cu Nico a destaca mas den dje. Nos baile folklorico tur ta di origen di afo, entre nan wals, danza, polka y mazurka. Locual si cu tempo nos a dun’e un bachi tipico di nos, y haci di nan nos bailenan.

Pa Nico Luydens ballet clasico ta e fundeshi di cualkier bailado, ya cu e ta base pa tur baile. E ta wak cu awendia nos generacion nobo cu kier drenta mundo di baile ta carece di e fundeshi aki. Nan ta pensa pasobra nan ta baila bon, nan por drenta un grupo di baile. “Bo ta ripara di biaha ora un mucha tin base y ora un mucha no tin base. Bo ta wak den su postura…”

E ta kere cu e cualidad principal cu un persona mester tin pa danza of baila ta bo deseo of gana di baila. Y percura semper gara e pasonan pa siña un baila, y pa esey bo mester bon oido y bon feeling tambe. Bo mester tin disciplina no solamente pa e lesnan di baile, pero disciplina tambe ora cu bo ta bay baila. Awendia e por mira cerca e mesun muchanan na nan scol cu ora nan ta yega edad entre 17 pa 18 aña, nan interes ta cay.

A pesar di esaki, Nico ta haya cu e simia pa sigui cu e tradicion di baile folklorico ta bon sembra cerca e generacion jong pa asina nan sigui mantene na bida. “Nan ta trahando duro riba dje.” Scol d Baile Diana Antoinette tin como factor primordial pa mix e integrantenan grandi di nan grupo di baile cu e hobennan. “E mucha jong di nos scol ta hopi interesa den nos bailenan.”

Hunto cu su les di baile, Nico a drenta pa prome biaha den un grupo di baile folklorico Ora Ubou cu Miky Gravenhorst. Pa full un decada nan a baila tur diadomingo na Holiday Inn.

Amor pa baile.
Durante tur su carera como bailado, Nico a bisa cu su maestra di baile ta Diana Antoinette, pero tambe e ta su partner di baile, ya cu semper Diana ta baila, e ta haci’e cu Nico. Ora cu Diana a lanta su propio scol, tambe el a lanta e grupo di baile di scol cu ta yama Teatro di Danza Arubano na aña 1975/76, caminda Nico semper a forma parti di dje, como jong y awor como adulto tambe, caminda nan tabata training tur baile di folklore. Nico ta bisa cu e Teatro di Danza Arubano a dun’e hopi satisfaccion y hopi bailamento na tur caminda.

El a yega di lanta hunto cu otro compañero un grupo di baile di musica mixto cu nan a yama Mangusa. E ta un cuminda di tera cu ta wordo prepara na Corsou durante temporada di Semana Santa. E grupo aki a existi 5 aña y el a bira un sensacion. E tabata un di e top gruponan di baile di Aruba. Nan a gana varios premio y tambe nan a yega di haci presentacion na Venezuela, Corsou, Bonaire y Hulanda.

Asina Nico Luydens su carera di casi 50 aña den mundo di bailamento a bay, entre bay tuma les di baile y sigui bay baila. No solamente den cantidad di actividad cultura local pa celebra un fecha of acontecimento importante. Sino tambe representando e miho cara di Aruba den exterior.

El a yega di gosa hopi di su carera di baile y aunke e ta birando mas grandi su pasion keto bay ta baile. Den tur e shownan cu tin, semper e ta percura pa t’ey. Tin biaha su weso ta dolor, y mescos cu un porta ta zona ora cu e ta cuminsa frustia, e ta spuit e parti ey cu WD-40 pa calm’e, y e ta bira bon bek. Esey ta un di su trikinan cu Nico Luydens ta usa, prome cu e ta cuminsa un presentacion di bailamento pisa.