Partido opositor AVP den un mocion siman pasa den Parlamento, dia 30 di april 2020, a demostra nan desacuerdo cu e maneho di e actual ministro encarga cu Desaroyo Teritorial, Infrastructura y Medio Ambiente, drs. Marisol Tromp, encuanto e politica nobo formula pa emision di tereno di huur. Esaki, di banda di e ministro, den un intento pa atende e interes cu tin pa tereno pa agricultura, den e crisis economico actual causa pa coronavirus. Segun e mandatario e proceso aki ta requeri actua rapidamente.

Loke a bin cune ta un proceso di asina yama re-inscripcion, den cual tanto esnan cu a yega di entrega peticion pa tereno di huur anteriormente, y esnan cu awor tin interes pa haya tereno di huur, por inscribi awor. Esun cu a inscribi anteriormente y no reacciona den e proceso aki, reconfirmando su anterior peticion, lo considera cu e persona ta duna di conoce na DIP “cu no ta interesa mas den bo peticion anterior haci y lo considera bo peticion termina,” asina e formulario cu departamento di Infrastructura y Planificacion (DIP) a divulga pa e proceso di re-inscripcion, ta bisa. E proceso di inscripcion nobo ta di 20 di april te cu 20 di mei proximo.

Pa garantisa rapidez di e proceso tambe a stipula cu cada peticion (nobo) mester ta acompaña, dentro di 30 dia despues di e confirmacion di e re-inscripcion, di un segundo peticion cu e datonan corespondiente manera indica den e formulario di re-inscripcion. Si no entrega e datonan pidi aki dentro di 30 dia di e fecha di confirmacion di re-inscripcion via e-mail herinschrijvinghuur20@dip.aw, lo considera e peticion (nobo) tambe como termina.

Obhecion di oposicion tabata concerni e rapidez cu cual ta atende e asunto, di manera cu no tur hende ta na altura di e maneho nobo anuncia pa e mandatario. Di e manera aki esnan cu a registra anteriormente ta perde nan peticion si nan no reacciona di biaha awor reconfirmando nan peticion.

Tambe oposicion ta considera cu e manera di emiti tereno (di huur) mester ta manera ancra den ley, den e caso aki e Landsverordening Uitgifte Eigendommen (AB 19989 no. 21). E articulo di ley na cual e fraccion opositor lo ta referi, ta articulo 26, cu ta bisa cu si ta emiti tereno di (entre otro) huur pa mas di cinco aña, esaki ta tuma lugar “bij openbare inschrijving” (inscripcion publico). Punto di debate lo ta si e proceso eligi actualmente ta un inscripcion publico, ya cu sigur den e caso di re-inscripcion ta trata di un peticion individual haci cu un tereno specifico den mente.

E requisitonan cu ta pidi hunto cu e peticion ta concerni informacion concreto di e proyecto planifica, incluyendo datonan di e proyecto, manera tipo di metodo y cultivo, tamaño di tereno necesario, un distrito alternativo, un business plan y inversion planifica. Tur esaki ta mustra cu kier evita duna tereno na persona cu talvez no ta bay haci tanto cu esaki.

Finalmente e mocion di patido AVP a keda rechasa pa e mayoria gubernamental, cu parlamentario Daphne Lejuez apoyando e preocupacion di e partido opositor.

Nota di redaccion:

Riba su mes ta di comprende cu e ministerio ta desea di atende e productornan serio cu di berdad ta bay haci algo cu e tereno adquiri. Sin embargo, nos ta haya falta di un maneho unda ta explicita di ki tipo di cultivo ta haya prioridad. No ta splica cu por ehemplo preferencia ta pa ‘horticultura’ di producto di calidad y valor halto, cu metodo moderno di control di awa y plaga, cu no necesariamente ta exigi tereno grandi. Tereno relativamente grandi pa cultivo tradicional cu tur su costo y riesgonan lo no tin prioridad den esaki. Lo ta bon si e ministerio por duna mas informacion tocante e prioridadnan aki, sino e ta keda parce un maneho ad-hoc.