Durante e entrevista aki, director interino di Museo Arqueologico Nacional di Aruba (MANA), Pancho Geerman, y Renwick Heronimo kende ta curator di Fundacion Museo Arubano (FMA) a referi na e prome concepto di un plan strategico pa MANA, cu ta carga e nomber di “MANA: Manteniendo nos Herencia Bibo den Tempo.”

Recientemente e concepto preliminar aki a wordo presenta na Minister di Cultura, Xiomara Maduro y tambe den un forma virtual na representantenan di UNOCA y Banco Central di Aruba (CBA).

For di augustus 2019, como director interino di MANA, Geerman su encargo tabata con pa optimalisa e organisacion. E museo tabatin 2 aña cera pa publico, y un di nan prome tarea tabata pa e luga habri di nobo, locual a sucede tres luna despues. El a bisa cu manera un cas den transcurso di tempo, bo necesidad ta cambia. E punto crucial a bira con bo por sigui uza e mesun espacio cu bo necesidad di awor.

E museo aki ta consisti di diferente edificio di gran balor monumental y historico. E meta ta pa MANA bira un museo multi-funcional pa asina maximalisa e experiencia di e bishitantenan den cada edificio cu ta forma parti di e compleho aki, relaciona cu e famia Ecury. Pero tambe un edificio cu ta contene nos historia y nos herencia arkeologico.

Pero tin otro espacio hopi fuerte den e compleho aki cu antes tabata un fruteria. Un espacio cu tabata wordo uza, pero no optimalmente, segun Geerman. A base di esey, y mirando importancia cu e compleho di MANA ta como monumento cu un historia di famia Ecury, basicamente el a acerca Renwick Heronimo, kende a traha un prome concepto di e plan.

El a aclaria cu esaki no kiermen cu e prome concepto aki lo wordo ehecuta shen porciento. Pero e base di e concepto si lo sigui. Awor lo tin un periodo di evalua kico tur lo wordo realmente ehecuta y con nan ta bay ehecut’e. Lo por tarda dos aña ainda prome cu nan lo por cuminsa ehecuta e concepto aki.

Nan a presenta e plan na e organisacion cu tambe lo ta parti di e desaroyo di e plan aki. Na prome luga minister di Cultura mes cu ta esun responsabel, UNOCA y CBA.

Multi-funcionalidad

Geerman a laga sa cu e parti di multi-funcionalidad ta hopi importante. Actualmente e organisacion di e museo ta conta di un parti cu ta haci investigacion, y como tur investigacion, esaki ta tuma su tempo prome cu e ta bay publico. Pero banda di esey tin e parti di educa y informa cu ta otro aspecto di MANA. E di tres aspecto tin di haci cu e parti di exposicion permanente cu tin cierto elemento interactivo, pero e por hopi mas, segun Geerman.

E multi-funcionalidad cu nan ta mira den MANA ta wordo traduci como un potencial economico enorme pa industria creativo na Aruba. Geerman a yega di traha den e ramo di artesania na aña 1984/86, y e ta haya cu si bo ta ofrece un producto original tanto pa nos hendenan local como bishitantenan, tin su mercado p’e.

El a bisa cu e compleho di edificionan cu MANA ta situa ta representa hogar, comercio y comunidad. Encuanto e aspecto di comunidad el a referi cu e museo ta ubica den Rancho, caminda e parti di comercio informal tin su merito. Tambe na 2024 lo wordo conmemora 200 aña di Oranjestad. El a menciona cu Stichting Rancho a lanta tempo cu a habri MANA den e bario historico aki. Ultimo añanan, MANA ta coopera cu e fundacion aki, y nan sede pa informa publico, ta den instalacion di e museo mes.

“E multi-funcionalidad ta hopi amplio. Pero bo ta reforsa locual cu tin caba, pero di otro manera,” Geerman a bisa. Igualmente el a laga sa cu MANA ta conta cu un hardin cu ta un joya scondi. E ta un caracteristica di hopi edificio di Aruba di cuminsamento di siglo pasa cu tabatin un hardin bunita.

Plan strategico

Un aspecto cu a wordo tene na cuenta cu e funcionalidad di e plan aki ta e mesun concepto di e titulo di dje, MANA: Manteniendo nos Herencia Bibo den Tempo.

Renwick Heronimo kende a hinca den otro e plan aki a bisa cu hopi biaha nos ta pensa den arkeologia como algo morto. “Pero arkeologia ta bibo den asina hopi diferente manera cu bo no ta realisa mes mas …” el a sigura. El a trece por ehempel cu den e pais bisiña di Colombia e cultura Amerindio ta existente te dia di awe, practicando nan tradicion y culturanan.

Un concepto actual di museo ta: “Un museo ta un institucion sin animo de lucro y permanente den servicio di sociedad y su desaroyo. Habri pa publico cu ta adkiri, conserva, investiga, comunica, y exhibi herencia tangibel y intangibel di humanidad y su ambiente cu e proposito di educacion, estudio y entretenimento.”

Otro concepto cu ta un punto di discusion internacionalmente ta esun di museo mes. Pasobra Internacional Council of Museum (ICOM) a defini durante su ultimo conferencia aña pasa, museo como un agente di cambio y dialogo, aunke ainda e concepto aki no a wordo ehecuta cabalmente. Pues e ta haya cu e ta un concepto mas amplio. Un concepto cu e mes ta haya cu un museo no ta unicamente “un exposicion statico mas.” Pero awor e coleccion ta wordo co-relaciona den un contexto mas amplio. For di e punto conceptual aki Heronimo a elabora e plan aki.

E museo y tambe e patrimonio cu ta contene den dje, te hasta cierto punto, tin cu garantisa cu e generacion di awe ta wak balor den locual ta traspasando pa e proximo generacionnan.

Un aspecto cu sigur mester defini ta: Si full e edificio aki ta keda Museo Arquelogico. Si e ta keda museo arkeologico, esaki kiermen cu tur exposicion cu ta wordo organisa mester ta parti di e contexto aki. Es decir mester keda uza e aspecto di arkeologia den nan narrativa.

Encuanto e edificio mes, e idea ta den e momento aki, pa defini un solo entrada, unda e publico lo por tin acceso na e diferente exposicion, sin mester sali for di e compleho aki. E tin un fachada bunita cu diferente alocacion cu nunca tabatin un funcion permanente. Nan idea preliminar ta esun di crea exposicionnan pa bay den e espacio ey.

Un aspecto cu nan kier tene na cuenta den e diferente exposicion ta e historia di e doño original di e edificio aki y nan famia. E famia Ecury, un famia hopi grandi cu un herencia multiracial. Un aspecto importante pa loke ta cultura di Aruba y cultura di Playa.

Heronimo a splica cu nan ta pensado di uza e concepto di hogar y famia, y nan relevancia social den e periodo historico ey (1850-1950). Tin imagennan, mueble, artefactonan, etc.. relaciona cu e periodo ey. Pero tambe funcionalidad di e cas: Con e famia tabata biba den e cas aki, etc… Tur esaki conservando e aspecto di esencia arkeologico di e museo.

Pa loke tabata e localidad di e fruteria, e por bira algo participativo pa mucha, caminda nan por cumpra of bende uzando moneda cu tabata forma parti di nos historia y tambe den contexto Amerindio.

Tambe e lo por bira posiblemente localidad ideal pa bin cu un coleccion importante di moneda cu ta un simbolo nacional. Un di nan partner ta Banco Central di Aruba (CBA) cu kier pone atencion riba nos moneda local. Pero tras di esaki tin no solo e aspecto di placa sino di balor. Kico balor ta? Balor ta bo bienestar, dignidad y calidad di bida, etc…

Den otro localidad por bin un exposicion di descubrimento arkeologico nobo. Tin dos investigacion cu a tuma luga recientemente, esun di e santana indjan na Santa Cruz, y tambe di e pinturanan indjan (petroglifo).

Igualmente e plan strategico aki tin na cuenta e bunita hardin cu e museo aki tin, y practicamente e no ta wordo probecha debidamente. Tur e plan aki mester wordo ehecuta cu ayudo di expertonan, entre nan e arkeologonan.

Un aspecto importante -segun Heronimo- cu no mester lubida ta esun di e sostenibilidad di e museo; y tambe e potencial di economia creativo como un sector pa diversifica nos economia. El a bisa cu no por tin e desaroyo ey, si nos no tin economia di museo den su luga cu por inspira e empresarionan creativo.

Na final di nos entrevista un idea cu Heronimo ta gusta ta esun di ‘Reposition as a humanities laboratories.’ El a expresa: “Bo no por wak un espacio como algo morto. Ora un persona ta drenta aki den y bo ta stimule pensa.”