clyde entrevista dia prensa.jpg

Sr. Clyde Harms ta un habitual colaborado di prensa pa medio di su articulonan publica den diferente media di comunicacion, ya sea corant of digital. Nan articulo generalmente tin un contenido cultural y historico cu ta hala hopi atencion. Pero tambe el a yega di skirbi articulo caminda e ta expresa libremente su opinion riba topico controversial y di debate den nos comunidad entre nan e reconocimento di union entre pareha di e mesun sexo. 
Durante e delaster decada el a yega di skirbi por lo menos 400 articulo riba tur sorto di topico. Y aunke e no ta traha directamente cu un medio di comunicacion, e ta considera su mes como un miembro di e gremio periodistico. 
El a cuminsa su relacion cu prensa tempo cu e tabata maneha Burger King, caminda e tabata manda comunicado pa promove nan empresa, pero tambe pa Relacion Publico.  Tempo cu el a bay universidad na Merca, el a tuma un curso di periodismo, pero su interes pa periodismo a cuminsa tempo cu e tabata un mucha den cuadro di II Guera Mundial.  Clyde su tata tabata abonado  na Life Magazine cu tabata publica potretnan di e acontecimento mundial aki, y Clyde tabata wak nan  y lesa e leyendanan. For di e tempo aya el a bira un lesado ferviente di corant.
Negativismo 
Awe cu nos ta conmemora Dia di Prensa, Sr. Harms ta considera cu nos nivel di prensa ta laga hopi di desea. “Mas abou e no por bay. Sorry di bisa pero nos calidad di prensa ta hopi abou”, el a expresa.  
El a yega di tende di personanan cu nan no ta lesa su articulonan pasobra nan no ta lesa corant. Y esun cu ta lesa nan den corant ta expresa nan gradicimento, ya cu e ta skirbi articulo di un forma sano.  
E ta compronde di un banda cu corant ta un negoshi y si un incidente ta causa sensacion, pues nan ta publica esey.  Un refleho di e negativo di e corant ta wordo refleha den nan edicion di dialuna caminda hopi atencion y publicacion ta wordo duna na incidente di accidente, atraco, bringamento, hortamento, etc… “Kisas esey ta loke nan tin pa reporta, por ta”, el a declara.     Pero tambe e no ta descarta cu por ta esey ta indica un situacion social cu nos ta pasando aden, y cu corant ta raporta  nan.  E no sa eticamente unda e linea mester wordo defini riba haci hopi enfasis riba e sucesonan ey.
Mientras cu e no ta haya cu prensa ta enfoca riba cos positivo tambe. Recientemente el a observa cu durante e desaroyo di Nuevo Mundo Festival, solamente tabatin un corant cu nan mes a traha un par di articulo. Mientras cu e otronan a haci uzo di su relato di prensa tocante e evento aki, y niun dia nan a manda un fotografo of un redactor. Mientras cu otro tipo di evento pa un rason of otro, presencia di prensa ta bon representa. 
“Si no kier trece un poco di cultura akinan, corant ta den nan luga pa nan tambe participa…”, el a bisa. 
Periodismo mas positivo 
Sr. Harms ta boga pa un periodismo mas positivo y cu por resalta e balornan humano di nos hendenan. Pero tambe articulonan inspira den obranan caritativo.  “Ora mi ta observa algo cu ta inspira mi pa skirbi, mi ta skirbi…”, el a bisa.  
Pa un rason of otro, el a sinti e inkietud di sigui skirbi mas regularmente riba su hubentud den e bario di Lagoen. E articulonan aki a bira asina popular cu e hendenan a curasha su persona pe compila e historia aki den un buki cu a bira un obra publica 5 aña pasa. Aworaki el a bin cu un buki nobo cu pronto lo wordo presenta cu tambe ta un compilacion  di articulonan publica di su historia di bida na Libia.
E ta corda cu un biaha un di su trahadonan di Burger King a salba un mucha na San Nicolas, y el a skirbi riba esey. Tambe Sr. Harms ta corta cu tempo cu e tabatin Taco Bell a skirbi un articulo pa destaca e honestidad di un trahado Colombiano kende a haya un cartera yen di placa y a entrega nan sin mishi cu nada. 
“Mi ta corda cu e tempo aya e Colombiano tabatin masha mal reputacion na Aruba como hendenan cu mal comportacion”, el a bisa. Pa premia e comportacion di su empleado, el a convoca un conferencia di prensa y el a skirbi un articulo tocante e acto di honestidad aki. 
Un posicion cu e ta asumi ta esun di no critica, y e ta haya e ta e clave cu e hendenan ta gusta lesa su articulonan pasobra nan ta positivo. 
Asociacion di prensa 
Sr. Harms ta haya tambe cu ta existi un necesidad di bin cu un periodismo mas di investigacion cu ta percura pa nos tin hende mas honesto den tur esfera di nos comunidad.   
Tambe algo cu e ta lamenta cu e miembronan di prensa no por forma un asociacion di miembronan dedica na e profesion aki. E ta corda cu tempo di e inolvidabel periodista, Jos van der Schoot, el a funda un asociacion. 
“Seguramente nos na Aruba cu ta un isla chikito cu poco trahado, nos por uni forsa pa mira kico nos por haci hunto…”, el a bisa. 
Un di e tarea di e asociacion aki lo ta eventualmente trece oradonan di afo pa haci presentacion cu lo por yuda e miembronan di prensa amplia nan conocemento. El a aplaudi e iniciativa cu algun tempo pasa Bon Dia Aruba su doñonan a organisa un conferencia cu hendenan di peso di Latino America na Renaissance Convention Center.  E ta kere cu e tipo di actividad educativo ey ta algo cu nos mester boga pe.  E ta haya cu un asociacion ta e plataforma ideal pa conhuntamente trece orado experto di afo pa duna charla y pa mustra cu tin hopi cos cu nos por haci den prensa.  Actualmente masha poco ta wordo haci y p’esey e ta aplaudi sr. Leo Vrolijk su iniciativa cu e ta bin realisando su exposicion di fotografia pa varios aña caba. 
Un conseho cu e ta trece dilanti ta di pone leyenda den cada potret, ya cu aunke un potret ta bisa mil palabra, pero un “potret den un desierto no ta nifica nada”. 
Esaki ta un problema cu e ta haya den prensa imprimi na Aruba y cu e ta haya cu ta demanda un cambio pa bin cu leyenda riba nan potretnan publica, pasobra un hende cu no tabata t’ey no sa di ki ta trata. Esaki ta un problema cu e tin cu varios corant cu ta publica su articulo, cu nan no ta pone e leyendanan, aunke e ta manda nan.

LEAVE A REPLY

Please enter your comment!
Please enter your name here