Nos ta drentando den e ultimo dianan pa asina nos bai urna electoral y asina nos deposita nos voto pa e partido cu nos ta kere cu lo sirbi nos pueblo di Aruba den e miho forma. E eleccion aki dor di e pandemia lo bai ta uno differente. 

Aruba ta den un crisis paso di tanto entrada cu nos pais tabata tin nunca a traha un dam pa warda awa. Pa hopi tempo nos a biba di un solo pilar economico cu ta turismo. Un cos nos mester compronde cu como politico bo ta jama pa administra e placa di pueblo y hasi bo mes donjo di dje. Ora tur pais a cerra nan porta Aruba a keda sin turista. Nos ta kere cu esaki mester bira un les pa nos tur y pa nos por cuminsa desaroya mas pilarnan economico.

Un cos hopi importante cu nos mester tene cuenta cu ne ta cu tur cos akin a Aruba ta wordo importa y nos ta depende di exterior. Nos ta kere cu e mester bira un prioridad pa nos cuminsa cultiva mas hopi possible pa nos tin nos propio cuminda. Pesey mes e cartera di agricultura, cria y pesca den e siguiente eleccion mester haya un lugar importante den e programa di gobernaciony mester tene na debido cuenta cu ne. E pandemia aki a hasi cu prijs di cuminda a subi y pa nos aki na Aruba productonan  importa ta bira mas carro.

Nos di partido Curpa den nos programa di gobernacion (curpa.org)  tin poni cu e remedy natural por bira un pilar economico. Mundialmente tin un mercado di 107 biyon di dollar y si  nos cu nos producto nacional nos por logra haya sikiera 1% lo ta mas cu bon bini na aporta grandemente na nos economia.

Aruba ta rondona pa lama y nos mester bin cu un compania national di pesca unda cu lo crea oportunidad  pa no solamente crea cupo di trabao pero tambe cu e pueblo di Aruba por haya pisca na un prijs mas barata y cu miras riba exportacion. Nos piscadornan local mester forma parti di e projecto aki y asina nan por ta accionista y na mesun tempo trahador di e negoshi aki.  Bida di un piscador no ta nada facil.

Partido Curpa ta kere cu mester bin cu un tax holiday pa atrae inversionistanan pa inverti aki na Aruba cu e solo meta di crea cuponan di trabao. Nos ta tin tambe den nos programa e Public Pueblo Partnership caminda e pueblo lo por inverti den N.V’s nan exitoso. Banda di dje lo crea un instituto pa proteha e invercion y pa tin un miho control y tambe pa evita corrupcion. Di e forma aki e homber chiquito tambe mester por recibi su dividend y hasie mas independiente for di gobierno. Un solo meta crea un miho calidad di bida pa nos hendenan.

Locual cu nos no por laga afo ta e ley di referendum. Leynan importante cu ta toca nos pueblo y inversion nan di hopi placa mester por tin participacion di nos pueblo. Esaki lo bira un mecanismo tambe pa ora cu gobierno no ta cumpli cu locual cu nan primiti pa mande cas y no warda despues di 4 anja te ora di eleccion.

Partido Curpa ta kere cu e eleccion aki lo bai ta uno di sorpresa. Partidonan tradicional ya no tin confiansa mas di pueblo. Canando den pueblo nos por scucha e desgusto grandi cu tin caminda cu politiconan ta primiti ora di campanja y ora nan ta den gobierno nan ta lubida kiko nan a primiti. Mas pio ta cu ora nan sinta riba e stoel di ministro nan no ta reconoce mes mas e hendenan cu nan a primiti y sigura trabao. E pueblo di Aruba tin e politiconan aki door en door y nan no tin confiansa mas den nan.

Nos di partido Curpa ta un partido conservador unda cu nos ta kere cu a jega tempo pa duna principio, norma y balor un lugar importante den nos bida. Na Curacao nos por mira cu partidonan cu ta na fabor di leynan di hende y ta bai contra leynan di Dios a haya un derrota den eleccion cu a pasa. Nos di partido Curpa ta kere cu e eleccion aki lo bai ta uno differente paso pueblo lo vota differente y e resultado lo bai ta differente. Partido Curpa lo marca e differencia. E biaha aki no ta ni geel ni berde sino binja (scur) e ta, nos partido victorioso, boso partido Curpa.