Mayornan na estado di Washington no lo por pidi un exencion personal of filosofico pa nan yiunan no ricibi e vacuna combina di sarampi, cacheton y bruela prome cu nan cuminsa bay crèche of scol, segun un medida firma diabierna ultimo pa gov. Jay Inslee.
E estado a mira mas di 70 caso di sarampi e aña aki, y Inslee a firma e legislacion na Vancouver City Hall, e condado den cual mayoria di e casonan ey tabata centra. E ley nobo ta drenta den vigor na fin di juli.
Inslee a bisa cu mientras e legislacion ta un stap importante den salud publico, el a adverti cu no ta haci ‘tur locual ta necesario pa proteha e salud di nos ciudadanonan mas vulnerabel’.
“Nos lo mester scucha di ciencia y medicina, no rednan social”, el a bisa. “Ciencia y berdad ta tene nos saludabel, na luga di miedo.”
Centronan pa control y prevencion di enfermedad a reporta cu te na fin di siman pasa, a confirma 764 caso di sarampi den 23 estado.
Washington ta entre 17 estado cu lo permiti algun tipo di exencion di vacuna no- medico pa motibo personal of filosofico. Ademas, exencionnan pa motibonan medico y religioso ta existi pa asistencia na e scolnan priva of publico di e estado, of crèche licencia. Exencionnan medico of religioso ta keda bou e medida pasa pa Legislatura luna pasa.
A menos cu reclama un exencion, muchanan mester ta vacuna contra of mustra prueba di inmunidad adkiri pa casi un dozijn di malesa – incluyendo polio y sarampi – prome cu nan por bay scol of crèche.
Departamento di Salud di e estado a bisa cu 4% di studiantenan K-12 na Washington tin exencion di vacuna no- medico. Di esey, 3.7% ta exension personal, y resto religioso.
Mientras e estado prome a busca un ley cu lo elimina e exension filosofico pa tur vacuna rekeri den infancia, ambos camara a bay di acuerdo pa bay dilanti cu un legislacion cu lo enfoca unicamente riba e vacuna pa sarampi, cacheton y bruela – conoci como MMR (measles, mumps, rubella).
