Estatua di Padu Lampe, Rufo Wever y Lio Booi ta instala riba Plaza Padu

Diasabra henter dia a dedica na e transporte di e estatuanan for di tayer di e artista na Turibana, pa nan luga riba e monumento na Plaza Padu na Oranjestad. Mas cu 12 ora a tuma pa por a keda cla.

Manera a keda anuncia, for di mainta tempran a bay cerca artista Ciro Abath pa realisa e transporte di e estatuanan na un manera masha cuidadoso. E vehiculo di carga a haya asistencia di Cuerpo Policial cu a habri caminda y a yega safe na Playa. Pa medio di un grua y cu ayudo di varios persona, a lanta e piesanan cu precaucion pa pone nan riba e plaza. For di eynan a cuminsa cu e trabou di instalacion.

Loke inicialmente a pensa di ta bay tuma djis un par di ora, a converti den un hazaña cu a transcuri durante henter mainta, atardi y comienso di diasabra anochi. E motibo ta hustamente e atencion cu a pone na tur detaye, for di con ta cubri e estatuanan y con ta pone nan riba e truck, te na con nan ta wordo baha bek y instala na e posicion final. Plaza Padu tin un importancia sumamente grandi no solamente pa dedica e honor aki na Padu Lampe pa tur loke e ta nifica pa Aruba, pero tambe naturalmente pasobra e inauguracion di e plaza ta e coronacion di renobacion di centro di ciudad y di e restauracion di centro di gobernacion.

Prome Minister Mike Eman ta gradici tur esnan cu a forma parti di e esfuersonan di diasabra ultimo. E ta hopi orguyoso di e aporte cu cada persona a pone pa logra haci e trabou. Ciro Abath y su ekipo, pero tambe tur esnan di su Ministerio cu a duna un man, na Cuerpo Policial y tambe Departamento di Obranan Publico (DOW). E mandatario a expresa e sentimento aki personalmente na cada un den oranan di anochi ora cu a keda cla.

Mientras tanto e trabounan ta continua den preparacion pa e ceremonia grandi di inauguracion cu tin programa pa diabierna awo 17 di maart. For di 6or di atardi e ceremonia ta cuminsa y ta consisti di diferente aspecto manera presentacion di nos artistanan local, presencia di e propio Padu Lampe y e gran desvelo di e estatuanan di su persona hunto cu co compositornan di nos himno nacional, Rufo Wever y Lio Booi.

You May Also Like

Noticia falso riba Citgo

Ultimo dianan ta circula un noticia cu ta aparenta di ta di Oil & ...

auto ta bolter na Franse Pas (5).jpg

Dama ta perde control ariba su vehiculo y ta bolter na Franse Pas

Diasabra atardi polis ta bay bocht di conoci na Franse Pas pa un auto ...

DSC00010.JPG

Homber ta pone fin na su bida na Sero Colorado

Diahuebs marduga polis ta bay un adres pabou di e misa den Sero Colorado ...

Gobierno: cortando 8 miyon den personal

Prome minister Evelyn Wever-Croes (MEP) a anuncia con a corta gasto den su presupuesto, ...

Gobierno a adopta Trayecto di Formacion Social

ORANJESTAD – Ayera tardi gobierno a firma e convenio pa continua cu e Trayecto ...