(AP)—Un revista medico a hala dos estudio aden bisando cu e ta mustra e peligernan di e pildo pa abortus yama mifepristone, citando conflictonan di interes pa e autornan y defectonan den nan investigacion.
Dos di e tres estudio cu a ser hala aden pa compania di publicacion Sage Perspectives a ser cita den un huicio den corte na Texas cu a menasa e acceso na e pildo. E Corte Supremo Mericano lo tuma e caso over otro luna, y ta anticipa un huicio riba esaki mas despues den aña. E huicio di e corte por afecta acceso nacional na mifepristone, incluyendo di e ta keda disponibel via post.
Medicacion pa abortus ta conta pa mas cu mita di tur abortus cu ta tuma luga na Merca, y tipicamente ta envolvi dos droga: mifepristone y misoprostol. Ambos estudio cita den e huicio a ser publica den e revista Health Services Research and Managerial Epidemiology. Esakinan a ser apoya pa e Charlotte Lozier Institute, cual ta parti di un grupo di abogacia cu ta busca pa caba cu acceso na abortus.
Un investigacion di 2021 a investiga 423,000 abortus y mas cu 121,000 bishita pa centro di emergencia siguiendo e uzo di medicacion pa abortus y abortus conduci via un procedura medico entre 1999 cu 2015. Investigadonan a conclui cu abortus via medicacion ta “consecuentemente y progresivamente asocia cu mas bishita pa centro di emergencia despues di abortus” compara cu otro tipo di morbosidad.
Un investigacion di 2022 a conclui cu falta pa identifica un abortus previo durante un bishita pa centro di emergencia—sea via un dokter of pasobra un pashent a scondi’e—ta “un factor di riesgo significante pa un admision pa hospital.”
Hues di districto Matthew Kacsmaryk a cita e estudionan den un huicio controversial cu lo bay pa e Corte Supremo otro luna. Basicamente, Kacsmaryk a apoya e banda di un grupo medico conservativo, argumentando cu e aprobacion original di mifepristone tabata defectivo pasobra e no a paga mucho tino riba e problemanan di siguridad cu e pildo.
El a cita un di e estudionan por medio di declara cu mifepristone ta causa “hopi efectonan intenso.” E huicio tambe a cita e segundo estudio por medio di splica con dokternan anti-abortus tin e derecho pa trece nan caso dilanti hues—en bes di mustra cu nan a haya daño directamente pa via di un producto, e hues a bisa cu abortus medico ta causa presion y stres enorme” riba dokternan.
Hopi expertonan legal y profesionalnan medico tabata hopi skeptico di e argumentonan y e estadisticonan cita den e decision di e hues, y un corte di apelacion federal a anula algun parti di e huicio den zomer aña pasa.
