Arthur dowers

Recientemente detenidonan den KIA a cende candela den diferente parti di e bloknan di cel, unda cu a causa daño grandi. E situacion a forma un menasa pa bida di hende y Ministerio Publico ta haciendo un investigacion pa saca afo ken ta e sospechosonan den e caso aki, segun minister encarga cu husticia, Arthur Dowers ta informa.

Castigonan pa actonan asina por yega te un maximo di 15 aña, Minister Dowers a splica, agregando cu e ta spera tambe cu lo pidi e castigo maximo pa esunnan cu a pone e bida di presonan y e trahadonan na peliger. Loke a tuma luga ta inaceptabel y intolerabel, e mandatario a expresa y mester haya sa exactamente kendenan ta envolvi.

E daño causa pa e candela a pone husticia den un situacion fastioso y Minister Dowers ta gradici tur esunnan cu a traha duro pa e daño keda limita. A cuminsa tambe cu inventarisacion di loke a bay perdi y ta tumando pasonan pa restaura e situacion mas lihe posibel.

Minister Dowers a remarca cu e compania di seguro ta haciendo di su parti pa caba cu nan investigacion y pago mas lihe posibel y basa riba e placa cu ricibi lo acerca tambe Parlamento y Minister di Finansa pa reserva e fondonan pa e trabaonan di reparacion cu mester tuma luga.

Ta sumamente importante pa e prizon ta den e miho estado posibel pa por maneha esunnan cu ta deteni awo y detencionnan cu ta tumando luga, el a comenta. Ta di spera cu Corte compronde tambe e daño grandi haci na Pais Aruba pa e detenidonan envolvi y cu consecuentemente nan ta aplica castigonan pisa, Minister Dowers a subraya.

Fuente di informacion: Comunicado di gobierno

LEAVE A REPLY

Please enter your comment!
Please enter your name here