Cuminda y otro articulo di consumo lo bira mas caro. Es mas, ya caba comerciantenan ta confronta e realidad di carga cu a bira hopi mas caro fin di 2020 y e aumento di prijs lo bira mas prominente na 2021.
Un comerciante cu a papia cu Bon Dia Aruba a duna ehempel concreto. E gasto pa traha pan a aumenta pa dos motibo. Pa cuminza balor di Euro a aumenta compara cu e dollar. E balor di Euro compara cu dollar a subi di 1.13 dollar pa euro pa 1.23 dollar.
Esaki ta nifica cu productonan di Europa, for di hariña te lechi, automaticamente a bira 0.5 porciento mas caro. Riba dje, e prijs di flete internacionalmente a aumenta drasticamente.
Tur ingrediente pa pan a subi drasticamente
Prijs di produccion di e productonan basico, manera hariña, sucu y otro tur a subi tambe, Miguel Nucete di Bright Bakery a bisa Bon Dia Aruba, confirmando e preocupacion y e realidad. “Nos a mira un aumento di 15 porciento den prijs di hariña y mescos ta e caso cu sucu.” Nucete a bisa cu e hariña ta bin di Hulanda, pero e sucu ta bin di Colombia. “Na Augustus, un container di sucu a costa 17,194 dollar. E prijs awe ta 19,844 dollar. Esaki ta pa e mesun cantidad, e mesun container. Un aumento di mas di 2000 dollar.”
Riba dje, e prijs di saco di plastic pa hinca pan aden tambe a aumenta cu 6 porciento, y pa un compania manera Bright Bakery pero sigur tambe restaurantnan, e aumento di prijs di gas cu Arugas a bin cune, tambe lo tin un impacto grandi. “Arugas a subi su prijs di 1.33 pa meter cubico pa 1.39 florin pa meter cubico. Ta un aumento di 5 porciento.” Pa e panaderonan esaki ta nifica cu ya no por wanta e prijs di 4.10 florin pa kipashi. Ya caba ta absorba hopi di gastonan pero e aumentonan drastico ta rekeri cu pa por sigui produccion mester hisa e prijs di kipashi pa 4.40 pa 4.45 florin. No por otro,” Nucete a bisa.
Flete di China a bira dos biaha mas caro
Pero e aumento no ta impacta pan so. Flete di China a aumenta cu casi 100 porciento. “Tin caso cu a mira aumento di 4000 pa 8000 dollar pa un container for di China. Si por ehempel ta trece pechi aden, diripiente tur e pechinan a bira 4 dollar mas caro, na gasto di flete so.”
Un importado a confirma na Bon Dia Aruba cu tur container for di China a subi 100 % den gasto. “Prome cu COVID-19, un container di 40 pia tabata mas of menos 4300 dollar pa yega Aruba. Awor e ta 8400 dollar. Tin scarsedad di container bashi na China.” Aunke no por bisa si e scarsedad aki tin efecto pa container di producto for di Merca of Hulanda, realidad ta cu e paisnan aki tambe ta depende di materia prima for di China pa nan produccion.
Bon Dia Aruba a acerca Departamento di Duana pa sa cuanto ta e parti di China den e totalidad di container cu ta bin Aruba, pero Director Ricky Croes a bisa di no tin e autoridad pa duna e detayenan aki. Pero comerciantenan a bisa Bon Dia Aruba cu e cantidad di container for di China pa Aruba a bin ta aumentando.
Impacto ta na nivel internacional
Segun diferente articulo internacional na fin di 2020, e informe aki tabata un motibo di preocupacion. E exportacion di China a recupera hopi lihe di e pandemia COVID-19, pero pa por saca e productonan tin mas costo, pa motibo di e transporte. Motibo ta e costo di container cu a bira dos biaha mas caro. Pero asina mes, tin scarsedad di container. E problema ta sinta cu idealmente lo por manda e containernan bek pa China, pero pa motibo di e pandemia rond mundo, locual ta sali di China ta keda pega na e destinacion sin cu por manda nan bek. Y e demanda pa ekiponan ta grandi, netamente pa motibo di e pandemia. E volumen ta halto y e distribuidornan no por cumpli cu e demanda mesora. Diripiente e falta di container a bira un reto mundial. E crisis aki no ta afecta unicamente paisnan cu ta cumpra for di China, pero tambe companianan Chines mes cu no por manda nan productonan pa mercadonan na gran cantidad. E expectativa ta cu e prijs di flete for di China lo sigui subi por lo menos te na April 2021.
Reunion cu Minister Economia y Finanzas
Mientrastanto comerciantenan ta prepara pa reuni cu Minister di Economia y Finanzas pa mira con ta atende cu e aumento den prijs pa e ingredientenan basico pa pan y pa mira con por yega na un solucion. Miguel Nucete di su banda ta consciente cu aumenta prijs di pan awor aki ta zona hopi dificil, mirando e crisis. Pero panaderianan lo no por absorba e gasto pa mucho tempo y mester por yega na un palabracion cu Gobierno pa mira con por mitiga e gastonan di tal manera cu e consumido lo tin sinti menos impacto posibel.
