Dialuna lo tin un reunion entre DVG, Servicio Malesa Contagioso, DBZ y Servicio Cuido di Salud Hubenil, JGZ pa determina si e protocol pa muchanan di scol y prevencion di contagio cu COVID-19 ta esun apropia. Asina Presidente di SIMAR, Josephine Albertus a bisa Bon Dia Aruba. Esaki pa discuti e protocol nobo cu a lanta hopi pregunta.

Manera ta conoci, DVG a dicidi cu alumnonan riba 13 cu ta den cas cu personanan infecta cu coronavirus, mester tene cuarentena. Pero, muchanan bou 13 cu ta biba den famia cu tin e virus, por bay scol, y asina cu bolbe cas, keda den cuarentena.

E instruccion di DVG aki a crea un situacion hopi confuso y hasta tin docentenan pa no papia di mayornan, cu ta hopi indigna. Pasobra muchanan cu ta 12 of menos cu ta biba cu un persona infecta y cu mester ta den isolacion, mester sigui atende scol. Pero asina cu nan bolbe cas, nan ta considera di ta den cuarentena. Den otro palabra, otro cu scol, nan no por bay ningun otro caminda.

Preocupa cu protocol

SIMAR tabata hopi sorprendi y ta hopi preocupa cu e protocol nobo, “Nos no ta de acuerdo. Pero nos no ta e expertonan,” Albertus a bisa Bon Dia Aruba. “Normalmente nos ta haya e informacion directo di DVG, pero e biaha aki ta un docente a informa nos di dje, despues cu su cabesante di scol a ricibi e protocol.”

“E maneho aki no ta logico,” Josephine Albertus a ilustra. “Cluster 4 lo bolbe delibera riba e decisionnan aki riba dialuna, pa duna mas claridad.”

Albertus a bisa cu e ta hopi dificil pa por garantisa cu un hende cu ta positivo cu COVID-19 ta keda isola den su camber, y si tin mucha na cas, facilmente e virus por keda plama. “Nos di SIMAR no ta haya esaki un decision responsabel y nos a lansa e pregunta si e decision aki no ta trece mas insiguridad. “Normalmente nos ta haya e protocol directamente. E ultimo biaha cu SIMAR a ricibi un update di DVG tabata dia 1 di December. Pero e protocol nobo tabata di December 15 y esey si no a bin pa SIMAR.”

E punto principal cu DVG a dicidi pa e protocol aki, ta e situacion social na cas, segun Josephine Albertus. “E situacion social na cas por ta malo, pero no ta pa esey mester manda e mucha scol, a pesar di e risico di contagio na otro.” Particularmente, pasobra hasta si e situacion social na cas ta malo, e mucha lo mester bolbe bay cas y no ta permiti pa sali despues di oranan di scol, ya cu e mester keda den cuarentena. Den otro palabra, e no por bay ningun les di landamento cu cualkier otro.

Pero, hecho ta cu SIMAR por critica of alerta unicamente. E decision ta keda di e instancianan oficial, pero en todo caso, nan lo bay analisa y delibera cu tur actor envolvi Dialuna awor.

Protocol

E guia di DVG ta bisa cu cualkier alumno, for di baby te na adolescente, como tambe lidernan di crèche, y docentenan di scol primario y basico, y educacion secundario, cu tin sintoma mester bay nan dokter di cas, pa haci un test. Den caso cu nan ta positivo pa COVID-19, nan mester keda cas. Scolnan no por permiti ningun mucha of persona cu ta visiblemente malo, drenta e edificio of espacio di crèche of scol.

Den caso cu e mucha of alumno tin un familiar den cas cu ta den isolacion pa motibo di COVID-19, e regla ta pa e mucha tambe bay den cuarentena di 10 dia despues di e ultimo contacto cu e persona infecta. Si no por isola di e persona positivo cu coronavirus, e cuarentena ta cuminza 10 dia despues cu e persona en cuestion mehora. Durante e periodo aki, adolescentenan riba 13 aña no por bay scol, pero muchanan bou 13 si.

E muchanan bou 13 por bay scol pero lo mester bolbe den cuarentena asina cu bay cas. Den otro palabra, otro cu scol, nan no por bay ningun otro caminda.

Muchanan, alumnonan y docentenan cu ta wardando resultado di nan test no por bay nan scol of instancia.

Den caso cu Minister bin cu un areglo mas stricto, esey lo prevalece.