Corte Comun di Husticia (Hof) a dicidi pa pospone cu un aña e revision di castigo di bida largo di Cornelio Antonio Hermanus, mientras investigacion adicional mester determina si eventualmente tin base pa considera un libertad bao condicion. Ministerio Publico mester presenta un actualisacion di e proceso dentro di seis luna.
Hermanus ta e unico persona cu actualmente ta cumpliendo un castigo di bida largo den KIA. El a ser condena na 2006 despues di su di tres asesinato, di cual e ultimo a ser cometi na Aruba. Manera Bon Dia Aruba a reporta na februari, su caso ta e prome na Aruba caminda ta aplica e revision hudicial cu ta sigui despues di casi 20 aña di detencion.
E procedemento a cuminsa na februari 2026, pero Hof a pospone e caso te 31 di augustus 2026 pa duna tempo pa completa evaluacionnan y prepara rapportnan actualisa. Na e momento ey, Ministerio Publico a considera cu ainda no tabatin suficiente informacion pa evalua un posible libertad, particularmente tocante posibilidad di reintegracion di Hermanus y e riesgo cu e eventualmente por representa pa sociedad.
Durante e sesion mas reciente Corte a indica cu ainda tin basta investigacion pendiente pa determina cual condicionnan Hermanus eventualmente mester cumpli prome cu por considera libertad. Pa e motibo, Hof a pospone e revision te 2027.
Comision Castigonan di Bida Largo ta reuni e informacion cu Corte mester pa determina si tin motibo pa mantene e castigo, considerando seguridad publico, posibilidad di reintegracion y e interes di e victimanan y nan famia.
